ल्वापुं संविधान च्वज्या प्रभावित
राजनीति थथे हे जूसा संविधान मवयेफु
येँ / (सन्ध्या टाइम्स) राजनीतिक दलतय् दथुइ ब्वलनाच्वंगु राजनीतिक अवरोधया कारणं इलय् संविधान च्वये सिधइगु खँय् विज्ञतय्सं आशंका प्वंकूगु दु । विज्ञतय् कथं यदि राजनीतिक पार्टीतय् दथुइ दयाच्वंगु राजनीतिक गतिरोध थुकथं हे न्ह्यानाच्वन धाःसा आः वइगु िझंछलाया दुने संविधान च्वयेगु ज्या क्वमचाइगु निश्चित दु ।
राजनीतिक दलतय् दथुइ ब्वलनाच्वंगु असमझदारीं हे संविधान च्वयेगु ज्या लिबानाच्वंगु खँ विज्ञतय्सं धायेगु यानाच्वंगु दु ।
राजनीतिक पार्टीतय् दथुइ समझदारी व सहकार्यया प्रवृत्ति विकास जुइ मफयाच्वंगु खँय् चिउताः प्वंकुसें विज्ञतय्सं यदि थ्व हे कथं देय्या राजनीति न्ह्याना च्वनेगु खःसा निर्धारित इलय् संविधान च्वयेगु सम्भव मदुगु खँ धाःगु दु ।
राजनीतिक पार्टीतय् दथुइ ब्वलना वनाच्वंगु असमझदारीयात कयाः स्वयम् प्रधानमन्त्री माधव नेपाल व सभामुख सुवास नेम्वाङ्गं तकं नं अज्याःगु हे चिन्ता प्वंका वयाच्वंगु खःसां उकिया निकासाया निंतिं सार्थक कुतः धाःसा जुयाच्वंगु मदु ।
संविधानसभाया सचिवालयया प्रवक्ता मुकुन्द शर्मां दलतय्सं यानाच्वंगु गतिविधिं इलय् संविधान दयेके थाकुइगु जूसां नं यदि दलत मिले जुल धाःसा इलय् संविधान च्वये सिदइगु खँ कनादी । अन्तरिम संविधान कथं २०६७ साल जेठ १४ गते तक संविधान दयेकेगु ज्या क्वचायेमाः ।
राजनीतिक गतिरोधया कारणं हे संविधान च्वयेगु कार्यतालिका तःक्वःमछि हिलेधुंकूगु दुसा समितिइ थीथी विषययात कयाः राजनीतिक पार्टीतय् दथुइ ब्वलना च्वंगु मतभेदं नं संविधान च्वयेगु ज्याय् लिच्वः लाकाच्वंगु दु ।
विशेष यानाः सांस्कृतिक व सामाजिक ऐक्यवद्धता आधार निर्माण समितिइ भाषा सम्बन्धी विवाद जुयाच्वंगु दुसा मेमेगु समितिइ नं थज्याःगु विवाद ब्वलनीगु आशंकादु ।
मेखे भाजु माधव नेपाल प्रधानमन्त्री जुइधुंकाः संवैधानिक समितिया न्हूम्ह अध्यक्ष ल्यये मफयाः नं संविधान दयेकेगु ज्याय् लिच्वः लाइगु आशंका विज्ञतय् दु । समितिया न्हूम्ह नायः जुइत थौंकन्हय् नेपाली कांग्रेस व माओवादी दथुइ धेंधेंबल्लाः जुयाच्वंगु खँ सूत्रतय्सं धाःगु दु ।
