माओवादी दुने 'जनविद्रोह' विवाद
अध्यक्षया प्रस्तावय् चाःहिकाः जनविद्रोह
येँ / (सन्ध्या टाइम्स) नेकपा माओवादीया पोलिटब्यूरो बैठकय् थौं अध्यक्ष पुष्पकमल दाहाल 'प्रचण्डं' थःगु राजनीतिक प्रतिवेदनय् पोलिटब्यूरो दुजःतय्सं न्यंगु थीथी न्ह्यसःया लिसः बीगु ज्या न्ह्यानाच्वंगु दु । माओवादी मजदुर संगठनया ज्याकू कोटेश्वरय् थ्व बैठक न्ह्यानाच्वंगु खः ।
अध्यक्ष प्रचण्डया प्रतिवेदनय् न्हूगु संविधान निर्माण नागरिक सर्वोच्चता व राष्ट्रिय सरकार गठनयात थःगु मूल कार्यनीति दयेकातःगु खँ माओवादी सूत्रं धाःगु दु ।
वंगु छुं न्हि न्ह्यवंनिसें न्ह्यानाच्वंगु पोलिटब्यूरो बैठकय् अध्यक्षया प्रतिवेदनयात कयाः सहलह जुयाच्वंगु खः । अध्यक्षया प्रतिवेदनय् आपालं दुजःत सहमत जूसां नं मोहन वैद्य किरण पिंसं जनविद्रोहया नीति नालेमाःगु अडान कया वयाच्वंगु खः ।
वैद्यं पक्ष थःपिनि खँयात नं दुथ्याकेमाःगु अडान कायेवं म्हिगः अध्यक्ष प्रचण्डं थःगु प्रतिवेदनय् तप्यंक जनविद्रोहया खँ न्ह्यमथँसे जनविद्रोहया हे भाव वइ कथंया शब्दावली छ्यःगु खँ माओवादी सूत्रं धाःगु दु । सूत्रया कथं अध्यक्षया प्रतिवेदनय् तप्यंक जनविद्रोह मधासे उकियात चाःहिकाः जक धयातःगु दु ।
वैद्य पक्षं थःपिनि अडान कायम यायेवं म्हिगः च्वनेमाःगु माओवादीया बैठक स्थगित यानाः वैद्य पक्षया अडानयात गुकथं संवोधन यायेगु धइगु बारे अध्यक्ष प्रचण्डं सहलह यानाः वैद्य पक्षया खँयात नं दुथ्याकादीगु खः ।
माओवादी दुनेया छथ्वः नेतातय्सं तत्काल जनविद्रोहया नीति ज्वनेमाःगु अडान कयाच्वंगु खःसां नं प्रचण्ड पक्षया नेतातय्सं धाःसा वर्तमान राजनीतिक अवस्थाय् तप्यंक जनविद्रोहय् वने मजिउगु खँ धायेगु यानाच्वंगु खः ।
माओवादीया थुगु बैठकयात एमाले व कांग्रेस लगायतया राजनीतिक पार्टीतय्सं धाःसा अर्थपूर्ण रुपं स्वयाच्वंगु दु । <
उखे माओवादीं न्ह्याकाच्वंगु सतक व सदनया आन्दोलनया कारणं ब्वलनाच्वंगु राजनीतिक अवरोधयात कयाः थौं प्रधानमन्त्री माधव नेपालं अध्यक्ष प्रचण्डलिसे सहलह यायेगु कुतः यानाच्वंगु खँ सीदुगु दु ।
माओवादीया आन्दोलनं यानाः सरकार तकं बांलाक न्ह्याके मफयाच्वंगुलिं प्रमं माओवादीलिसे थौं सहलह ब्याकेत्यंगु खःसां ई धाःसा क्वःमजिउनि ।
