नेवाः राज्यया खँय् ध्यानाकर्षण
स्वायत्त राज्य बीत समिति सकारात्मक
येँ / (सन्ध्या टाइम्स) नेवाःतय्त नेवाः स्वायत्त राज्य बीगु निंतिं राज्य पुनः संरचना तथा शक्ति बाँडफाँड समिति सकारात्मक जूगु खँ समितिया अध्यक्ष लोकेन्द्र बिष्टं धयादीगु दु ।
थौं सुथय् नेवाः स्वायत्त राज्य मंकाः संघर्ष समितिपाखे नेवाः स्वायत्त राज्य दयेकेमाःगु माग यासे लःल्हाःगु ज्ञापनपत्र लःल्हाना कयादीगु झ्वलय् वय्कलं उगु खँ धयादीगु खः ।
वंगु जेठ १८ गते नेवाःतय्सं नेपालमण्डल बन्द यायेवं हे नेवाः स्वायत्त राज्यया बारे थःपिनि ध्यानाकर्षण जूगु खँ कनादिसे वय्कलं नेवाः स्वायत्त अधिकार बीत सहलह जुयाच्वंगु खँ नं कनादीगु दु । वय्कलं थिनंनिसें हे नेवाःतय् अधिकारया बारे थप सहलह न्ह्याकेगु बचं नं बियादिल ।
संघर्ष समितिया सल्लाहकार प्रा. माणिकलाल श्रेष्ठं अध्यक्ष बिष्टयात ज्ञापनपत्र लःल्हाःगु खः । उगु इलय् नेवाः राष्ट्रिय मुक्ति मोर्चाया महासचिव पवनमान श्रेष्ठ, सभासद् व नेपाली कांग्रेसया नेता तीर्थराम डंगोल, नेपाः लोकतान्त्रिक नेवाः संघया नायः सानुराजा शाक्य, नेवाः न्ह्यलुवाया नायः नरेशवीर शाक्य व देय् दबूया संरक्षक मल्ल के. सुन्दरिपंसं नेवाःतय्त केन्द्रीकृत राज्यय् तये मजिउगु खँय् बः बिसें नेवाः स्वायत्तता व जातीय अधिकारया बारे थःपिनि धापू तयादीगु खः ।
ज्ञापनपत्रय् ऐतिहासिक आधारय् प्राचीन नेपालमण्डल क्षेत्र दुने नेवाः स्वायत्त राज्य स्वनेमाःगु ऐतिहासिक कालनिसें नेवाःतय्सं बसोबास यानाच्वंगु नेवाः बाहुल्य क्षेत्रयात नेपालमण्डलय् दुथ्याकेमाःगु नेवाः स्वायत्त राज्य दुनेया जल, जंगल व जमिनय् नेवाःय् अग्राधिकार दयेमाःगु नेवाःतय् पुर्खाया किर्तिया रुपय् ल्यनाच्वंगु दक्वं सांस्कृतिक सम्पदाय् नेवाःतय् अग्राधिकार दयेमाःगु
राज्यया दक्वं अंग तह व शिक्षा संचार क्षेत्रया अधिकारिक भाषाया अधिकार नेपालभाषा जुइमाःगु लगायतया झिंस्वंगू बुँदे ज्ञापनपत्र समितियात लःल्हाःगु खः ।
