ख्याती श्रेष्ठया छ्यों लुल
फिरौटी बिउगु निगू लाख नं बरामद
येँ / (सन्ध्या टाइम्स) अपहरण लिपा स्यानाः वांछ्वयातःम्ह मय्जु ख्याती श्रेष्ठया छ्यं थौं सुथय् लुइकूगु दु । येँया रानी वनय् थौं सुथय् ४ बजे उगु छ्यों लुइकागु खँ प्रहरीं धाःगु दु । थ्व हत्याया द्वपनय् ज्वना तःम्ह अभियुक्त वीरेन श्रेष्ठं बिउगु बयानया लिधंसाय् प्रहरीं ख्याती श्रेष्ठया छ्यं लुइका हःगु खः ।
मदुम्ह श्रेष्ठया ल्हाः व तुति ध्यनाः वांछ्वयातःगु अवस्थाय् चितवनया दासढुंगाय् लुइकूगु खःसा म्ह चाहिं यलया सैंबुया खोंचय् वांछ्वयातःगु अवस्थाय् लुइकूगु खः ।
ख्यातीया शरीरया थीथी ब्व लूसां अभियुक्त श्रेष्ठं छ्यंया बारे धाःसा प्रहरीयात छुं मधाःगु कारणं प्रहरीं थुकियात कयाः थप अनुसन्धान यानाच्वंगु खः ।
हत्या जूम्ह ख्यातीया म्हया मेमेगु ब्व लूसां छ्यों मलूगुलिं शिक्षण अस्पतालय् पोष्ट मार्टम तकं मयासे अथें तयातःगु खः ।
उकथं हे ख्यातीयात अपहरण यायेधुंकाः वया छेँजःपाखें फिरौटीया रुपय् काःगु दां नं प्रहरीं बरामद याःगु दु । प्रहरीं उगु ध्यबा अभियुक्त वीरेन्द्रयात अपहरणया ज्याय् ग्वाहालि याःम्ह मेरिना शाक्यया छेँनं बरामद जूगु खः । शाक्यया छेँनं प्रहरीं २ लाख तका दां बरामद यानागु खँ धाःगु दु । फिरौटी बिउगु नोटया नम्बर न्हापा हे टिपे यानातःगु दु ।
उखे ख्याती हत्याया विरोधय् कालिमाटीया जुबेनियल कलेजया विद्यार्थीतय्सं थौं कालिमाटी लागाय् यातायात पनाः सतक जाम याना बिउगु दु ।
