खुम्ह व्यापारी अपहरित
स्वयम कर घोषणाया धलः लिक जूगु शंका
येँ / (सन्ध्या टाइम्स) माओवादी सरकारं पित हःगु स्वयम् कर घोषणा पूवंपिं व्यापारीत थौंकन्हय् अपहरण व थीथी कथंया चन्दा आतकंया शिकार जुयाच्वंगु खँ सीदुगु दु । नेपाल चेम्बस्र अफ कमस्रया नायः सुरेन्द्रवीर मालाकारं 'सन्ध्या टाइम्स'यात कनादी कथं अबलय् थम्हं हे कर घोषणा यानाः कर पूवंपिं ब्यापारीतय् नां गनं 'लिक' जुयाः ग्यांगतय्गु ल्हातय् लाः वंगु खनेदु ।
वय्कलं कनादी कथं उगु नां धलः स्वयाः अज्याःपिं ग्यांगतय्सं थौंकन्हय् कम से कम नं खुम्ह व्यापारीतय्त अपहरण यानाः यंकातःगु जानकारी नं वय्कलं बियादिल । आः हे उमिगु नां सार्वजनिक यायेबलय् उमित ज्यानया खतरा जुइ धासें वय्कलं थुलि जक धयादिल 'थुकी राजधानीया स्थानीय नेवाः व्यापारी नापं मारवाडी व अन्य जातिया व्यापारीत लानाच्वंगु दु ।'
अपहरणय् लानाच्वंपिं व्यापारीतय्त मालेगु ज्या प्रहरीं यानाच्वंगु दुसां छुं उपलब्धी धाःसा चूलाःगु मदुनि ।
कर पूवंपिं व्यापारीत हे सी दयेक अपहरणय् लाःगुलिं अबलय् कर पुलाः सरकारयात ग्वाहालि याःपिं मेपिं व्यापारीत थर्कमान जुयाच्वंगु खँ नं वय्कलं कनादिल ।
अथे हे अबलय् कर पूपिं गुलिखे व्यापारीतय्त थौंकन्हय् करोडौं दां चन्दा माल धकाः फोन वयाच्वंगु खँ नं वय्कलं कनादिल ।
व्यापारीतय् वयाच्वंगु थज्याःगु ख्याच्वः व उकियात अटेर याईपं व्यापारीतय्त तप्यंक हे अप-हरण यानाच्वंगु घटनायात कयाः देय्या सकलें उद्योगी व्यापारीत जानाः सरकारयात ज्ञापनपत्र नं बिउ वनेत्यंगु दु । व्यापारी उद्योगपतितय्सं थौं हे छगू पत्रकार सम्मेलन यानाः थःपिंत जुयाच्वंगु खतरायात कयाः जानकारी बीगु व वयां लिपा सुरक्षाया माग यानाः सरकायात ज्ञापनपत्र बीगु तयारी यानाच्वंगु दु । थ्वहे समस्या समाधाना यायेगु लागिं उमिसं छगू नागरिक व्यावसायिक साजाल हे गठन यानाः पलाः न्ह्याकेत्यंगु खँ नं सीदुगु दु ।
थ्वहे झ्वलय् मेगु छगू सूत्रं बिउगु जानकारी कथं देशय् ताः ई तक न्ह्याःगु द्वन्द्वं यानाः ज्या यानाः नये मफयाच्वंगु व आः वयाः ज्यानयात समेत खतरा वयाच्वंगुलिं गुलिखे व्यापारीत थःगु सम्पत्ति मियाः विदेश पलायन जुइत नं स्वयाच्वंगु दु ।
