नेवाः एफ.एम.यात भिंतुना

पुष्परत्न ताम्रकार 'स्वीटहर्ट'

जितः लुमं कथं तःदँ न्ह्यः येँया त्रिपुरेश्वरया आर्किड होटेलय् नेवाःतय्गु निंतिं बिस्कं पहलं अलग्ग कथंया हे नेवाः एफ.एम. चायेकेगु बारे सहलह मुँज्या जूगु खः । धाथें उबलय् जूगु मुँज्यां नेवाःतय्त छगू उत्साह नं ब्वलंका बिउगु खः । अले झी नेवाःतय्सं आः याकनं थःपिनिगु हे एफ.एम.पाखें मुक्कं नेवाःभासं जक ज्याझ्वः न्यने दइगु जुल धकाः मनय् लसताया स्वां नं ह्वःगु खः । तर विडम्वना धाये ला छु धाये नँ न्याःया वा मगाः थें जुयाः मुँज्या जूसां उगु मुँज्या हे जक जुया तःदँ तक लिकुनाः ग्वःफसं पुइकी थें पुइका बिल । गुकिं यानाः मनय् स्वां ह्वयेकाः आशाया निभाः लुइकूपिसं लुकुं बीकाः मन हे क्वतुंक च्वनेमाल । तर थःगु दिं मवयेकं न्ह्याक्व हे हाःसां हथाय्चायाः साना जूसां जी हे मखुगु जुयाच्वन । बरु उकिया निंतिं कू मनसें लं च्वंच्वनेमाः खिनं । अथे च्वंतले धाःसा छन्हु ला छन्हु पक्कां नं जुइ धइगु खँ तःदँ लिपा वयाः थौं नेपालभाषा एकेडेमिं साबित याना क्यना बिउगु दु । अले क्वतुंकाच्वंपिं नेवाःतय्त हाकनं मनय् स्वां ह्वयेका बिउगु दु । उकिं दकलय् न्हापां नेपालभाषा एकेडेमि व नेवाः एफ।एम।या सकेलं जःपिंत सुभाय् मबिसें मगाः ।

वंगु नेसं ११२९ तछलाथ्व त्रयोदशी शुक्रवाःनिसें नेपालभाषा एकेडेमिपाखें नेवाः एफ।एम।या नामं १०६.६ मेघाहर्जय् परीक्षण प्रशारण न्ह्याकूगु दु । गुकिं यानाः आशाया निभाः लुकुंबीकाः मन क्वतुंक छ्वये धुंकूपिंत हाकनं आशाया निभाः लुइकाः मन स्वकु थहां वयेका बिउगु दु । थुगु ज्याझ्वलं मुक्कं नेवाः भासं जुयाः नेवाःतय्गु निंतिं थीथी तँया न्हून्हूगु हलंज्वलंया सवाः बी धइगु झी सकल नेवाःतय्सं भलसा कायेछिं । छाय्धाःसा नामं हे नेवाः एफ.एम. जूगुलिं पक्कां नं नेवाः भासं जक जु हे जुइ धइगु सकस्यां नं धुकुमां यानाच्वंगु दइ । वास्तवय् धायेगु खःसा नेवाः भासं हे न्ह्याकेगु निंतिङ तःदँ न्ह्यः सहलह मुँज्या जूगु खः ।

नेपालभाषा एकेडेमिं नेवाःतय्गु निंतिं छगू बिस्कं पहलं पलाः ल्ह्वनाः याःगु ज्या झी नेवाःतय्गु निंतिं तसकं बांलानाः लसतां जाःगु खँ खः । अले च्वछायाः दुनुगलंनिसें लसकुस नं मयासें मगाः । लसतां नं आः छाय् मजाइ ले झीथाय् गुलि नं एफ.एम.त दु उमिसं नेवाः बस्ती दुगु नेवाः लागाय् उलि सन्तोषजनक रुपं नेवाः ज्याझ्वःया सवाः बियाच्वंगु खने मदु । अले नेवाःतय्सं नं उलि सन्तोषजनकं सवाः कयाच्वने दयाच्वंगु मदु । थ्व ला खँय् भाय्या छुनाखँ दु नि 'नहुने मामा भन्दा कानो मामा निको' व थें जक खः । एफ.एम.तय्सं नं खाए खा नखाए घिच् धइथें यानाः नेवाः ज्याझ्वः न्ह्याका वयाच्वंगु दु । न्ह्याकीपिंसं नं नेवाःभासं खः ला खः जक धइथें यानाः ल्वाकःबुकः भासं न्ववानाः अशुद्ध अशुद्ध खँग्वः छ्यला वयाच्वंगु दु । गथेकि 'पितं' धायेमाःथाय् पौनं पौखय् पौखं व 'मनुखं क्वखं द्यवं मामं' आदि धायेमाःथाय् 'नं' छ्यलाः मनूनं क्वनं मानं व 'गथे कि' धायेमाःथाय् जस्तै आदि धया वयाच्वंगु खनेदु । धाथें धायेमाल धाःसा अप्वःसिके नेवाः भाय्या खँग्वः व भाय्लचंया ज्ञान हे मदुपिंसं न्ह्याका वयाच्वंगु दःसा थःथःपिनिगु थः लाःपिनिगु म्ये थ्वयेकाः यकःति न्ह्याका वयाच्वंगु दु । उकिं यानाः न्यंमिपिंत कपाः स्याका बिउगु दु । गबलें गबलें ला एफ.एम. तकं बन्द यायेमालीगु अवस्था तकं थ्यंका बिउगु दु ।

