शान्ति सुरक्षा ग्व ?

कृष्ण प्रजापित

देशय् न्हूगु सरकार वयाः न्हूम्ह गृहमन्त्री वसांनिसें झन झन हे शान्ति सुरक्षा खतम जुया वनाच्वंगु दु । गृह मन्त्री भिम रावल कुर्सी च्वनाः क्वाके तकं मलाःनिवं हे देशय् मस्त व मिसा अपहरण व हत्या थेंज्याःगु घटनां थाय् कयाच्वंगु दु । आः ला सुं अपरिचित मनू जक थः लिउने वःसां अपहरणकारीं पीछा यात लाकि छु धकाः शंका याये मालीगु अवस्था वयाच्वंगु दु । वास्तवय् देशय् सुं हे नागरिकं थःत असुरक्षित तायेकेगु वातावरण वये मजिउ । ढुक्क जुयाः थःगु दैनिक जीवन निर्वाह यायेगु अधिकार झीत दयेमाः । तर थन ला छगू थासं मेगु थासय् वनेत म्हिगः जुजुया एकलौटी शासनकालय् सेना व प्रहरीया चेकिङ खनाः ग्यायेमाः थें थौं सुं मनू वयाः थःत अपहरण याइगु खःला धकाः ग्यायेमाःगु स्थिति दु । थ्व अमनचयन कायम याये मफुगुली मू दोष सरकारया हे खः ।

थन अपराधी बलात्कारी घूस नयाः तःमि जुइपिं व लुटेरात खुल्लम खुल्ला चाहिलाच्वंगु दु । उमित छुं नं कथंया नियन्त्रण व निर्मूल यायेगु ज्याझ्वः वर्तमान सरकारं हये फयाच्वंगु मदु । छगू भ्रम नेपाली जनतायात दु व खः देशय् गणतन्त्र वल आः झी स्वर्गय् च्वने थें नये त्वने व द्यःने खनीगु जुल । तर थ्व वास्तविकता मखु । म्हिगः गथे देशय् पुँजीवादी प्रजातन्त्र लागू जुयाच्वंगु खः थौं नं धनी धनी हे जुयाच्वनीगु व गरीब गरीब हे जुयाच्वनीगु कथंया पुँजीवादी ब्यवस्था हे लागू जुयाच्वंगु दु । ज्या याईपंत उचित सम्मान व कदर याइगु ब्यवस्था थुगु गणतन्त्र धाःगु ब्यवस्था नं मखुनि । गणतन्त्रं नेपाली जनताया स्वतन्त्रताया प्याःचाः लंकेफुगु मदु । बरु गणतन्त्रया निफुति लखं ला झन जक उमित सागरया लः त्वने माःगु थेंज्याःगु प्याःचाः जक अप्वयेका बिउगु दु ।

ल्यासेम्ह म्ह्याय्मचा अपहरण व हत्या जुलं नं अपराधी म्हसीके मफइगु थ्व देश । अले अनेक जुक्ति मिले यानाः बल्लबल्ल अपराधी लु हे लुइकूसां वयात कारवाही याकेत मेगु दवाव बीमाःगु देश । अथे जुयाः हे अप- हरणया हल्ला जक जूगु इलय् नं यलया वादेय् कफ्र्यू हे तये मायेक तनाव जूगु खः । सरकारं सुं अपराधीयात कारवाही याइ मखु धइगु सीकाः हे जनता स्वयमं अपराधी व खुँतय्त ज्वनाः दायेगु क्रम शुरु जूगु खः । यदि पुलिसयात लःल्हायेवं उचित सजायँ उमिसं हे बी धइगु ग्यारेन्टी दुगु जूसा मनूतय्सं अःपुक हे खुँ ज्वनाः पुलिसयात लःल्हायेगु वा पुलिस चौकी तक अपराधीयात ज्वनाः तये यंकीगु खः । थज्याःगु आवश्यक परिपाटीया विकास झीगु प्रशासनय् मदुनि । प्रशासनं खालि सरकारी तलब नयाः झारा तरे यायेगु ज्या यानाच्वंगु कारणं हे प्रहरी प्रति विश्वास तकं मदया वनाच्वंगु दु । थ्व बांलाःगु खँ धाःसा अवश्य नं मखु ।

