मृत्युदण्ड हे बीमाः

आः नेपालय् नं मृत्यु दण्ड हे बीगु कानून हयेमाः थें च्वनावःगु दु । उकुन्हु न्हूगु संविधान दयेकेत सभासद् भाजु मय्जुपिं थीथी थासय् चाःहिलाः जनताया राय बिचाः काः वंगु इलय् गुलि मनूतय्सं ला मृत्यु दण्डया कानून हयाः भ्रष्टाचार याईपंत समाप्त हे यायेमाः धकाः बिचाः बिल धाःगु नं समाचार पिहां वःगु नं झीस पत्रपत्रिकाय् ब्वनागु खः । वास्तवय् आः नकतिनि झी नेवाःतय् म्ह्याय्मचा ख्याती श्रेष्ठयात स्यानाः टुक्रा टुक्रा यानाः शरीरया अंगत वांछ्वयातःगु घटना न्यनाबलय् झीगु समाजय् गज्याःगज्याःपिं दानवत नं दु धकाः बांलाक हे क्यना बिउगु खने दत । अज्याःपिं दानवतय्त खत्तम यायेगु खःसा ला फाँसीयागु हे व्यवस्था यानाः कानून दयेकेमाः थें च्वं । थज्याःपिं दानवत झीगु समाजय् म्वाना च्वनेगु छुं हे अधिकार मदु । थुमित न्ह्याथे यानाः नं सखाप यायेमाः । छम्ह मिसा मचास्यात स्यानाः टुक्रा टुक्रा यानातःगु खँ न्यनेबलय् झीगु चिम्सँ हे तिंतिंस्वाः । थुमित आः अथें त्वःता तल धकाः कन्हय् हानं मेपिंत अज्याःगु ज्या यायेगु ह्वःताः मदइ धाये मफु । थ्व मानवीयतायात हे कलंकित याइगु ज्या जूगुलिं उमित समाजय् तयाः म्वानाच्वनेगु छुं हे अधिकार मदु । उमित मृत्युदण्ड हे बियाः मदयेका छ्वयेमाःगु दु ।

- हर्ष वज्राचार्य, ताहाचः येँ ।

More Stories Like this