मोतिलक्ष्मीया सछिदँ हने

कृष्ण

मोतिलक्ष्मी उपासिकाया नां मन्यंपिं शायद हे जक दइ । नेपालभाषा मिसा खलःया न्हापांम्ह निकं मय्जु मोतिलक्ष्मी उपासिका नेपालभाषा जक मखु मुक्कं नेपाःया हे न्हापांम्ह मिसा बाखं च्वमि खः । थः दाजु चित्तधर 'हृदय' नापनापं वय्कलं नेपालभाषा उत्थान व विकासय् थःगु जीवन पानाः नेपालभाषा च्वन्ह्याकेगु ज्या यानादिल । थुगुसी वय्कःया सछिदँ बुन्हि तःजिक न्यायेकेत्यंगु दु । वइगु असार २० गते शनिवाः विशेष ज्याझ्वः यानाः उगु बुन्हि न्यायेकेत्यंगु खः ।

न्हापा न्हापा नेपालभाषा मिसा खलःपाखें जक दँय्दसं मोतिलक्ष्मीया बुन्हि न्यायेका वयाच्वंगु खः । थुगुसी नेपालभाषा परिषदया नं ग्वाहालि कयाः मोतिलक्ष्मी उपासिका सछिदँ बुन्हि ग्वसाः खलः नांगु समिति हे स्वनाः उगु ज्या न्ह्याकेत्यंगु खः । शनिवाः परिपकार उच्च मावि भिंद्यःत्वालय् उगु ज्याझ्वः जुइ ।

थ्वयां न्ह्यः हे नेपालभाषा मिसा खलःपाखें मोतिलक्ष्मी उपा- सिकाया सछिदँ बुन्हिया लसताय् कविता कासा जुइधुंकूगु दु । कंस सनिवाः उकिया नं सिरपाः इनेज्या याइगु ज्याझ्वः दु । नापं मोतिलक्ष्मी उपासिकाया म्ह्याय्चा डा। केशरी लक्ष्मी मानन्धरं नीस्वनादीगु मोतिलक्ष्मी सिरपाः नं लःल्हाइ ।

मोतिलक्ष्मी उपासिकाया सछिदँ बुदिंया लसताय् 'मोतिलक्ष्मी उपासिका' लुमन्ति पौ नं पिथनेगु तयारी जुयाच्वंगु दु । उकिया लागिं छत्रबहादुर कायस्थयात जिम्मा बियातःगु दु । नापं २० गते मोतिलक्ष्मी उपासिका सच्छिदँ बुन्हि ग्वसाः खलःपाखें सुथय् ७ बजे बसन्तपुली मुनाः वय्कःया किपा न्ह्यःने ब्वयाः नसंचा उलेगु ज्याझ्वः नं दयेकातःगु दु । छम्ह मिसा च्वमिया नसंचा उलेगु ज्या यायेत्यंगु नेपालय् थ्वहे न्हापांखुसी खः ।

थुपिं ज्याझ्वःत ताःलाकेत नेपालभाषा परिषदया नायः फणीन्द्ररत्न बज्राचार्यया संयोजकत्वय् मोतिलक्ष्मी उपासिका सछिदँ बुन्हि ग्वसाः खलः नीस्वंगु दु । नसंचा उलेगु ज्याझ्वः बसन्तपुलिं शुरु जुयाः कुमारी सालीगु लँ जुयाः वंघः थ्यनेवं जनबहालं वनाः तुंछेँ गल्लिइ थ्यंकाः स्वांदेछायाः क्वचायेकीगु ज्याझ्वः क्वःछिनातःगु दु । उगु नसंचा उलेगु ज्याझ्वलय् न्यत गंुला बाजं व वय्कःया पाजु खलः असंया छथ्वः गुंला बाजं दुथ्याइ ।

मोतिलक्ष्मी उपासिका नेपालभाषा मिसा खलःया न्हापांम्ह निकं जक मखु कि थः हे मां थें जूगुलिं डा. केशरीलक्ष्मी मानन्धरं वय्कःया नामं हे सिरपाः नीस्वनादीगु खः । उगु सिरपाः थुगुसी पकनाज्वःया नानीमैंया मानन्धरयात बीत्यंगु दु । निदँय् छक्वः बीगु याना वयाच्वंगु झिंन्याद्वः तका दां व हनापौ दुथ्याःगु उगु सिरपाः थ्वयां न्ह्यः नारायणदेवी श्रेष्ठ सुवर्णकेशरी चित्रकार व प्रतिसरा साय्मियात बीधुंकूगु दु ।

