झी जनता हे छप्पँ जुइमाल

गाइजात्रा धइगु ला दँय् छकः जक वइ । थौंकन्हय् ला झीगु देसय् न्ह्याबलें गाइजात्रा जुइधुंकल । छगू पार्टीं मेगु पार्टीयात न्ह्यःने लाःथे धाइगु । वं वइत सह मयाः वं वइत सह मयाः । न्ह्यागु पार्टी नं सरकारय् वनाः कुर्सी हे जक माःपिं अले कुर्सीया लागिं थवंथः हे छ्यों ततज्याक ल्वानाः ल्हाः वाइगु । थ्व गज्याःगु राजनीति छेँया हामा गति मलात कि छेँ हे हास नास जुइ धाइ । झीगु देसय् ला देस चले याईपं नेतात नातावाद कृपावाद जुयाः थवं थः जक स्वार्थ पूवंकेत स्वईपं । थ्व हे लोकतन्त्र जनतायात न्ह्याक्व दुःख जूसां वास्ता मतईपं नेतात । लोकतन्त्र ला मखु नेतातन्त्र धाःसां जिल । न्ह्याबलें बन्द न्ह्याबलें बन्द । गरीब जनताया नये म्वाःला छन्हु बन्द जुल । कि जनताया गुलि दुःख धइगु पार्टी चले याईपं नेतातय्सं सिउ लाकि मसिउ बुद्ध जन्म जूगु देसय् शान्ति गन दइ धकाः माले थाकुइधुंकल । न्ह्याथाय् स्वःसां हिंसा लुटपाट ल्वापु अपहरण जूगु जक समाचार न्यने मालीगु । आः झी जनता दक्व छधी जुयाः छु याःसा जी धइगु बिचाः यानाः ज्या न्ह्याके हथाय् जुइधुंकल ।

- कृष्णमान डंगोल, मखंगल्ली तुन्छेबहाः येँ ।

More Stories Like this