नेवाः झी नेवाः हे जुइ सुयां न्हिप्यं मजुइ

तीर्थमान महर्जन

स्वनिगः व स्वनिगलंपिने च्वनाच्वंपि जुसां नेवाः झी नेवाः हे जुइ । झी सुं खनां नं ग्याना च्वनेम्वाः । अथे धकाः झी मग्याःसे च्वंच्वनागु मदु झी ग्यानाः च्वनाच्वनागु दु । वास्तवय् धायेगु खःसा स्वनिगलय् च्वनाच्वंपिं नेवाःतय्त गनं गनं वयाच्वंपिं गैर नेवाःतय्गु हेपे यायेत स्वयाच्वंगु दु । थुकिया दसु खः खय ब्रम्हूतय्सं झी नेवाःतय्त पुलिस आर्मी व प्रशासनय् दुत मकाये धुंकल । झीत थुमिसं ग्याःपिं काथर धायेगु यानाच्वंगु दु । यदि झीत प्रशासन ख्यलय् दुकाल धाःसा न १०० म्ह ५ म्ह जक हे नेवाःत दइथंे च्वः ।

लोकसेवा आयोगया हे दसु कायेगु खःसा नेवाःत जक मखु मेमेगु जनजातियापि मनूत नं म्हो हे जक खनेदु । झी नेवाःत तसकं सोझा सोझा जक मखु कि झिके दया माया नं दु । अथे हे राजनीतिइ नं स्वयेगु खःसा झी लिउने हे ला । खतुं तुल्सीलाल अमात्य, कृष्णदास श्रेष्ठ, विष्णुदास मानन्धर, गणेशमान सिंह, स्व. पुष्पलाल श्रेष्ठ, सिद्धिलाल, नारायणमान बिजुक्छे आदि नेवाः नेतात हे खः । अले थुपिं नेवाः नेतातय्गु चाकरी यायां खय ब्रम्हूत उच्च पदय् थ्यंकाच्वंगु दुसा झी नेवाःत गन च्वय्यागु पदय् वने त्यने धाःसा थुमिस विरोध यायेगु ज्या यानाच्वंगु दु ।

झी नेवाःत सुयागु हे चाकरी चाप्लुसी मयाईपं । माधवकुमार नेपाल पार्टीया महासचिव तकं राजिनामा बीधुंकूम्ह कम्युनिष्ट पार्टीया हे कलंक जुइ धुंकूम्हेस्यां हे छम्ह नेवाः सभासद्……अमात्ययात चीकेत चाल म्हितलं धइगु खँ झीसं मसिउ । तर झीसं बिचाः यायेमाः छम्ह ब्रम्हु नं छाय् नेवाः सभासदयात हे पदं त्वःतकाः थः सभासद् जुयाः प्रधानमन्त्री तकं जुल । छाय् खय ब्रम्हुयात मत्वःतल थुकी झी नेवाः सभासद् नेतातय्सं थुइके माल व पद त्वःता बिउगु वापत वय्कः भाजुयात छु दत ?

निथाय् निथासं चुनावय् बुम्ह मनूयात प्रधानमन्त्री दयेकलासा गुलिं नेतात बुउसां नं मन्त्री यात । थुकी सम्पूर्ण जनताया अपमान याःगु दु । गुलि डकैती व हत्याया मुद्दा लापिं नं मन्त्री दयेकूगु दु । उकिं झी जनजाति आदिवासीतय्सं थुइके माल कि चुनाव धइगु मयासां जिल ।

झीस पुलागु करं झीगु थःगु थाय्या विकास याइगु खःसा जक कर पुलेमाः मखु धइगु खःसा झीसं थुकी बिचाः यायेमाःगु दु । कि झीसं पुलागु ध्यबाः गन वन खाली मन्त्रीतय्त सभासदतय्त भत्ता नकेगु व गाडी गयेका जक तयेगु ला जब कि थुपि चुनावय् त्याये न्ह्यः वा चुनावय् त्यानाः थन स्वनिगलय् दुहां वःबलय् गुलिखे नेतातं चप्पल न्ह्याना जुइपिं खः । तर थौकन्हय् थुमिगु थन हे महल दु । बंगला दु । गाडी दु । छु छु दु । झीसं सीकेमाः ।

