सदन मन्ह्यानाः बजेट अलपत्र
कर्मचारीयात तलब नकेत नं समस्या
येँ / (सन्ध्या टाइम्स) ताःहाकः जुया वनाच्वंगु राजनीतिक गतिरोधया कारणं बजेट दयेकेगु ज्याय् तकं लिच्वः लानाच्वंगु खँ धाःगु दु ।
प्रमुख प्रतिपक्षी माओवादीं नियमित रुपं सदन अवरुद्ध यानाच्वंगुलिं सरकारया नीति तथा कार्यक्रम हे सदनय् हये मफयाच्वंगु कारणं उकिया हे आधारय् दयेकीगु बजेट निर्माणया ज्या नं अन्यौलय् लानाच्वंगु खँ बजेट दयेकेगु तयारी यानाच्वंपिं अधिकृततय्सं धाःगु दु ।
बजेटया नियम कथं थ्वहे वइगु असार मसान्त तकया दुने नं सदनय् बजेट पेश याये मफुत धाःसा सरकारं छुं हे खर्च याये फइगु अवस्था ब्वलनी । यदि राजनीतिक अवरोध थुकथं हे न्ह्यानाच्वनेगु खःसा साउनं निसें कर्मचारीयात तलब नकेत तकं थाकुइगु खँ अर्थ मन्त्रालयया उच्च कर्मचारीतय्सं धाःगु दु ।
चैत्रं शुरु जूगु चिकुलाया अधिवेशन हे आः तक क्वमचाःनिगु कारणं अध्यादेशपाखें बजेट हयेत नं कानुनी रुपं समस्या दुगु खँ विज्ञतय्सं धाःगु दु ।
सदन न्ह्यानामच्वंगु व अधिवेशन नं क्वमचाःगुलिं बजेट गुकथं हयेगु धइगु समस्या जुयाच्वंगु खँ नं धाःगु दु ।
उखे योजना आयोगया पुलांम्ह दुजः डा. पुष्पराज राजकर्णिकारं धाःसा बजेट दयेकेगु ज्याय् खास हे पंगः मवःगु खँ कनादीगु दु । थौं सुथय् 'सन्ध्या टाइम्स' लिसे खँ ल्हासें वय्कलं बजेट दयेकेगु ज्या न्ह्याना हे च्वंगु व गबलय् सदन चले जुइ अबलय् हे पेश याइगु जानकारी बियादिल ।
तर अर्थ मन्त्रालयया प्रमुख सल्लाहकार केशव आचार्यं धाःसा राजनीतिक समस्या मज्यंतले बजेट नं अनिश्चित जुइगु खँ कनादीगु दु । वय्कःया कथं आः छु प्रकि्रयां बजेट हयेगु धइगु बारे हे समस्या जुयाच्वंगु दु ।
सदनया नियम कथं बजेट पेश यायेगु झिंन्यान्हु न्ह्यः हे बजेटया उद्देश्य व नीतियात कयाः सदनय् सहलह जुइमाः ।
उखे गुलिखे विज्ञतय्सं धाःसा सरकारं अधिवेशन अन्त यानाः जूसां बजेट हयेमाःगु सुझाव बियाच्वंगु दु ।
कर्मचारीतय्सं धाःसा गुलि हथासं बजेट दयेकाच्वंगु खः वहे कथं राजनीतिक पार्टीतय्सं बजेट पेश यायेगु वातावरण दयेके मफुगु द्वपं बिउगु दु ।
