सुया म्हुतु थासय् मलाः

'सन्ध्या टाइम्स' न्हिपौ तछलागा कुन्हु प्रकाशित भाजु दिलीप शाहीया च्वसु ब्वनेखन । वय्कःया लेख एकपक्षीय रुपं न्ह्याःगु खनेदु । थौं थनया राजनैतिक पार्टीतय् मू नेतात लिसें कान्छा-कान्छी नेता नेत्रीतय्गु तकं म्हुतु थासय् मलाः । बिचरा बल्लबल्लं देय्या न्हापांम्ह महिला रक्षु मन्त्री जूम्ह विद्या भण्डारीं बचकना क्यनाः म्हुतु संकूगुयात म्हुतु थासय् मलाः धकाः सुना नं तःधंगु कथं तायेके मजिउ । न्हूम्ह परराष्ट्र मंत्रीजुया म्हुतु संगु मदुनि । वय्कलं नं गज्याःगु न्ववानादी तिनि पियादिसँ । थन जि छु धायेत्यनागु धाःसां रक्षा मंत्रीया जक मखु थन फुक्कं नेतातय्गु म्हुतु थासय् मलाः । लेखकतय्सं पूर्वाग्रही जुयाः एकपक्षीय रुपं स्वाद मदयेक लेखत च्वये मजिउ धइगु जक खः । जनताया मतं स्वंगु ब्यवस्थापिका संसदया बहुमतं ल्यःम्ह प्रधानमन्त्रीयात सुयां इशाराय् प्रधानमन्त्री जूम्ह शिखण्डी अमेरिका व भारतं दयेकूम्ह प्रधानमंत्री सरकार स्वलां हे ढले जुइ आदि कथं म्हुतु थासय् मलाःगु लेख नं झीसं थन ब्वनाच्वनागु दु । अथेहे 'सरकार व प्रतिपक्ष' दथुइ सुमधुर सम्बन्ध दयेकेत सहमतिया लागिं सहमति जुलु थेंज्याःगु पूमवंगु खँ ल्हानाः मनू उल्लु याईपं नेतात थन यक्व दु । ग्व सुयागु जक खँ ल्हायेगु ।
- कृष्णराज श्रेष्ठ, वंघः ।

More Stories Like this