विदेशय् च्वंपिं नेवाःत
अमेरिका, बेलायत आदि विदेशय् च्वनाच्वंपिं नेवाःतय्सं खालि बौद्धिक विलास जक क्यनी धकाः च्वयादीगु भाजु नरेशवीर शाक्यया च्वसु ब्वनाः छता निता खँ धाये मास्ते वल । वास्तवय् वय्कलं धयादीगु खँय् यक्व सत्यता दु । विदेशय् च्वंपिं नेवाःतय्सं नेपाःया 'ग्राउण्ड रियालिटी' मसिउ । थन च्वंपिं नेवाःतय्सं गय् यानाः ज्या यानाच्वन उमित गज्याःगज्याःगु समस्या वयाच्वन राज्यं उमित गय् यानाः दमन यानाच्वन धइगु खँ उमिसं सिउसां अनुभूति धाःसा याःगु दइ मखु । अय् जुयाः अज्याःगु बारे न्ववायेत उमित अःपु । विदेशय् च्वनाः नेपाःया नेवाःतय्सं व मयाः थ्व मयाः धकाः जक हालाच्वनेगु बांलाःगु खँ मखु । थन च्वंपिं नेवाःतय्सं छुं मयाःसा उमिसं हे छुं यानाः क्यना बिउसा ला जि हे जिउ नि । उपिं ला झन विदेशय् च्वनाः डलर कमे यानाः च्वनाच्वंपिं खः । अन च्वनाः खालि कमे जक यायेगु लाकि नेवाःतय् लागिं छुं ज्या नं यायेगु थज्याःगु सवालयात कयाः नरेशवीर शाक्यजुं बडा स्याचुक च्वयादीगु दु । अथे खःसां विदेशय् च्वंपिं नेवाःतय्के थःगु देशं उलिमछि तापाक च्वनाः नं थःगु देश थःगु भाषा थःगु जाति प्रति गुगु माया दुगु खः व मायाया भावनायात धाःसा कदर याये हे माः । व ला सकस्यां अनुकरण नं यायेमाः थें च्वं ।
- देवेन्द्र महर्जन,
किपू नगरपालिका-५ ।
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