जनतायात न्ह्याबलें झंगः लानाः घ्यलं न्यकुताथें तानाः नेवाः नेतातय् चाकरी यायां हे थुपि थन च्वय्या पदय् थ्यंगु खः । अथे जुयाः थुमिगु आनीबानी सीका थुमित झीसं ताइनाई घ्वाइन्याइ न्यायेका छ्वयेमाःगु दु ।

झीगु स्वनिगलय् वयाः झीगु व्यापार व्यवसाय व लजगा आर्थिक सांस्कृतिक ख्यलय् तकं थुमिसं झीत क्वत्यलेत स्वयाच्वंगु दु । थुकिया दसु खः झीगु साँस्कृतिक जात्रा पर्व ल्वापु यायेगु बन्द यायेगु बजार बन्द चक्का जाम यायेगु तक यानाच्वंगु दु । थुकि झी ग्यानाः खः वा मग्याना नं बाध्यतवस थौंकन्हय् न्ह्याम्हेसिनं बन्दया आह्वान यात धाःसा बन्द हे यायेमाःगु अवस्था वःगु दु ।

पसः फुटपाट तइपिनं म्वः म्वः दयेधुंकलसा थुमित रत्नपार्क भृकुती मण्डपय् थाय् बिउसा नं गुलि सडक गल्ली तकं थुमिस पसः तयाच्वंगु दु । थुमित व पसः मतयेकेत न्हापा भृकुती मण्डपय् थाय् बिउगु खःसा आः हानं फुटपाट पसःत अप्वया वनाच्वंगु दु । रत्नपार्कया फुटपाट पसः तयेत खुल्ला माच न्ह्यःने थाय् बिउसा नं थुपि हाकनं असं भोताहिती रत्नपार्क न्हू सतक आदि थासय् पसः तयाच्वंगु दु । थुमित चीकेत सरकारं छु नं मस्वः । छाय् धाःसा थुपिं दक्व पिनेयापि मनूत खः । जब कि थन हे च्वनाः खमु कुबियाः मीम्ह ज्यापू दाजुपिंत गनं खन कि प्रहरीं चीकेत स्वइ । थुकथं झी नेवाःतय्गु व्यापार व्यवसायलय् नं हस्तक्षेप यायां वयाच्वंगु दु । झीगु स्वनिगलय् दमन अपहरण चोरी डकैती आतंक हत्या आदि जुया स्वनिगः हे झिझां मिझां दंथे च्वने धुंकल । शान्ति अमण चैन धइगु मदये धुंकल । खालि कुर्सीया निंतिं जक थन स्वनिगलय् च्वनाः आन्दोलन यानाच्वंगु दु । थौ आन्दोलन धइगु हे नेवाःतय्त विस्थापित यायेत जक स्वयाच्वंगु मखुला झीसं थुइके मालाच्वंगु दु । मखु धइगु खःसा सविधानसभां संविधान कानून दयेकेत त्यानावःपि नेता सभासद्तय्स छाय् चिउताः मतया च्वन । खालि राजनीति यानाः जनतायात झंग लायेगु व छम्ह मेम्हेसिया तुति सालेगु व गथे याना जिल अथे यानाः कुर्सी च्वनेगु व पदय् च्वना जनतायागु क्वाः क्वाः हि चःति त्वनेगु जक स्वयाच्वंगु दु ।

उकिं झी नेवाःत छप्पँ छधी जुयाः छुं नं पार्टीया न्हिप्यं मजुसे नेवाः झी नेवाः हे जुया कांग्रेस, कम्युनिष्ट, एमाले, माओवादी, मजदुर आदि पार्टीया नेवाः नेतात झी झी जुयाः झीगु हे छगू स्यल्लागु नेवाः पार्टी चायेका छप्पँ जुयाः न्ह्याः वनेमाल । खाली खयतय्त जक सल्लाह सुझाव बियाः उमित च्वय्या पदय् थ्यंकाः झी उमिगु हे लिउ लिउ जुइ मजिल ।

झी झी हे जुयाः सु खनां नं मग्याःसे छप्पँ छधी जुयाः झीगु स्वनिगःयात बांलाकेत नेवाः राज्य दयेकेत झी जाये माल । झीसं हे राज्य संचालन याना स्वनिगः व नेपाः देयात झीस बांलाके । नेवाः झी नेवाः हे जुइ । झी सुयां न्हिप्यं मजुसे नेवाः धकाः म्वाये ।

More Stories Like this