लः व धःया समस्या जक

सम्पादकजु,

ताः ई तक वाः मवःगु कारणं यानाः थौंकन्हय् किसानतय् वा पीगु जक समस्या जूगु मखु कि लः त्वने मखना थीथी कथंया ल्वय् तकं शुरु जूगु समाचार पिहां वयाच्वंगु दु । लः त्वनेगु म्हो जूगुलिं जण्डिस लगायत थीथी ल्वय् जुयावःगु समाचार वयाच्वना नं सरकारं माःगु माःथें बन्दोबस्त धाःसा यानाच्वंगु मदु । समस्या झन झन तच्वया वःलिसें किसानतय् बुंइ तयातःगु पुवाचा जक गना वंगु मखुसें मुहानय् तकं लः सुना लः त्वने मखंगुलिं हे थीथी ल्वय् नं लगे जुयावःगु खः । अथे जुया नं लः व धःया समस्यायात सरकारं ध्यान तयेमाःगु खनेदु ।

ख्वपया मामलाय् खँ ल्हायेगु खःसा न्हापानिसें पवित्र गंगा कथं कयातःगु हनुमानघाट ख्वँह्रेय् थौंकन्हय् प्रदुषित जुयाः थुलि नँ वये धुंकुगु दु कि न्ह्यनेलापिं मनूत अन वनेत हे थाकु । नापं अन लिक्क लिक्कया स्कूलय् वनेमाःपिं बुंइ वनेमाःपिं व ज्याय् वनेमाःपिं मनूत तसकं हे पीडित जुयाच्वंगु दु । नगर न्यंकं वइगु निकास तप्यंक हे पवित्र गंगाय् मिले याना तये धंुकूगुलिं यानाः थुकथं नँ वयेगु क्रम शुरु जूगु खः । सामान्य मनूतय्गु निंतिं अन वनेगु वयेगु उलि अजुचायेपुगु खँ मखयेफु । तर पिनं वईपं मनूतय्गु निंतिं धाःसा लाथेन्यिपं मनूत अन मवनेगु हे बांला तायेकीगु स्थितिइ थ्यनाच्वंगु दु ।

- कृष्णमान दुवाल, ६ वडा ख्वप ।

More Stories Like this