एमाले-माओवादी वार्ता सकारात्मक
प्रधानमन्त्रीं थौं हे संवोधनया सम्भावना
येँ (सन्ध्या टाइम्स) / संसदय् न्ह्यानाच्वंगु राजनीतिक गतिरोध अन्त्य यायेगु विषययात कयाः थौं सुथय् च्वंगु एमाले व माओवादी दथुया वार्ता सकारात्मक जूगु खँ धाःगु दु ।
थौंया बैठकय् माओवादीं ल्ह्वना वयाच्वंगु प्रधानसेनापति रुक्मांगद कटवालयात माओवादी नेतृत्वया सरकारं चीकूगु इलय् राष्ट्रपितं ल्ह्वंगु पलाःयात कयाः प्रधानमन्त्री माधव नेपालं याइगु संवोधनय् प्रशंग दुथ्याकेगु खँय् निगुलिं पुचः सहमत जूगु खँ बालुवाटार स्रोतं धाःगु दु ।
थ्व सहमति लिपा थौं हे प्रधानमन्त्री नेपालं सदनय् संवोधन यायेगु तयारी यानाच्वंगु खँ नं बालुवाटार स्रोतं धाःगु दु ।
प्रधानमन्त्रीं सदनय् संवोधन याये न्ह्यः एमालें कांग्रेसलिसे नं थौं सहलह यायेत्यंगु दु । कांग्रेसलिसेया सहलह सकारात्मक जुल धाःसा प्रधानमन्त्रीपाखें थौं हे संवोधन याये फइगु खँ धाःगु दु ।
यदि थौं प्रधानमन्त्रीया संवोधन वल धाःसा थौं हे चिकुलाया अधिवेशन क्वचायेकाः न्ह्यानाच्वंगु अधिवेशनयात हे बजेट अधिवेशनय् हीका छ्वये फुगु खँ नं धाःगु दु ।
थ्वया न्ह्यः माओवादीं ताः ई न्ह्यवंनिसें याना वयाच्वंगु सदन अवरुद्धया ज्याझ्वः दिकाः थनिंनिसें हे सदन सुचारु याकेगु तयारी यानाच्वंगु खः । माओवादीं पेश्की बजेटया निंतिं थनिंनिसें सदन अवरुद्ध मयायेगु धासें सदन न्ह्याके बीत्यंगु खः ।
थ्व स्वयां न्ह्यः प्रधानमन्त्रीं याइगु संवोधनय् भाषाया खँय् विवाद जुयाच्वंगुलिं माओवादीं याना वयाच्वंगु सदन अवरुद्ध ज्याझ्वःयात निरन्तरता बिया वयाच्वंगु खः ।
म्हिगः नं सदन सुचारु यायेगु निंतिं एमाले कांग्रेस व माओवादीया दथुइ निगू पक्षीय व स्वंगू पक्षीय वार्ता जूगु खः । म्हिगःया वार्ताय् नं स्वंगुलिं पुचलं वार्ता सकारात्मकजूगु खँ धाःगु खः ।
उखे थौं एमाले व माओवादी दथुइ जूगु सहमतियात कांग्रेसंगुकथं काइ धइगु खँ धाःसा अझं सीमदुनिगु खँ धाःगु दु । राष्ट्रपितं ल्ह्वंगु पलाःयात पाय्छि जू धकाः अझ नं कांग्रेसं अडान कयाच्वंगुलिं उकिया बारे थौं एमाले व कांग्रेसया बैठक च्वनाः जक निर्णय पिकाये फइगु खँ धाःग दु । कांग्रेसया निर्णय लिपा जक सरकारं छुं ज्या याइ ।
