वैभव भोगया निंतिं क्षणिक त्याग आवश्यक

लोकबहादुर शाक्य


धार्मिक जुक्वस्यां पालना यायेबहःगु :

कर्तव्य पालन यायेगु धर्म अथवा धारण यायेगु हे धर्म खः । मिया धर्म पुइगु खःसा लःया धर्म शीतल यायेगु । अझ स्पष्ट यायेगु खःसा चित्त शुद्ध यानाः निःस्वार्थ भावनां सेवा यायेगु ग्वाहालि यायेगु मेपिनिगु उपरय् दया-करुणा-मैत्री भावना ब्वलंकेगु हे धर्म खः । धर्म अथवा पाप धइगु छु खः झीसं हे बिचाः यायेमाःगु जुल । बांलाः-बांमलाः फाइदा-बेफाइदा दक्व स्वयेमाः । थःत जक फाइदा जुयां नं मजिउ मेपिंत नं फाइदा जुइ माल । सीगु मयःसां जन्म जुक्व सकलें मरण मजुसे मगाः । यथार्थ रुपं कुशल कर्म यायेगु धर्म खः । मेपिनिगु चित्तसुख मदयेकेगु मेपिंत दुःख बीगु आदि अकुशल कर्म पाप जुल । बुद्ध धर्मया मौलिक सिद्धान्त कथं दशपुण्यकि्रया धर्म खःसा दश अकुशल कर्म पाप खः । पाचशील न्यागू जक पूर्ण रुपं पालन याये फःसा शान्त लकस ब्वलनीगु जुल ।

शान्तिया पुसा नुगलय् पीमाः :

थम्हेसिनं यानागु कुशल वा अकुशल कर्म विपाक भोगे मयासे मगाः । कुशल पुण्य याःम्ह व्यक्ति न्ह्याथाय् वंसां आपतविपत परे जूसां तरे जुइफु । पुण्यया फल किचः थें लिउ लिउ नं वयेफु । पुण्यया प्रभावं मनय् डर-त्रास जुइ मखु । मन आनन्द जुयाः ख्वाः चकनाच्वनी । पुण्य कर्मपाखें शान्त लकस ब्वलनीगु जुल । अकुशल पाप कर्म यात कि दुःख जुयाच्वनी । पिने वनेबलय् नं सुनां छुं धाइ ला धकाः मनय् डर-त्रास दयाच्वनीगु जुल । साःगु नसा नःसां स्वाद मदयेफु । पापीया ख्वाः ग्यानापुसे च्वनीगु नं जुल । अकुशल चित्तपाखें राग द्वेष मोह पिदनाः गबलें नं शान्त मजुसे पोले जुयाच्वनी । मिं सुयातं नं पक्षँपात मयासे पुनाच्वनी । बरु ज्ञानी प्रज्ञावानिपंसं तीजक मि थिउसां घाः मजुइक च्वने फइगु जुल । थ्व संसार दयेकूम्ह चित्त खः धकाः डा. अनोजा गुरुमांया 'शान्ति अभिप्रेरणा' सफुली न्ह्यथनातःगु दु । पाप व धर्म नं चित्तया खेल खः । दक्व उत्पत्ति विनाशया निंतिं जक धकाः थुइकाः गुगुं नं प्रकारया चुक्ली मयासे शील-नियम पालना यानाः चित्त भिंकाः सेवा भावना तथा त्याग भावना ब्वलंके माःगु जुल ।

नालेबहःगु सन्देश ओबामाया :

च्वय् न्ह्यथनागु बयान कथं निस्वार्थ रुपं कर्तव्य पालना यायेगु लोककल्याणकारी ज्याखँ यायेगु तथा मैत्री करुणा मुदिता उपेक्षु भावना ब्वलंकेगु हे धर्म जुल थम्हेसिनं यानागु कुशल अथवा अकुशकल कर्मया फल भोग मयासे मगाः ।

अमेरिकाया ४४ म्हम्ह राष्ट्रपति बाराक ओबामा निर्वाचनय् त्याकेधुंकाः न्हापांगु सन्देश बियादीगु न्ह्यथनेबहः जू - अमेरिकाया युवा वर्गयात धर्मया आस्था नैतिकता एवम् बुद्धि विवेकं चिनाः लिपा अझ नं सुन्दर शान्त व समृद्ध अमेरिका निर्माणया नितिं विद्यालयय् ब्वंकीगु पाठ्यसफुली थीथी धर्म ग्रन्थया अनुकरणीय विषयवस्तु दुथ्याका यंकेमाःगु दु ।

होश वयेकीगु धर्म माः बेहोश याइगु मखु :

