'झी नं द्यः जुइनु' आः डिभिडिइ

तिसा साहित्य पाला, ललितकला क्याम्पसया ग्वसालय् जूगु छगू ज्याझ्वःस ख्यालि जुजु मदनकृष्ण श्रेष्ठ व नेवाः देय् दबूया पुलांम्ह नायः मल्ल के सुन्दरं नेपालभाषाया छधाः प्याखँ 'झी नं द्यः जुइनु'या डिभिडि चक्काया मंकाः उलेज्या यानादिल । नेवाः स्वायत्त राज्यया विषययात कयाः दय्कातःगु थुगु प्याखं सँझ्याः साहित्य पालाया ग्वसालय् जूगु छधाः प्याखं धेंधें बल्ला कासाय् ब्वति कायेधुकूगु खःसा थ्वयात सकल नेवाःतय् थाय् थ्यंकेगु नितिं डिभिडि चक्काय् पिकाःगु खः ।

अनुप सिंह सुवालया निर्देशन व च्वयादीगु थुगु प्याखनय् मुक्कं च्याम्ह कलाकारतय्सं म्हितूगु खःसा थौं मूपाहां मदनकृष्ण श्रेष्ठं हःपाः बीकथं सकसितं डिभिडि देछायादीगु खः । मूपाहां मदनकृष्ण श्रेष्ठ, मल्ल के. सुन्दर, नेवाः देय् दबूया नायः नरेश ताम्रकार, सुमित्रा गुरुङ मानन्धर, ललितकला क्याम्पसया क्याम्पस प्रमुख राजु मानन्धरं नेवाःतय्त सांस्कृतिक आर्थिक नापं थी थी ख्यलय् थकाय्गु नितिं नेवाःत छप्पं जुयाः ग्वाहालि याय्माःगु खँय् बः बियादिल । साय्म अडियो भिडियोया ग्वाहाली तिसा साहित्य पालापाखें थुगु डिभिडि चक्का पिथंगु खः ।

More Stories Like this