देशया शान्ति सुरक्षा व उन्नतिया नारा थ्वयेकाः सत्ताय् थ्यंपिं गुलिं राजनीतिक पार्टीतय्सं हे तस्करतय्त साथ बीगु उमिगु खँयात न्ह्याथे यानाः नं हुबहु लागू यायेगु व सरकार स्वयां सर्वोच्च स्थानय् अज्याःपिं माफीयातय्त तयेत स्वःगुलिं नं भयानक स्थिति सृजना जुयाच्वंगु खः । गन अपराधी व गुण्डातय्त तह लगे यायेगु कानून दइ मखु गन अराजक मनूतय्सं देश चले यायेत स्वइ उगु देश भज्यंक स्यनीगु स्वाभाविक खः । थौं अथे हे जुयाच्वंगु दु । तस्करतय् साथ मदयेक सरकार हे मन्ह्याइगु थें जुयाच्वंगु दु । ब्यापारया नामय् हाकुबन्जाः याईपंसं धाःधाःथे भाः थकयाः सरकारं उमिगु गुलामी यानाच्वंगु दु । इमान्दार ब्यापारीतय्गु स्वयां नं विदेशी दलाल जुयाच्वंपिं तःधंपिं ब्यापारीया नामय् तस्करी ज्या यानाच्वंपिं मनूतय् कुचक्रय् लानाच्वंगु दु । अथे जुल धायेवं सरकारं जनतायात दुग्यंक ग्वाहालि यानाः उमिगु उन्नति व विकासय् माक्व इमान्दारीपूर्वक ज्या याये मफइगु स्वाभाविक खः ।

झीगु देशय् ताः ई न्ह्यवंनिसें हे गृह प्रशासनयात गुलि सवल ढंगं यंकेमाःगु खः उलि यंके फयाच्वंगु मदु । बुद्धि विवेक छ्यलाः थीथी कथंया प्रविधि नालाः वा मनूत परिचालन यानाः जूसां अपराधी पत्ता लगे यायेगु उमित निरुत्साहित यायेगु व उचित सजायँ बीगु ज्या यायेमाःगु खः । तर शान्ति सुरक्षा थुलि छ्वासुया वनाच्वनां नं थन प्रहरी बांलाक परिचालन जुइ मफुगु जक मखु कि प्रहरीयात खुँ ज्वनाः हे लःल्हाना बिउसां घूस नयाः त्वःतेगु यानाच्वंगु दु । घूस नईपं नं प्रहरी जुयाच्वंगु दु । प्रहरीं घूस हे नयाः अपराधीयात निरपराधी यायेत स्वःगु ज्वलन्त नमूना आः नकतिनि हे जक कान्तिपुर टेलिभिजनं क्यन । थुकथं थीथी इलय् पत्रपत्रिकाय् प्रहरी प्रशासनया कमजोरी बारे खँ पिहां वयाच्वंसां उमित कारवाही यायेगु बारे गृह मन्त्री व गृह मन्त्रालयं ध्यान तःगु खने मदु । नापं शान्ति सुरक्षाया जिम्मेवारी कयाच्वंपिं गुलिं मनूत थः हे मेपिंत दुःख बीपिं व अशान्ति न्यंकः जुईपं जूगु कारणं नं थन उचित ढंगं शान्ति सुरक्षा कायम याये मफयाच्वंगु खः ।

शान्ति सुरक्षा व अमन चयन कायम यायेगु सरकारया न्हापांगु दायित्व धाइ । तर भिम रावल गृहमन्त्री जुयाच्वंगु इलय् हे थौं न्हियान्हिथं अपहरणया खँ वयाच्वंगु दु ।

तराई लागाय् अपहरणया आशंकाय् मनूतय्त दायेगु स्यायेगु तकं यानाच्वंगु दु । थ्व धइगु मन शान्त मजुइगु विषय खः । सुं मनूत शान्त मन मदयेकं आत्मविश्वास अप्वयेकाः ज्या याये फइ मखु । कुण्ठित जुयाः ज्या याना च्वने माःगु अवस्थाय् गबलें नं गतिलाक ज्या याये फइ मखु । उकिं मनूतय् आत्मविकास व देश विकासया न्हापांगु आधार धइगु ग्याःचिकु मदयेक च्वनेगु वा अमन चयन कायम यायेगु खः । वर्तमान सरकारं थथे याये फयाच्वंगु मदु । उकिं गृह मन्त्रालय व गृह प्रशासनयात सवल यानाः देशय् शान्ति सुरक्षा कायम यायेगुली सरकारं न्हापांगु ध्यान तयेमाः । अले जक देश विकास यायेगु स्वास्थ्य सेवा बांलाकेगु शिक्षा रोजगार नापं थीथी मेमेगु विकास निर्माणया ज्या न्ह्यज्याकेगु ख्यलय् नं सरकारं थःगु पलाः च्वन्ह्याका वनेफइ ।

More Stories Like this