माओवादी मेगु हे लँय् वनेफु
सत्ता कब्जा यानाः संविधान दयेकीगु ?
येँ / (सन्ध्या टाइम्स) माओवादीं न्हापा जनयुद्ध न्ह्याकाच्वंगु इलय् गुगु कथंया संविधान दयेकेगु धकाः कल्पना याःगु खः अज्याःगु संविधान वर्तमान संविधानसभां दयेकीगु सम्भावना मदया वंगु कारणं आः न्हूगु हे लँपु ली मालीगु बिचाः शुरु याना हःगु खँ सीदुगु दु ।
थौंकन्हय् न्ह्यानाच्वंगु माओवादीया पोलिट ब्युरो बैठकय् थज्याःगु बिचाः वयाच्वंगु खँ सूत्रं धाःगु दु । थःपिंसं बिचाः याना थेंज्याःगु जनवादी संविधान थ्व संविधानसभापाखें दयेकीगु सम्भावना मदुगुलिं आः जनविद्रोह यानाः जूसां सत्ता कब्जा यासें 'जनवादी संविधान' दयेकेमाःगु बिचाः नेतातय्सं तयाच्वंगु दु । पार्टी अध्यक्ष प्रचण्डं थ्व बिचाःयात नरम भासं प्रस्तुत यानाच्वंगु दुसां मोहन वैद्य पुचलं धाःसा थुकियात चाःहीकाः मखुसें तप्यंक हे धायेमाः धकाः दवाव बियाच्वंगु दु ।
सूत्रया कथं माओवादीतय्सं आः जन आन्दोलन यानाः विस्तारवादी व साम्राज्यवादीत मदुगु राष्ट्रिय सरकार गठन यायेगु व वयां लिपा संविधान दयेकेगु ज्या न्ह्याकेगु धइगु प्रस्ताव न्ह्यःने हयाच्वंगु दु । थ्व विस्तारवादी साम्राज्यवादी मदुगु राष्ट्रिय सरकार गठन यायेगु धाःगुया मेगु अर्थ माओवादी याकःचिया हे सरकार गठन यायेगु धाःगु खः धकाः नं सूत्रं अर्थ छ्याःगु दु । माओवादीं वर्तमान एमाले व कांग्रेसया गठबन्धन सरकारयात विदेशीतय्सं दयेका बिउगु कतांमरि सरकार धकाः द्वपं बियातःगु दु ।
माओवादीं थ्वहे असार श्रावण तक सामान्य रुपं आन्दोलन न्ह्याकाच्वनेगु व भाद्रनिसें पूर्ण रुपं आन्दोलन न्ह्याकाः 'सत्ता कब्जा' यायेगु अभियान शुरु याइगु खँ नं धाःगु दु ।
