पप सम्राट ज्याक्सन मन्त

हनिमय् नांजाम्ह 'पप सम्राट' माइकल ज्याक्सन बिहिवाः मन्त । न्यय्दँ दुम्ह ज्याक्सन नूगचूया ल्वंचं कयाः मदुगु खः । ल्वचं कायेवं लस एन्जल्स् स्थित ज्याक्सनया होल्मी हिल्सय् च्वंगु छेँय् डाक्टरत वास कायेत थ्यंगु खसां ज्याक्सनया अवस्था गम्भीर जूगुलिं अस्पताल यंकूगु खः । अस्पातलय् हे वयेकयात मदुगु घोषणा याःगु खः ।

सन् १९५८ अगस्त २९य् बुम्ह ज्याक्सन मदुगु खबर लिपाः हनिमय्न्यंकय थीथी टीभि व रेडियोत्यसं नियमित ज्याझ्वः दिका ज्याक्सनया म्ये ह्याकूगु खसाः हजारौं मनूत ज्याक्सन तयातःगु अस्पताल पिने व न्यूयोर्कया टाइम्स स्क्वार्यय् मुनाः बिचाः ह्याकूगु खः ।

छुं ई लिपाः हे लन्डनय् कन्सर्ट यायेगु तयारी यानाच्वंम्ह पप सम्राटया 'थ्रीलर', 'ब्याड' व 'अफ द वाल' थंज्याःगु एल्बमत पाखें लखौं प्रशंसकतय् नूग त्याकेत ताःलाःगु खः । सन् १९८२य् पिंहावःगु 'थ्रीलर' नांया एल्बम आः तकया अत्याधिक बिक्रि जूगु अल्बम कथं कयातःगु दु । उगु एल्बम ५ करोड प्रति बिक्रि जूगु खः । थ्व एल्बम लिपाः ज्याक्सनया सः जक मखु वया प्याखं ल्हुइगु कलां यानाः नं लोकप्रिय जूगु खः । वयां लिपाः ज्याक्सनया 'मूनवाक डान्स' न्ह्यावलें नं चर्चाया विषय् जूगु खः । अथेहे 'बिली जोन' व 'ब्याड' थंज्याःगु एल्बम नं हनिमय् तसकं लोकंह्वाःगु खः ।

न्ह्यदँ दुवलये निसें म्येहालेत शुरु याम्ह ज्याक्सनं 'ज्याक्सन फाइब' नांगू सांगीतिक पुचः पाखें दकले न्हापा सन् १९६०स सांगीतिक ख्यलय् पलाः तःगु खः । थःगु सांगीतिक क्षेत्रय् दक्लय् न्हापांगु एल्बम सन् १९७२य् रेकर्ड याकुम्ह ज्याक्सनं सांगीतिक ख्यःया दकलय् तःधंगु उपाधि ग्रामीलय् झिंस्वंगु अवार्ड त्याकेधुंकूगु दु ।

स्वम्ह मस्तया अबु ज्याक्सनं थःगु जीवनया न्हापांगु ईहिपा गायक एल्विस प्रेस्लीया म्हाय् लीजना मेरी नाप सन् १९९४य् याःगु खः । तर उकीया निदँ लिपा हे निम्हतिपुया सम्बन्ध विच्छेद जुइवं ज्याक्सनं डेबी रानाप ईहिपा याःगु खः । तर थ्व ईहिपा नं तःहाक ई तक न्ह्या वने मफेवं सन् १९९९य् सम्बन्ध विच्छेद याःगु खः ।

सन् २००३य् ज्याक्सनया जीवनय् आधारित छगू टीभि डकुमेन्ट्रीलय् मस्तय्त यौन दुव्र्यवहार याःगु क्यनेवं विवादय् लाम्ह सांगीतिक हस्तीयात थ्वहे द्वपंनय् सन् २००५य् मुद्दा दर्ता याःगु खः । प्यलाः तक मुद्दाय् बहस लिपाः ज्याक्सनयात अदालतं सफाई ब्यूगु खः ।

पप सांगीतिक ख्यःया हस्ती गायक एल्बिस प्रेस्ली व सांगीतकि पुचः बिटलस् नापं नां स्वाःगु ज्याक्सन आ: झी दथुइ मदुसां वयेकया स: सकल संगीत प्रेमीया नूगलय् न्ह्यावलें नं थ्वयातुं च्वनी ।

More Stories Like this