भाषा क्वचिने दइ मखु

सम्पादकजु,

थौंकन्हय् संविधान च्वयेगु ज्या जुयाच्वंगु थासय् देशया सम्पर्क भाषा छु यायेगु धकाः विवाद पिहां वयाः निर्णय हे याये मफयाच्वन धाःगु खँ समाचारत पिहां वयाच्वंगु दु । वास्तवय् खँ छु खः ले धायेबलय् आःया संविधानय् गुगुं छगू जक भाषायात अथवा निगू भाषायात सम्पर्क भाषा धकाः उल्लेख यायेगु उचित जुइ मखु । थ्व न्यायपूर्ण व नेपाःयात संघीय व्यवस्थाय् यंकेमाःगुया मू कारणलिसे तालमेल नं मजू । वास्तवय् २४० दँ न्ह्यवंनिसें नेपाःया फुक्क भाषाभाषीयात छगू जक भाषा क्वचिनेगु ज्या याना वयाच्वंगु कारणं उकिया हे विरोध स्वरुप नेपाःयात संघीय व्यवस्थाय् यंकेगु धकाः सकलें आदिवासी जनजाति नं जानाः जनसंघर्ष यासें नेपालय् लोकतान्त्रिक गणतन्त्र व्यवस्था नीस्वनेगु ज्या जूगु खः । आः आन्दोलनया सफलता लिपा हानं वहे छगू जक भाषा फुक जनताया छ्यनय् क्वचिनेगु धकाः निर्णय यात धाःसा थ्व ला समस्याया समाधान जुइगु लँपु हे जुइ मखुत । थुकिं ला झन जक बांमलाःगु ल्वापु पिकयाः देशय् गन्जागोल याना बी । वहे छगू भाषाया आधिपत्य हटे यानाः फुक्क भाषायात अधिकार बीमाः धकाः ला राज्य पुनस्रंरचना यायेमाःगु खः । आः वहे छगू भाषायात हे हानं पोसे यायेमाः धकाः निर्णय यायेगु खःसा देशय् हिउपाः वःगुया छु मतलब जुल उकिं अज्याःगु निर्णययात झीसं विरोध याये हे माःगु दु ।

-सक्षमराज राजकर्णिकार, पूच्व यल ।

More Stories Like this