सदन चले यायेत २४ दल
माओवादीया माग नं २४ दलय् तइगु
येँ / (सन्ध्या टाइम्स) संसद न्ह्याये मफयाः पिहां वयाच्वंगु गतिरोध मदयेकेत थौं संसदय् दुथ्याःगु २४ दलया मंकाः बैठक च्वनेत्यंगु दु । सरकार पक्षं संसद सुचारु यायेमाल धकाः यानाच्वंगु इनाप व विपक्षी माओवादीं राष्ट्रपितं याःगु ज्या भिंकेमाः धकाः यानाच्वंगु मागयात २४ दलया बैठकपाखें ज्यंकेगु धइगु ताः तयाः थौंया बैठक सःतूगु खः ।
सूत्रतय्सं बिउगु जानकारी कथं प्रधानसेनापति प्रकरणय् राष्ट्रपितं याःगु ज्यायात सुधार यायेमाः धकाः माओवादीं यानाच्वंगु मागयात छु यायेगु धकाः नं २४ दलया बैठकं हे निर्णय यायेगु सहमति पार्टीतय् दथुइ जूगु दु । २४ दलया बैठक न्हिनय् च्वनेगु धकाः क्वःछिनातःगु खःसा उकिया तयारीया निंतिं सुथय् हे सत्तारुढ पार्टीत एमाले व कांग्रेसया नेतातय् दथुइ बैठक च्वंगु दु ।
उखे थौं संसद दिवसया लसताय् जूगु ज्याझ्वलय् न्ववासें प्रधानमन्त्री माधव नेपालं संसद सुचारु जुइ मफयाः नागरिक सर्वोच्चता कायम याये मफयाच्वंगु खँ धयादीगु दुसा उकिया लिसलय् माओवादीया नेता डा. बाबुराम भट्टराईनं राष्ट्रपितं द्वैध शासन लागू यायेत स्वःगुलिं नागरिक सर्वोच्चताय् लिच्वः लाःगु खः धासें थुकियात सच्चे यायेसातकि संसद नं याउँक सुचारु जुइ धयादिल ।
संसद चले याये मफयाः चिकुलाया अधिवेशन हे आः तक सिधयेके फयाच्वंगु दुसा असार थ्यंगुलिं ताल्लाया अधिवेशन सःतेगु ई त्ययेधुंकूगु दु । संसद च्वनीगु हे ठेगान मदुगुलिं बजेट छु यायेगु धइगु नं अन्यौल जुयाच्वंगु दु ।
