खालि वक्तव्य जक

सम्पादकजु,

छुं न्हि न्ह्यः विराटनगरय् छेँ जुयाः येँया अनामनगरय् च्वनाच्वंम्ह नेवाः म्ह्याय्मचा ख्याली श्रेष्ठयात अपहरण यासें हत्या याःगु बुखँ साचार माध्यमय् बय्बय् जुल । वीरेन प्रधान श्रेष्ठ नांम्ह कुख्यात व्यक्तिं ख्याती श्रेष्ठया विभत्स ढंगं हत्या याःगु खः ।

हत्या जूगुया १७ न्हु लिपा प्रहरी प्रशासनं थीथी थासं ख्याती श्रेष्ठया ल्हाः तुति लुइकल लिसें बल्ल बल्ल छ्यों नं लुल । अपराधी वीरेन प्रधान व मू ग्वाहालिमि मेरिना शाक्ययात ज्वंगु दु । थ्व खँयात कयाः विद्यार्थी लगायत आम जनता सतकय् कुहां वयाः कालिमाटी बन्द तकं यात । थीथी पत्रिकापाखें फाँसीया माग तकं जनतां याःगु दु । थज्याःगु विभत्स घटना जुइधुंकल नं नेवाःतय्गु सरोकार क्यनीगु नेवाः देय् दबू लगायत मेमेगु संस्थां धाःसा भतिचा हे सरोकार क्यंगु खने मंत । ने.सं. ११२९ दिल्लाथ्व ३ कुन्हु बल्ल नेवाः देय् दबूपाखें प्रेस विज्ञप्ति बियाः हत्यारायात कार्वाही यायेमाःगु माग यासें बरामद जूगु ध्यबा सम्बन्धित निकाययात लित बीगु माग यात । अले थीथी नेवाः संघ संस्थातय्सं न्ह्याबलें थज्याःगु भ्वं छकुति च्वयाः प्रेस विज्ञप्ति जक पित बियाच्वनीगु कि सम्बन्धित निकायय् वनाः धर्ना बीगु सशक्त कार्वाही न्ह्याकेगु नेवाः आन्दोलन थज्याःगु तालं गबलय् न्ह्याः वनी धइगु खँय् बिचाः यायेमाःगु अवस्था दु ।

आवंनिसें थज्याःगु ग्यानापुगु घटनात जुइबलय् प्रेस विज्ञप्ति छगू जक बियाः नेवाः संस्थात सुम्क च्वनेगु ज्या मयाये ।

- संघर्ष येँ ।


‍

More Stories Like this