मिखां मखंपिनि मिखा

कृष्ण

थः छम्ह कृषि विशेषज्ञ अन्वेषक व शिक्षक जुयाः नं राम बहादुर सिंह भेले मिखां मखंपिं मनूत नाप उलि हे भ्यले पुनेसःम्ह ब्यक्ति खः । ख्वपय् ला वय्कःयात मिखां मखंपिंसं मदर टेरेसा थें अभिभावक हे माने याइ । वय्कःया नेतृत्वय् मिखा मखंपिंत आखः ब्वंकीगु पूर्ण विद्या गृह नामं छगू विद्यालय हे चायेकातःगु दु । २०४६ सालय् नीस्वंगु मंगल साधन श्रोत परिचालन केन्द्रपाखें वय्कलं उगु विद्यालय चायेकादीगु खः । थौंकन्हय् उगु हे केन्द्रपाखें थःपिनि स्थापनाया २२ दँ बुन्हि लाकाः ख्वपय् मिखां मखंपिनिगु खुल्ला चेस कासा हे जुयाच्वंगु दु । वहे कासाया अवसरय् मिखां मखंपिनिगु सीप व ज्ञान ब्वयेकथं प्राविधिक विकास प्रदर्शनी नं जूगु खः ।ब्वज्याय् मिखां मखंपिंसं उत्पादन याःगु म्हुकंचा आखः च्वयेगु व ब्वनेगु खा लहीगु नापं ख्यें थ्वईपं खाया बाँझोपन पत्ता लगे यायेगु ज्या नं जूगु खः ।

रामबहादुर सिंह भेलें २०३८ सालंनिसें मिखा मखंपिनि संगत शुरु याःगु खः । कृषि विषय कयाः आइ।ए। पास यायेधुंकाः राम बहादुर जेटीए जुयाः २०३१ सालय् न्हापांखुसी छेँया कःसिइ हे म्हुकंचा सयेकादिल । न्हापा जेटीए तालिम कयाः कृषिलिसे सम्बन्धित जुयाः थीथी थासय् जागीर नं नयादिल ।

धादिङया जिल्ला कृषि विकास कार्यालयय् ज्या यायां हे वय्कलं २०४४ सालय् बैंककय् जूगु बाली संरक्षण सम्बन्धी अन्तर्राष्ट्रिय गोष्ठीइ ब्वति कयादिल । अथेहे २००१ अगष्ट ३० निसंे सेप्टेम्बर २ तक निजी खर्चय् वय्कलं कोरियाय् जूगु 'अइट इन्टरनेशनल साइनपिसन अन बुकुचेट'य् ब्वति कयाः दुसिमाय् दाइपिं कीया बारे अध्ययन यानादिल । अनंलि २०३० सालंनिसे ख्वपय् सरुवा जुयाः कृषि कार्यालयय् ज्या यानादीगु दु । २०३१ सालय् कःसिइ म्हुकंचा सयेके शुरु याये धुनेवं हे पाँचखालय् सुइ म्हुकंचा सयेकेगु नं शुरु यानादिल । थ्व ज्या शुरु जुइवं हे मिखां मखंिपं मनूतलिसे वय्कःया स्वापू नं शुरु जूगु खः ।

पीडित मनूतय्त थप पीडा बीगु स्वयां फुसा उमित छुं ग्वाहालि यायेमाः धइगु भावनां प्रेरित जुयाः वय्कलं न्हापा हे ख्वप तेखाचोया कृष्णगोविन्द चौगुठीया छेँय् कन्य नांगु जातया म्हुकंचा उत्पादन यानादिल । वय्कः थःहे छम्ह मिखा मखंम्ह ब्यक्ति जूगुलिं दृष्टिविहीनतय्सं नं थथे यायेफु धइगु पुष्टि यायेगु अवसर वय्कःयात चूलात । मिखां मखंपिंके झन अदृश्य क्षमता दइगु जुयाच्वन धइगु थुइकाः उगु हे क्षमतायात पिब्वयेगु वय्कलं संकल्प यानादिल । छगू संयोग हे धायेमाली कृषि कार्यालय तेखाचोपाखे हे जूगुलिं अन हे च्वंम्ह मिखां मखंम्ह कृष्णगोविन्द चौगुठीया मांम्हं पुसा माल धाः वःगु इलय् संयोगं जक वय्कः मिखां मखंपिनि संगतय् लाःगु खः । वयां लिपा ला अगःचा मालां देगःचा लुयावल धइथें कृषि उत्पादनय् द्रुत गितं विकास यानाः राष्ट्रियस्तरया प्रदर्शनीइ ब्वति कायेफुपिं कृषि उत्पादक कथं उमित तयार यायेगुली हे वय्कः लगे जुयादिल ।

