मोतिलक्ष्मीया १०० दँ बुन्हि हन

नेपालभाषा नापं नेपालीया न्हापांम्ह बाखं च्वमि मोतिलक्ष्मी उपासिकाया १०० दँ बुन्हि थौं छगू ज्याझ्वःया दथुइ तःजिक हन । येँया परोपकार उच्च माविया हलय् जूगु ज्याझ्वलय् नेपालभाषा परिषदया नायः नापं मोतिलक्ष्मी उपासिका सच्छि दँ बुदिंया ग्वसाः खलःया नायः फणिन्द्ररत्न बज्राचार्यजुं बौद्ध विद्वान नानीमैंया मानन्धरयात मोतिलक्ष्मी सिरपाः लःल्हानादिल । उगु सिरपाःस झिंन्याद्वः तका धेवा व दसिपौ दुगु खः ।

अथेहे ज्याझ्वःस नांजाःम्ह समालोचक नापं बाखं च्वमि माधवलाल कर्माचार्यजुं नेपालभाषा मिसा खलःपाखें पिथंगु मोतिलक्ष्मीया किपा दुगु वहःया पाय्म्वःया उलेज्या यानादीगु खःसा नेपाल ऋतुपौया १०१ ल्याः मोतिलक्ष्मी विशेषांक नेपालभाषा एकेडमिया चान्सलर संस्कृतिविद् सत्यमोहन जोशीं विमोचन यानादिल । नापं बाखं च्वमि कृष्णदेवी बज्राचार्यं च्वयादीगु 'जिगु लुमन्ति छगू बाखं' सफूया उलेज्या मूपाहाँ कवयित्री नारायणदेवी श्रेष्ठं उलेज्या यानादिल ।

थ्वहे सच्छिदँ बुन्हिया झ्वलय् नेपालभाषा मिसा खलकं याःगु विद्यालय स्तरया चिनाखँ धें धें बल्ला कासाय् न्हाप ल्यू लियांल्यू व हःपाः सिरपाः त्याकादीपिन्त नं मूपाहाँ श्रेष्ठं सिरपाः लःल्हानादिल । उगु कासाय् माध्यामिक पुचलय् परोपकार उच्च मा।वि।या रोशन महर्जन न्हाप लाःगु खःसा निम्न माध्यामिक पुचलय् जगत सुन्दर ब्वनेकुथिया जमुना श्रेष्ठ व प्राथमिक पुचलय् इकेदा इन्टरनेशनलया सचेतना मानन्धर न्हाप लाःगु खः । ज्याझ्वलय् प्रकाश प्रधानांग कृष्णदेवी बज्राचार्य मोतिलानी ताम्राकार अम्बिका श्रेष्ठयात नेपालभाषा मिसा खलःया मानार्थ दुजः कथं हंगु खः । नेपालभाषा मिसा खलःया छेँ दनेगु नितिं सरस्वति बज्राचार्यं छगू लख तका डा. केशरी लक्ष्मी मानन्धरं न्यय्द्वः तका धेबाः मिसा खलःया नायः मंगला कारिाजतयात लःल्हाःगु खः । मिसा खलःया दुजः सरस्वति तुलाधरं बाखं च्वमि मोतिलक्ष्मी उपासिकाया म्हसीका ब्वनाः न्यंकूगु ज्याझ्वलय् डा. केशरी लक्ष्मी मानन्धरं मोतिलक्ष्मीया बारे चिनाखँ न्यंकादीगु खः ।

साहित्यकार फणिन्द्ररत्न बज्राचार्यया सभापतित्वय् जूगु थुगु ज्याझ्वलय् नेपालभाषा परिषदया उपाध्यक्ष सुवर्ण बज्राचार्यं सुभाय देछानादीगु खःसा ज्याझ्वलय् नेपालभाषाया आपालं न्ह्यलुवा साहित्यकार तथा कार्यकर्तातय्गु उपस्थिति दुगु खः ।

थ्वहे झ्वलय् थौं सुथय् मोतिलक्ष्मी उपासिकाया सच्छिदँ बुन्हिया लसताय् येँया बसन्तपुलिं नसंचा उलेगु ज्या जूगु खः । येँ देय् चाःहिलाः नेपालभाषा परिषदया छेँ थ्यंकाः मोतिलक्ष्मीया किपाय् स्वां देछाय्गु ज्या जूगु खः ।

More Stories Like this