गुलिं गुलिं एफएमं ला नेवाः भाय्या ख्वाःपालं पुयाः मचातय्त ह्ययेके थें ह्ययेकाः घौछि तक न्ह्याना वयाच्वंगु ज्याझ्वः लिकयाः थःपिनिगु हे स्वार्थय् तक्यनाः उगु ईयात क्वपालाः मेमेगु एफ।एम। नापं ल्वाइकथं तयाः त्वाः हुइगु ज्या जक याना वयाच्वंगु दुसा गुगुं एफ.एम. ला नां जक भाषाया नां तयाः न्यनामिपिनिगु छ्याता ई व ध्यानयात बेवास्ता यासें सुथसिया ११ ताः तयाबिउगु दु गुकिं यानाः मेगु ज्याझ्वः नापं ल्वाःवंगु दु । थज्याःगु एफ।एम।तय्सं थःगु स्वार्थ सिबें भाषा व नेवाःतय्गु निंतिं छु निं ?
याइ कि धेंधेंबल्लाः जक यानाः थःपिनि पुरुषार्थ जकं क्यनेत्यंगु मखुला जितः ताः कथं थथे यानाः क्यनेगु धइगु नेवाः नेवाः दथुइ विखण्डन हयेगु सिबाय् मेगु छुं मखु । अथेहे मेमेगु एफ.एम. ला छम्ह नेवालं नेवाः ज्याझ्वः लिकया बिउगु दुसा भाषाया निंतिं ख्वाः जक पिब्वयाः दुने दुने मुलय् तयाः गः कीत स्वसें जःछिपाः छघौ तक न्ह्याना वयाच्वंगु ज्याझ्वःयात क्वपालाः ई न्ह्यत कयाः बाघौ जक याना बिउगु दु । धाःसां अज्याःपिंसं थीथी कथंया समस्यात न्ह्यःने ब्वये हइ । नेवाःतय्सं नं बाध्यतां कुमि घुर्काः चित्त बुझे याये मालाच्वंगु दु । उकिं नेवाःतय्गु निंतिं ला बांलाक हलंज्वलंत बिया वयाच्वंगु दु धकाः धाये मिछंक ।

आः थुगु नेवाः एफएमं थज्याःगु स्वार्थ भावयात हाकुचिनाः गुगु निःस्वार्थ भावं ताः तयाः न्ह्याकेत्यंगु खः उकथं न्ह्याका यंकल धाःसा तसकं झःझः धायाः सकल नेवाःतय्सं ययेकाः पक्का मतिनां ब्याकाच्वनी धइगु भलसा दु । बरु भाषा खँग्वः भाय्लचंया बांलाक ज्ञान दुपिंसं ज्याझ्वः न्ह्याकल धाःसा लुँइ नस्वाः ह्वले थें हे जूवनी । थ्व खँय् न्हापा हे तुं वाःचायेकेमाः । नेपालभाषा एकेडेमिं गुगु ताः तसें नेवाःतय्गु निंतिं धकाः न्हापांनिसें वाःचायेकाच्वंगुयात उगु कथं न्ह्याकायंकल धाःसा अप्वः न्यँमिपिंसं बिउगु एफ.एम.पाखें मन क्वसायेकाः धेचूवनी धइगु जिं तायेकाच्वना । उकिया निंतिं नेवाः तजिलजि नेवाः संस्कार व विधिब्यवहार नेवाः म्हसीकाया लिसें नेवाः नसात्वँसा थाय्बाय् त्वाः म्हसीकाः नेवाः खँग्वः म्हसीकाः नेवाः भाय् ल्हायेगु च्वयेगु सयेकेगु साहित्य ख्यः मचा ख्यः झीगु तना वनाच्वंगु कासा म्हसीका कलाकार म्हसीका संकिपा कःमि संगीत कःमि न्हूपिं व पुलांपिं साहित्यकारत नापं खँल्हाबल्हा उसाँय् सीका तयेमाःगु खँ ज्ञान विज्ञान धर्म दर्शन इनाप म्ये आदि थीथी ताया हलंज्वलंया क्वाःघासात न्ह्यब्वया बिल धाःसा पक्का नं सुथांलासें ताः लाना वनी धइगु विश्वास दु । थौंकन्हय् परीक्षण प्रशारण जुयाच्वंगु खँय् धायेगु खःसा बां हे लानाः त्याजिनाच्वंगु दु । गबलें गबलें जक मेमेगु स्टेशन नापं ल्वाः वनेयः । अन्तय् नेपालभाषा एकेडेमिं न्ह्याकूगु पलाः ताःलाना वनेमा सकल नेवाःतय्गु मन त्याकाः न्ह्याः वने फयेमाः धकाः भिंतुना ।

More Stories Like this