थौं नं जुइ मफुत सहमित
बैठक स्थगित यानाः प्रचण्ड चितवनपाखे
येँ / (सन्ध्या टाइम्स)ताः ई न्ह्यवंनिसें अवरुद्ध जुयाच्वंगु सदन न्ह्याकेत थौं सरकारया नेतृत्व यानाच्वंगु एमाले कांग्रेस व माओवादी दथुइ च्वने धाःगु बैठक च्वने मफुत । माओवादी अध्यक्ष प्रचण्ड स्वनिगलं पिहां वनाच्वंगुलिं थौंया बैठक च्वने मफुगु खः धाःसां माओवादीं थःपिनि आन्तरिक तयारी मगाःगुलिं थौंया बैठक स्थगित याके बिउगु खँ सूत्रं धाःगु दु । माओवादीं बैठक स्थगित यायेत प्रमयात इनाप याःगु खँ प्रमया राजनीतिक सल्लाहकार रघुजी पन्तं कनादीगु दु ।
म्हिगः च्वंगु कांग्रेस एमाले व माओवादीया बैठकय् स्वगुलिं पार्टी थःथःगु अडानय् च्वंगुलिं थौं हाकनं बैठक च्वनाः सहमति कायम यायेगु कुतः यायेत्यंगु खः ।
सहमति दयेकेत माओवादीं राष्ट्रपतिया पलाः भिंकेमाःगु माग याना वयाच्वंगु दुसा एमाले व कांग्रेसं राष्ट्रपतिया पलाः बारे सहलह जुइ मफइगु अडान कयाच्वंगु दु ।
वंगु चैत्र १६ गते न्ह्याःगु संसदया बैठक शुरुइ कांग्रेसं अवरुद्ध याःगु खः । प्रधानसेनापतियात माओवादी सरकारं याःगु कारवाही लित कायेमाः धइगु माग यासें अबलय् कांग्रेसं सदन अवरुद्ध याःगु खः । आः माधव नेपालया नेतृत्वय् सरकार गठन जुइसातकि माओवादीं प्रधानसेनापति प्रकरणय् राष्ट्रपितं ल्ह्वंगु पलाः भिंकेमाः धइगु माग यासें सदन अवरुद्ध याना वयाच्वंगु खः । थ्व निगू पार्टीं याःगु अवरुद्धया कारणं थ्व स्वलाया दुने स्वन्हु जक संसदया बैठक च्वंगु दु ।
चिकुलाया अधिवेशन अवरुद्ध जुयाः आः तक क्वचायेके तकं मफुगु कारणं ताल्लाया अधिवेशन समेत च्वने फयाच्वंगु मदुनि । ताल्लाया अधिवेशन च्वनेगु ठेगान मदुगुलिं थुगु अधिवेशनय् पेश यायेमाःगु बजेट तकं इलय् मवइगु संकेत खने दयावःगु खँ सूत्रं धाःगु दु ।
वजेट अधिवेशन च्वनेगु खःसा १५ न्हु न्ह्यः हे आह्वान जुइमाःगु चलन दु । थ्व चलन कथं छुं जुयाः आः सहमति कायम जूसां नं सदन च्वनेगु ज्या धाःसा झिंन्यान्हु लिपा जक जुइ ।
बजेट अधिवेशन इलय् हे च्वने मफइगु जूगुलिं आः बजेट नं इलय् हे मवइगु जक मखु विकास निर्माणया ज्या तकं प्रभावित जुइगु सम्भावना अप्वया वनाच्वंगु खँ विज्ञतय्सं धाःगु दु ।