नेपाः देय्या धर्मया अवस्थायात मूल्यांकन यायेबलय् अप्वःसिनं धर्मया सही मर्म मथुयाच्वन धायेमाल । बुद्धं धर्मया ज्याझ्वः मनूया चाहना क्षँमता परिस्थिति व ईयात ल्वयेक ब्वलंकेत अनेक सुधारात्मक रचनात्मक प्रगतिशील पलाः छिनाः धर्मदर्शन प्रचार यानाबिज्याःगुलिं थ्वयात मानव धर्म धयातःगु खः । धर्मावलम्बीतय्सं प्रार्थना-पूजा-पाठ यानाच्वंसा अप्वःसिनं वरदान कायेगु मनसुवा तयाच्वंगु नं खनेदु । अझ संस्कृतियात हे धर्म थुइकाच्वंपिं नं म्हो मजू । गुलिसिनं धर्मयात अफिम धयाच्वन । छकः थज्याःगु धारणा दुपिं छपुचः नापलाःबलय् आध्यात्मिक विषयय् सहलहया झ्वलय् थौंकन्हय् अप्वः मनूत धर्मय् अन्धभक्त जुयाः ईश्वरया नामय् पूजापाठ जक यानाः यथार्थ धर्म मथुयाच्वंगुलिं धर्मयात अफिम सम्झे जुइ माःगु नं खने दत । तर व्याक्कं धर्मया तातुना धइगु कुशल मंगल ज्याखँ यायेगु ल्हायेगु मैत्री-करुणा-समान भावना ब्वलंकेगु परोपकार यायेगु खः धकाः न्यंकूबलय् 'थज्याःगु धर्म ला माः' धकाः समर्थन याःगु जुल ।

नेतातय्सं धर्म उपेक्षु याःगुया कुफल :

थौं देय्या नाजुक परिस्थिति विषयय् चिन्तन यायेबलय् थुकी राज्यया शासन भार कयाच्वंपिं व काईपं दलतय्गु जिम्मेदारी दु धकाः मधासें मगाः । अझ मू कारण ला दलतय्गु आपसी खिंचातानी खः । ततःधंगु छगू हे पार्टीया दुने नं गुटबन्दी खनेदु । नेपाःमिया कुतलं लोकतन्त्र गणतन्त्र नीस्वने फुगु च्वछायेबह जू । तर दलतय्गु द्वन्द्वं यानाः प्रशासन सुचारु रुपं न्ह्याके मफयाः जनतां आपालं दुःख सियाच्वन । नेतातय्गु अदुरदर्शितां यानाः गुलिखे राजनैतिक दृष्टिकोणं ज्याखँया मुद्दा मामिला अदालतय् वंगु अले फैसला यायेत ढिला जुइगु कारणं नं प्रशासनय् पंगः जुयाच्वन । संविधानसभाय् निथासं बूम्हेसित प्रधानमन्त्री दयेकल धकाः कुंखिउँगु नं न्यनेमाल । संविधान निर्माण यायेगु निंतिं मदयेक मगाःगु सर्वदलीय मन्त्रिपरिषद स्वने मफुगु नं दुर्भाग्य जुल ।

त्याग याये मसःपिंसं भोग याये दइ मखु :

राज्यं धर्म माने याइगु मखुसें व्यक्तिं धर्म माने याइगु सत्य तथ्य खँ सर्वव्यापी जुयाच्वंगु दु । व्यक्तिया स्वतन्त्र रुपं थः यःगु धर्म माने यायेगु अधिकार दुगुलिं राज्यं गुगुं नं छगू धर्मय् लगे मजुसे दक्व धर्मयात समान दृष्टिकोणं नाला कायेगु सिद्धान्त स्पष्ट जूगुलिं सरकार व संसदपाखें धर्म निरपेक्ष राज्य घोषणा जुइधुंकूगु लोकतान्त्रिक गणतन्त्रया महान उपलब्धि खः । आः वयाः धर्मय् अन्धभक्त जूपिंसं थुगु सिद्धान्तयात विरोध याःगु अतिकं दुर्भाग्य धायेमाल । हालय् यलया छगू क्याथोलिक चर्चय् प्रार्थना यानाच्वंगु इलय् बम विस्फोट जुयाः स्वम्ह सीगु नापं झिंस्वम्ह घाःपाः जूगु दुःखया खँ खः । थ्व अमानवीय ज्या धर्मय् कट्टर व अन्धभक्ततय्सं याःगु स्पष्ट दु । हानं गनं मजू कथं मन्त्रिमण्डल स्वनेत ढिलासुस्ति जूगु नं थन खने दत । थ्व विषयय् दुग्यंक बिचाः यायेबलय् राजनैतिक दलया नायः तथा पदाधिकारीतय्के धर्मचित्त मदयाः हे मामुली खँय् नं तःधंगु समस्या जूवंगु खः । उकिं धर्मया पदाधिकारीतय्सं नं राजनीति विषयय् चिउताः तयाः सद्धर्म अनुरुप राज्य शासन सुथां लाक्क न्ह्याकेत इलय् ब्यलय् सुझाव बियाच्वनेगु ल्वमंके मजिल । राजनीतिज्ञतय्सं नं धर्मचित्त उत्पत्ति यानाः सौहार्दपूर्ण रुपं सहलह यानाः समस्या ज्यंकाः सद्धर्म कथं देय्या प्रशासन चले यायेगु हथाय् जुयाच्वन ।

More Stories Like this