लाल किल्लां क्वःथल नेवाःतय्त
सम्पादकजु,
२०५६ साल जेठ १८ गते नेपालभाषायात सरकारी ज्याखँय् छ्यले दइ मखु धकाः सर्वोच्च अदालतं बुका हल । उल्सांनिसें हरेक दँया जेठ १८ गतेयात हाकुगु न्हि धकाः हना वयाच्वना । ०५६ सालया चुनावय् नेवाः नेवाः ल्वाकाः खस ब्रँम्हणतय्सं लबः काल । अबले नं तीनै जिल्ला लाल किल्ला धकाः नारा थ्वयेकाः एमालेया बिजय जुलुसय् झी नेवाःतय्सं हे ब्वति काल । थौं झीगु हे नेपाः राष्ट्रिय पार्टी दत । ०६४ सालया संविधानसभाया चुनावय् ब्वति काल । चुनावय् नेवाःतसें नेवाःतय्त त्याके मफुसां समानुपातिकं छम्हसां सभासद् त्याना वन । चुनावय् झी नेवाःतय्सं राजावादीतय्त नं त्याकेगु ला धकाः खस ब्राम्हणवादीतय्त त्याकल । मेमेगु पार्टीं त्याका वंपिं नेवाःतय्सं नं नेवाःतय्त छुं मयात । चुनाव न्ह्यः धाःगु खँ दक्व नुना छ्वत ।
वंगु जेठ १८ गते नेवाःतय्सं नेपालमण्डल बन्द यात । बन्दया झ्वलय् नं मेमेगु पार्टीया नेवाः नेतात कुहां मवः । मेबलय् जूसा नेवाःतय् लागिं व याये थ्व याये धया जुइपिं पार्टीया नेवाः नेतात नं वकुन्हु सतकय् वःगु खने मदु । कुलेश्वरय् च्वंगु फलफुल पसः तिकः वंपिं निम्ह प्यम्ह पासापिंत पुलिस व गुण्डात जानाः दाया हल । झी नेवाःत मिले मजूगु कारणं अथे हप्ता कयाः नइपिं पुलिसतय्सं तकं नेवाः धाल कि सह मयाःगु खः । आः वयाः झीगु जात्रा पर्वय् नं पुलिसतय्सं छाय् हमला यात ? आः हानं नेवाःतय्गु लागिं नेवाःत मदनिगु खःसा जेठ १८ या नेपालमण्डल बन्दया झ्वलय् थें तमासा स्वयेगु खःसा क्वथा प्वालय् च्वनाः तास जक म्हिता च्वनेगु खःसा छन्हु बालं च्वंम्हेस्यां छेँथुवाःयात पितिनी तिनि ।
अथे ला नेवाःत गालय् च्वनाः नं ल्हाः निपा धाःसा बांलाक हे संके सःपिं खः । थनया टेकु दुवातय् आकाशे ताँ पुल तये धकाः मेयर केशव स्थापित वःबलय् अन च्वंपिं निम्ह स्वम्ह मनुखं विरोध यानाः ताँ हे तयेके मबिउ । आः ह्यूमतया लँ पिच यायेत नं अथे हे जुयाच्वंगु दु । छन्हु लः मवल कि गाः म्हुइ मदइ धकाः । यदि झी थज्याःगु हे विरोधय् जक तक्यना च्वनेगु खःसा झीगु उत्थान गबलय् जुइ ?
- रकि प्रजापति, येँ ।
More Stories Like this
केन्द्रया अनुमति कयाः आर्थिक ज्या जुइ मखु प्वंकेमखंगु श्रद्धांजिल सुवर्ण शाक्य कि सुवर्णकेशरी ? लाःलाःथें भाःथकाये मजिल बांलाःगु सुझावयात सुभाय्
