वा मवयाः थुगुसी जुयाच्वंगु चिउताः

थुगुसी लिबाक जक वःगु मनसुनं यानाः देय्या कृषि उत्पादन बांमलाक हे प्रभावित जुइगु संकेत खने दया वःगु दु । इलय् वा मवःगु कारणं पहाड जक मखु देय्या दकलय् बांलाःगु उर्बर लागा दुगु तराई तकं प्रभावित जुयाच्वंगु दु । नेपाः ८० स्वयां अप्वः प्रतिशत जनता कृषिइ निर्भर जुयाच्वंगु देय् खः । अले नेपाःया अत्यधिक बुँ सर्गतं वइगु वाय् निर्भर जुयाच्वंगु दु । थज्याःगु देशय् असारया दथुइ तक ध्यनेधुंकाः नं वा मवयेगु धइगु कृषिया ख्यलय् तःधंगु हे संकट वइगु बराबर खः । कृषिइ निर्भर जुइमाःपिं किसानतय्सं आः हे थःपिनि निराशा व चिन्ता व्यक्त यायेधुंकूगु दुसा उमित राहत बीगु लागिं सरकारं छुं व्यवस्था याये धकाः घोषणा नं यायेधुंकूगु दु ।

नेपाः छगू कृषि प्रधान व अत्यधिक जनता कृषिइ निर्भर जुइमाःगु देय् खयां नं राज्यपाखें आः तक नं कृषियात थुकिया परम्परागत प्रविधिं च्वय् थकायेगु ज्या यायेफुगु मदुनि । कृषि विकासया लागिं माक्व सिंचाईया व्यवस्था यायेगु उब्जनी बांलाकेगु लागिं आधुनिक प्रविधित छ्यलेगु देशय् हे साः कारखाना दयेकेगु आदि छुं हे ज्या राज्यपाखें जूगु मदुनि । थुकिया हे लिच्वः खः कि थौं वा छकः जक मवल धाःसां नं सम्पूर्ण देय्या हे कृषि उत्पादन प्रभावित जुइगु जुयाच्वंगु दु ।

थौं विश्वय् वयाच्वंगु वातावरणीय प्रकोपं यानाः इलय् वा मवइगु ई कथं मौसम महिलेगु अनेक ज्याखँत जुयाच्वंगु दु । उकिं थुगुसी गुगु वर्षाया नकारात्मक लिच्वः झीत लानाच्वंगु खः थ्व आः दँय्दसं नं जुइगु खतरा दु । थज्याःगु स्थितिइ नेपालं कृषियात आधुनिक प्रविधित छ्यलाः मन्ह्याकेगु खःसा छुं दँ लिपा नेपाःमित थाराथारा गंगु बुँ स्वयाः द्यांलाः प्वाथं द्यनेमालीगु स्थिति वइ ।

More Stories Like this