ख्याती श्रेष्ठया विभत्स हत्या व नेवाःत प्रति ब्वलनावःगु न्ह्यसः

जि विक्रम

थौ राजधानी येँय् छगू विभत्स हत्या जूगु लास लूगु दिं असार ७ गते दु । नेवाः आदिवासीया भूमिइ छम्ह नच्चाम्ह नेवाः मय्जुया अले वयागु हत्याय् संलग्न मू भागिदार ज्यानमारात नं नेवाःत जूगु दु । थन हे लाक्क बिचाः यायेमाःगु गम्भीर न्ह्यसः थ्व ब्वलंगु दु कि मय्जु ख्याती श्रेष्ठया थुलि विभत्स हत्याय् अपराधी साबित जूपिं वीरेन श्रेष्ठ प्रधान व मेरिना शाक्यिपं धात्थें हत्याकाण्डया योजनाकारत खः वा पात्र वा अभिनयकर्ता जक धात्थेंया योजनाकारत खःसा खास हे ध्यान मबिसे मजिल मखु अभिनयकर्ता जक खः धइगु जूसा प्रत्येक नेवाःतय्सं गम्भीर रुपं सोचे मयासें मगात । मखुसा कन्हय् वनाः सु गरिब सु धनी आखिर नेवाःतय्सं गः कियाः सिना वनेगुया विकल्प मदु । छगू विकल्प दु व गरिब नेवाःया लागिं मखु धनीम्ह नेवाःया लागिं व छु धाःसां थःपिंके दुगु फुक्क कथंया श्री सम्पत्ति मियाः विदेशय् पलायन जू वनेगु मेगु विकल्प जिं लुइके मफु ।

देश थौं संघीय लोकतान्त्रिक गणतन्त्रात्मक मुलुकया रुपय् विश्वय् परिचित जुइधुंकूगु दु । नेपाःया संविधानसभाया निर्वाचनयात विश्वं नमूना निर्वाचनया रुपय् स्वीकार नं याःगु खः । तर विडम्बना धायेमाली झीसं हे त्याका छ्वयापिं नेतातय्गु अदुरदर्शिताया कारणं थौं झीसं नेवाःतय्सं बली बीत मू हायेका तयेधुंकूम्ह दुगुचा सरह जुइगु बाहेक छुं छाय् याये मफु तर थुलि धायेवं थ्व पंक्तिकार नं थ्व विषयपाखें अछूट जुयाः च्वने फइ मखु । दायित्व जिगु नं दु । छिगु नं दु ।

झी सकसिगुं दायित्व खः । आः झी झी जुयाः न्ह्याः वनेगु थुकी याकःबाकः वा निम्ह प्यम्ह जक जानाः संगठित जुयां अःखतं मार नये माले फइगु सम्भावना प्रवल दु । उकिं छगू बल्लाःगु धिसिलाःगु माल धाःसा 'नँ यात नं हे चाइ' धाःथें शक्ति ब्वये फइगु शक्तिया निर्माण जुइमाः थुकिया नेतृत्व नेवाः मुक्तिया लागिं अन्तिम ई तक नं सर्वस्व बिना समर्पित जुइगु क्षमता दुम्ह जुइमाः । अले नेवाःतय्सं नं थज्याःम्ह नेतायात माक्व सेवा सुविधा एवं सुरक्षा बियाः नेता माने याना तयेगु धइगु अनन्त काल तकया प्रतिवद्धता दयेमाः । तर साप हे मछालापुसे च्वंगु खँ गुलि नं नेवाः नेता धाःपिं दु उपिं सुयाकें नं थुलि ग्यंगु क्षमता व चेतनाया विकास जूगु खने मदु ।

थौं जातीय स्वशासनया आधारय् नेवाः राज्यया माग जुयाच्वंगु दु । खय्त ला मेमेगु नं माग जुयाच्वंगु दु । नेवाःतय्सं थें मेमेगु जातजाितं नं थःथःगु हक अधिकारया माग यानाच्वंगु दु । तर थुकथंया अमानवीय घटना नेवाः राज्यय् हे जुइगु धइगु थ्व छगू कथंया नेवाः नेवाः ल्वाकेगु हरेक षडयन्त्रया मुख्यगु षडयन्त्र मध्येया छगू खः । 'क्राइम केसु खः झी नेवाः न्ह्यलुवातय्सं गम्भीर रुपं बिचाः यायेगु कि मयायेगु झीत गुगंु नं इलय् गुगं' नं कथंया कारणं जुइ फइगु वज्रपातया सामना स्वयं थःथम्हं हे यायेमाः छिगु शरणय् ग्वाहालि बीपिं सुं न्ह्यःने वइ मखु । धायेत्यनागुया शाब्दिक अर्थ छिं सिउगु हे जुइमाः हलू धायेधुंकाः कुतिं न्यानाच्वने माली मखु ।