अथे हे तुं 'नेपाल' ऋतु पौया विशेषांक नं थुगुसी उकुन्हु हे पिथनेगु तयारी जुयाच्वंगु दु । उकुन्हु जुइगु विशेष समारोहय् मोतिलक्ष्मीया सछिदँ बुदिंया लसताय् जुइगु चिनाखँ कासाया उत्कृष्ट च्वमिपिंत सिरपाः नं लःल्हानादीगु ज्याझ्वः दु । थुगुसी नेपालभाषा मिसा खलःपाखें न्हापांखुसी छम्ह मिसा च्वमिया लुमंतिइ मोतिलक्ष्मी उपासिका अंकित वहःया पाँय्म्वह नं पिथनेगु तयारी यानाच्वंगु दु । मिसा खलःपाखें परोपकारय् जुइगु उगु विशेष समारोहय् मोतिलक्ष्मी उपासिकां च्वयातःगु प्यंगू सफू नापं नेपालभाषा साहित्य लागाया मिसा च्वमिपिंसं जक च्वयातःगु सफूतय्गु ब्वज्या नं यायेत्यंगु दु । नापं ज्याझ्वलय् नेपालभाषा मिसा खलःया जिवंकाछि दुजःतय्त लोगो इनेगु नं ज्याझ्वः दयेकातःगु दु ।

मोतिलक्ष्मी उपासिकां च्वयातःगु निबन्ध बाखं व प्रबन्धत मुंकाः आः तक खुगू सफू पिथने धुंकूगु दु । न्हापां वय्कःया 'संघ' नांगु सफू पिहांवःगु खः । वयां लिपा 'मोतिमाः' निबन्ध मुना पिहांवल । वय्कःया स्वंगूगु सफू 'चखुंचिया सर्बय्' खः । लिपा 'धौबजि' निबन्ध मुना पिदन । नापं लिपांगु सफू कथं 'मोति बाखं पुचः' सफू पिदन । उगु सफुली विक्रम संवत् १९९२ य् हे पिथंगु 'शारदा' पत्रिकाय् दुथ्याःगु निपु खँय् भाय्या बाखंयात नं नेपालभाषां अनुवाद यानाः स्वपु पुलांगु हे अप्रकासित बाखं व मेगु थीथी पत्रपत्रिकाय् पिथंगु बाखंत दुथ्याका तःगु दु । मोतिलक्ष्मी उपासिकाया बाखं चित्तधर ुहृदयुया बाखं पिहां वये न्ह्यः हे भारतं पिथनीगु हिन्दी भाषाया पत्रिका 'धर्मदूत'या लिपांगु प्यंगू पेज नेपालभाषायात अलग्ग यानातःगु थासय् पिहां वयेधुंकूगु खः । चित्तधर 'हृदयं' हे पण्डित तयाः मोतिलक्ष्मी उपासिकायात संस्कृतया ज्ञान बिउगु खःसा अमृतानन्द भन्तेपाखें बुद्ध धर्म दर्शन सम्बन्धि शिक्षा हासिल यानादीगु खः । मोतिलक्ष्मी उपासिका स्वयां नं झिदँ झिंनिदँ न्ह्यः नेपाल संवत् १०४८ पाखे हे च्वयातःगु चित्तधर 'हृदय'या फुटकर बाखंत 'चित्तया चिन्तन : हृदयया स्पन्दन' ११०८ य् वयाः तिनि फणिन्द्ररत्न बज्राचार्यं सम्पादन यानाः पिथंगु खः ।

चित्तधर 'हृदयं' थःगु छेँ थः म्वाःनिबलय् हे नेपालभाषा परिषदयात दान याना वंगु खः । म्वातले च्वनेगु सर्तय् थः केहेँपिंत अलग्ग अलग्ग छेँ नं नामसारी यानाबिल । सिद्धिचरण श्रेष्ठ थेंज्याःम्ह सशक्त च्वमिया प्रेरणा कयाः नं मोतिलक्ष्मी उपासिकां थःगु च्वसा निरन्तर रुपं न्ह्याकादीगु खँ वय्कःयात म्हसिउपिंसं धायेगु याः । तर न्हापांखुसी छम्ह मिसा च्वमि जूगु ल्याखं मेपिंसं धाइ ल्हाइ धकाः मोतिलक्ष्मीं थःगु नां 'एम. लक्ष्मी' धकाः च्वयादिल । 'धर्मदूत' पत्रिकाय् नं एम। लक्ष्मी नामं हे बाखंत पिदनाच्वंगु दु । चित्तधर तुलाधरं नं थःगु नां 'हृदय' हे जक तयादिल । थथे छखा हे छेँया निम्ह दाजु व केहेँ जानाः नेपालभाषाया साहित्य भण्डार जायेकेगु नापं न्हूपिं नेपालभाषाया साहित्यकार व च्वमितय्त हःपाः बीगु निंतिं त्याग व दानया तकं भावना ब्वलंकाः मोतिलक्ष्मी उपासिकां थःगु जीवन फुकावंगु दु ।

More Stories Like this