नेवि संघपाखें येँदेय् अस्तव्यस्त
ठेक्का लाकेगु खँय् विद्यार्थी दथुइ ल्वापु
येँ / (सन्ध्या टाइम्स) निगू सत्तारुढ दल नेकपा एमाले व नेपाली कांग्रेसया भ्रातृ संगठन अनेरास्ववियु व नेवि संघ दथुइ म्हिगः त्रिचन्द्र कलेजय् जूगु ल्वापुइ आकाझाकां गोली हे चले जुयाः नेवि संघया विद्यार्थीत घाःपाः जुइवं थौं नेवि संघं उकिया विरोधय् येँ दुने प्रदर्शन याःगु दु ।
नेवि संघया प्रदर्शनं यानाः येँया यातायात अस्तव्यस्त जुयाच्वंगु दुसा थीथी क्याम्पसय् ब्वनेज्या नं ठप्प जुयाच्वंगु दु ।
नेवि संघं गोली चले याःम्ह अपराधीयात ज्वनाः कारवाही मयाःतले विरोध कार्यक्रम यानां तुं च्वनेगु खँ धाःगु दु । म्हिगः क्याम्पस लागाय् चले जूगु गोलीं कयाः नेवि संघया विद्यार्थीत भिम गुरुङ व रवि थापा घाःपाः जूगु खः । गोलीं कयाः गुरुङया बुरिपितं प्वाः गनाच्वंगु दु ।
गोली काण्ड लिपा म्हिगः हे नेवि संघं थाय्थासय् टायर च्याकाः विरोध प्रदर्शन शुरु याःगु खःसा चले याना हःगु गाडीइ नं अप्पां कयेकाः क्षति याना बिउगु खः ।
नेवि संघं एमालेया भातृ संगठन युथ फोस्रं गोली चले याःगु द्वपं बिउगु दुसा युथ फोस्रं उकिया खण्डन यायेधुंकूगु दु ।
उकिया विरोधय् थौं नेवि संघं येँया त्रिचन्द्र कलेज शंकरदेव ल आदि क्याम्पस पिने टायर च्याकाः प्रदर्शन यानाच्वंगु दु ।
सूत्रतय्सं बिउगु जानकारी कथं थ्व निगू विद्यार्थी संगठनतय् दथुइ छगू ठेक्कापट्टाया खँयात कयाः ल्वापु जूगु खः । त्रिचन्द्र क्याम्पसया केमिष्ट्री विभागया तल्ला थपे यायेगु छगू ठेक्का नेवि संघं धाःम्ह ठेकेदारयात बीमाः धइगु खँयात कयाः उगु ल्वापु जूगु खः । म्हिगः टेण्डर चायेकेगु न्हि कुन्हु नेवि संघं धाःम्ह ठेकेदारयात लाकेगु कि अखिलं धाःम्ह ठेकेदारयात लाकेगु धइगु खँयातकयाः उगु ल्वापु जूगु खः । ८० लाख तकाया उगु ठेक्का लाकूगुवापत विद्यार्थी संगठनतय्त नं कमिशन वइगु खँ दुगु खः ।
लुमंकेबहः जू वंगु छुं ई न्ह्यवंनिसें राजधानीया थीथी थासय् ठेक्कापट्टा ल्हातय् लाकेत ठेकेदारतय्सं थीथी राजनीतिक पार्टीया ल्याय्म्ह मोर्चातय्त प्रयोग यायेगु यानाच्वंगु दु । न्हापा थज्याःगु ज्याय् थीथी सांगठनिक गुण्डा पुचःयात प्रयोग याइगु खःसा आः थीथी राजनीतिक पार्टीया हे भातृ संगठनतय्त छ्यलेगु यानाच्वंगु दु ।