१९ दँ दुम्ह विराटनगर निवासी जुयाः नं अध्ययनया झ्वलय् अनामनगरय् च्वनाः कालिमाटीया जुबिलियन्ट कलेजय् १२ तगिमय् ब्वनाच्वंम्ह मय्जु ख्याती श्रेष्ठया गुगु पाशविक हत्या जूगु दु थ्व हत्या आः तक नेपालय् जूगु अनेकन हत्याकाण्ड वा २०४६ सालया जनआन्दोलननिसें जूगु आन्दोलन जक मखु १० दँया माओवादी जनयुद्ध व मेमेगु कालखण्डय् जूगु अमानवीय हत्याकाण्ड मध्यय् दकलय् पाशविक हत्याकाण्ड खः । छम्ह मनूया म्हया थीथी ब्व उखेंथुखें लुइकेगु धइगु गुलि पाशविक ख्यातीया सीम्हया ब्व व नं ल्हाः तुति व छ्यो मदुगु सीम्हया लापाँय् यलया बुंगय् लुया वयेगु अले ल्हाः तुति चितवनय् । छ्यों येँया गोलढुंगाया जंगलय् लुया वइगु धइगु गुलि पाशविक थ्व छम्ह स्वस्थ दिमाग दुम्ह मनुखं बिचाः याये फइगु विषय मखु ।

प्रधानमन्त्री माधवकुमार नेपालं नेपाःया शान्ति सुरक्षा तसकं बल्लाः धकाः अभिव्यक्ति बिउगुयां कन्हय् कुन्हु हे समाचार सम्प्रेषण जुइ - १७ न्हु न्ह्यः पुतलीसतकं अपहरणय् लाःम्ह ख्याती श्रेष्ठया कुचा कुचा थलातःगु सीम्हया छुं ब्व यलय् लुयावल । आः थुकिं प्रधानमन्त्रीया अभिव्यक्तियात बांलाःगु हे न्ह्यसः थना बिउगु दु । छम्ह सीम्ह स्याना बिउम्ह मनूया शरीरया कुचात यलय् येँय् व चितवनय् लुयावयेगुली शान्ति सुरक्षां गुलि भूमिका म्हितूगु दु ?

नेवाःत प्रति ब्वलंगु न्ह्यसः मेगु नं दु । झी थौं झीगु अवस्था प्रति सुरक्षित जुइ मफया वनाच्वंगु इलय् गम्भीरता क्यनाः हे सहलह ब्याकेमाःगु दु । उकिया निंतिं झीगु भविष्यया सुरक्षाया लागिं झी न्ह्यलुवा न सकि्रय जुइमाः । थथे जुइ मफुत धाःसा झीपिं छम्हं मेम्हेसिया न्हिथंया शिकार जुया च्वनेमाली ।

झीसं झीगु भलोया लागिं कर्पिंत दोष मबिया । विगतय् छु गथे जुल झीगु वा मेपिं सुयागु भूल थुइका सुधार याये अले सचेत नं जुइमाः झीपिं । आः थन वंगु छुं ईनिसें स्वनिगःयात प्रमुख केन्द्रविन्दु दयेकाः आक्रमण अपहरण लुटपात डकैती आदि थेंजाःगु थीथी कथंया आक्रामक गतिविधित तच्वया वयाच्वंगु दु नेवाः लक्षित केन्द्रित जुयाः । उकिया उदाहरणया लागिं तःम्हमछि नेवाः अपहरणय् लाःगु वा मेमेगु कारणय् बेपत्ता घाइते सीगु इत्यादि घटना तच्वया वयाच्वंगु दु । थुकिया मू कारण मध्यय् दकलय् तःधंगु कारण खः झीपिं सचेत व संगठित जुइ मफुगु । ब्राम्हणवादयात जक पाः यानाः झीपिं हे द्यापं च्वने माली । झीसं झीगु गल्ती वा कमजोरीया दोष कर्पिंत बियां ठीक जुइ मखु । ग्वःम्ह नेवाःत थःपिनि विविध स्वार्थय् आपराधिक मनूतय्गु मारय् लानाः थथे थीथी यातना फये मालाच्वंगुया प्रमुख कारण हे झीपिं धिसिलाक संगठित जुइ मफुगुलिं खः । उकिं आः झी थवंथवय् संगठित मजुइगु खःसा मेम्ह नेवाः ख्यातीया नं थथे हे विभत्स हत्या जुल धाःगु समाचार रेडियोय् न्यनेगु पत्रिकाय् ब्वनेगु अले टेलिभिजनय् स्वयेगु बाहेक मेगु झीसं छुं नं याये मफइगु स्थिति निश्चित दु ।

More Stories Like this