बजेटय् पुलांगु ज्यायात थाय् मदु
न्हूगु सरकारपाखें न्हूगु प्याकेजया तयारी
यें (सन्ध्या टाइम्स) / न्हापाया सरकारं चले याये धकाः ग्वसाः ग्वयाच्वंगु छुं छुं रुग्न उद्योगत वर्तमान सरकारं हानं चले मयाकीगु जूगु दु । माओवादी नेतृत्वया सरकारं हेटौंडा कपडा उद्योग हानं चले याकेत बजेट तकं विनियोजन यानाः ज्या न्ह्याकेधुंकूगु खः । उगु उद्योगं थ्वहे वंगु असार १५ गते निसें कपाय्या अभाव जुयाः उत्पादन याये मफयाच्वंगु खः ।
उद्योगं कापः उत्पादन यायेत भारतं कपाय् झिके यायेगु तयारी समेत पूवंके धुंकूगु खः । तर आःया सरकारं उगु उद्योग पुनः चले यायेगु कुतःयात निरन्तरता मबीगु जुइवं आः छु जुइ धइगु न्ह्यसः ब्वलंगु दु ।
अथे हे सरकारं वीरगाजया कृषि औजार कारखानायात नं निरन्तरता मबीगु जूगु दु । वंगु छुं न्हि न्ह्यः जक बीरगंजय् जूगु छगू सभाय् न्ववासें कृषि मन्त्रीं बीरगंज कृषि औजार कारखाना छुं न्हि लिपा हे संचालनय् वइ धयादीगु खः ।
तर सरकारं थ्व निगुलिं उद्योगया निंतिं थुगुसी बजेट विनियोजित मयाइगु खँ सूत्रं धाःगु दु ।
उखे योजना आयोगया पुलांम्ह दुजः डा. पुष्पराज राजकर्णिकारं धाःसा थुगुसीया बजेटय् छुं न्हूगु खँ दुथ्याये फइगु संकेत बियादीगु दु ।
वय्कलं बियादीगु जानकारी कथं सामाजिक सुरक्षाया अवधारणा अन्तर्गत थुगुसीया बजेटय् मस्तय्गु सुरक्षाया निंतिं छुं यायेगु ज्याझ्वः दुथ्याइगु सम्भावना दु ।
वय्कलं कनादी कथं तराई लागाय् आवासविहिनतय्गु निंतिं नं आवास उपलब्ध यायेगु कथंया ज्याझ्वः वये फइगु सम्भावना दु ।
अथे हे दलिततय् उत्थानया निंतिं नं सरकारं विशेष ज्याझ्वः हयेगु तयारी यानाच्वंगु जानकारी वय्कलं बियादीगु दु ।
वय्कलं बियादीगु जानकारी कथं न्हापा थें सामाजिक सुधार ज्याझ्वः अन्तर्गत ध्यबा जक बीगु मखुसें उकिं समाजय् रुपान्तरणया निंतिं भूमिका म्हिते फइ कथंया सामाजिक सुधारया ज्याझ्वःत हयेगु तयारी जुयाच्वंगु दु ।
अथे हे युवा स्वरोजगार ज्याझ्वःयात नं भचा परिमार्जन यानाः जक सरकारं बजेटय् दुथ्याके त्यंगु दु । येँय्या फोहोर व्यवस्थापन बारे नं छुं खँ बजेटय् दुथ्याये फइगु जानकारी वय्कलं बियादीगु दु ।