ट्रलिबस गयाः येँय्या ज्याकुथी वनेगु इलय् नं सप्तसुन्दर शाक्य लगायतया मिखां मखंपिं विद्यार्थीतय्सं वय्कःयात छम्ह अभिभावक कथं प्रदर्शनीइ ब्वति काये माल धयाच्वनी । उकियात हे वय्कलं सकारात्मक रुपं कासें मिखां मखंपिंत गलैंचा थायेगु तरिका मैनमत दयेकेगु तरिका नापं चेस हितेगु तक स्यना बिल । नेपाःया न्हापांम्ह हिदाता दयावीरिसंह कंसाकारं २०४३ सालं परोपकार अनाथालयय् याःगु कृषि प्रदर्शनीइ ब्वति कयादिल । अथेहे सुरेश राजभण्डारी थेंज्याःम्ह नेत्रहीन ब्यक्तित्वं याःगु इनापं थःत तसकं प्रभावित याःगु नं वय्कलं कनादिल । वय्कःयात सुरेशं छम्ह लेखन सहयोगी दुसा थम्हं स्नातक तहया जाँच बीगु खँ कनादिल । 'अरे बाबा ब्वनेगु दु ब्वने नं जिउ तर उकिया जाँच धाःसा बी मजिउ ला ।' तर नेपालय् चले यानाः हे क्यने धकाः देवनागरी व रोमन लिपि नं सयेके फइगु कथंया मिखां मखंपिनिगु लागिं थःगु अलग्ग हे पाठ्यक्रम तयार यानाः बजारय् पित हयादिल ।

वय्कलं २०४४ सालंनिसें हे मिखां मखंपिंत आखः ब्वंकेगु शुरु यानादीगु खः । सुरेश राजभण्डारी नापं न्याम्ह नेत्रहीनतय्सं अबलय् आखः ब्वनेगु शुरु याःगु खः । व नं कृष्णगोविन्द चौगुठीया छेँय् हे शुरु जूगु खः । लिपा सुरेश राजभण्डारी ला आइ। एल। तक पास नं यानादिल । लिपा प्रचलित नेपाल लिपि स्यनेगु ज्याय् वय्कः निरन्तर सकि्रय जुयादिल । अले २०४६ असार १२ गतेनिसें २०४६ असार १९ गते तक नेपाल राजकीय विज्ञान तथा प्रविधि प्रज्ञा प्रतिष्ठानया ग्वसालय् भृकुटी मण्डपय् जूगु विज्ञान प्रदर्शनीइ कृष्णगोविन्द चौगुठीं अन सहभागी प्राज्ञ प्राध्यापक व सर्वसाधारणया नां दर्ता यायेगु ज्या कयाः सकसितं अजु चायेकाबिल । २०४८ सालंनिसें हे सीप शिक्षा बुद्धिचाल व ज्ञान बियाः मिखां मखंिपंत सक्षम यायेगु ज्याय् सकि्रय जुयाच्वंम्ह रामबहादुर सिंह भेले विद्यार्थी निकेतनय् मंगल साधन श्रोत केन्द्रपाखंे हे पूर्ण विद्यागृह चायेकाः मिखां मखंिपंत स्वाबलम्वी दयेकेगु झ्वलय् लाइब्रोटरी मावि आदर्श मावि थिमि पद्म कन्या क्याम्पस संजिवनी मावि नापं थीथी विद्यालय व कलेजया विद्यार्थीतय्त नं तालिम बीगु यानाच्वंगु दु ।

More Stories Like this