अःपु मजू

बाखं

शरद कसाः

बाखं च्वयेत च्वमि भ्वं व च्वसा कयाः फ्यतुत । छु बाखं च्वयेमाली धकाः ध्यानमग्न मुद्रँय् च्वनाः छक्वः बिचाःया पुखुली धुम्पुं धुम्पुं लालकाल । मतिनाया बाखं च्वये ला ? मतिना ! गुलि च्वयेगु मतिनाया बाखं नं । फुक्कस्यां च्वयाच्वंगु दु थ्व मतिनाया बाखं । माःसा म्वाःसां मिसा-मिजंया कल्पना यानाः ह्वाईलुइ न जूसां मजूसां अथें अथें मतिनाया सवाः का । ल्वहं घाकाः छाय् दिमागयात बोझ बियाच्वनेगु अले छु बाखं च्वये ले छेँ दुनेया घटनायात कयाः च्वयेला भाजु भौ थाकथुक जूगु दाजुकिजाया दथुइ ल्हाः लम्हुइमाःगु । थ्व नं गुलि चवयेगु ? सामाजिक समस्याया बाखं, सुखदुखया बाखं, थीथी अनुभवया बाखं, छु च्वये ? थुपिं फुक्क हे बाखं न्हापा च्वयातःगु हे दु । लिपा लिपा नं च्वइतिनिगु हे बाखं खः, थुपिं । उकिं मच्वःनिगु बाखं च्वयेदःसा गुलि जिउ मच्वःनिगु बाखं अर्थात च्वयेमनिगु बाखं । छु जुइफइ थ्व ?

देशय् गणतन्त्र वःगु दु । न्हापांनिसें अथे हे दुगु, अथे हे च्वंगु नेपाःयात नं भम्चित थें न्हूगु नेपालयात ल्वयेक न्हूगु बाखं हे च्वये दःसा गुलि जिउ ? देय्या शोषित जनतां अझ नं लुधक, याउँक सासः ल्हाये खनाच्वगु मदुनि । २४० दँया छखलः तानाशाही जुजुया वंश न्हनावसां न्हून्हूपिं च्वकानायःत थन जुजु जुइत स्वयाच्वंगु दनि । उकिं शोषित, पीडित जनताया मुक्तिया निंतिं न्हूगु हे बाखं च्वये दःसा गुलि जिउ ? खः खः थ्व हे विषययात कयाः छपु बाखं च्वयेमाली ।

च्वमिया बिचालं किपा हे काये मलाःनि, भ्वँतय् च्वसां स्पर्श हे याये मलाःनि छगू चमत्कार जुल । लुखापाखे लाबाक सुंवःथें ताल । भचा बुल्लुसे च्वं । बुलुहुं अन छगू आकृति खने दयावल । अनला स्वये हे सितिकतिम्ह भ्वाथःगु वसतं पुनाः ल्हाः ज्वजलपियाः छम्ह मनू धकाः सा दनाच्वन ।

'अन सु हां ?' च्वमिं अजूचायाः न्यना छ्वत । 'जि………। जि नकतिनि छिं कल्पना याना दीथें थ्व देय्या शोषित जनता मध्ये छम्ह खः ।' थःगु स्पष्टिकरणलिसें म्हसीका बियाः उम्ह मनू न्ह्यःने वल । 'अले थन छाय् वयागु ले ?' च्वमिया उत्सुकता उप्वल । 'क, छिं हे नकतिनि मती तयादियागु मखुला ? थनया शोषित, पीडित जनताया बाखं च्वये धकाः', उम्ह मनुखं अःखतं च्वमियात हे न्ह्यसः तल । 'खला खः तर जिं गुकथं च्वये धकाः ला बिचाः हे मयानानि ।' च्वमिं थःगु नुगःखँ प्वंकल 'छिं बाखं च्वयेगु जूसा जि थें जाःपिं शोषित, पीडित जनताया बाखं मखु बरु थनया जनता छाय् थुकथं पित्याः व प्याःचालय् म्वायेमाल, छाय् जनतां न्ह्याबलें दुखसिया च्वनेमाल, उकिया हुनि छु खः ? व मूलतत्व छु खः ? थ्व च्वः लुइकाः बाखं च्वयादिसँ ।'

बाखं च्वमियात छम्ह पात्रं थुकथं सुझाव बिउ वयाच्वन । थ्व तसकं न्ह्यइपुगु खँ जुयाच्वन । सुझाव न्यनाः च्वमिया न्ह्यपुया लुखा चाःथें जुयावल । वयागु म्हुतुप्वाः तुरुन्त हे ध्वाका थें चाल, 'व कारण छु जुइफइ ? व तत्व छु जुइफइ ? का वयागु हे बारे जिं बाखं च्वयेगु जुल ।' 'बस् थ्व हे अपेक्षा यानाः जि थन वयागु खः । देसय् छगू छगू दशक लिपा राजनीतिइ हिउपाः वयाच्वंगु दु । आः तकया दकलय् लिपांगु हिउपाः वयेधुंकाः नं फगत नेपालयात न्हूगु नेपाल जक धयाबिगु दु, तर न्हूगु सिसिइ पुलांगु अय्लाः थें जक । थौं झन न्हापा स्वयाः उप्वः थन लः मदु, मत मदु, बजाः भावं सर्गतय् थियाच्वंगु दु । पवित्र गंगा समान बागमति व विष्णमति धः बाः वयेका बिउगु दु, स्वः स्वः थाय् क्वबःबुँइचात थें इल्ल मनू तै मनूत, थ्व फुक्क सुनां यानाः जुल ? व हे छथ्वः नयाभुइ फाईपिं, कमिशन च्वाईपिं भ्रष्टाचारीतय्सं यानाः मखुला थथे जूगु ? का खः कि मखु धयादिसँ ?' छम्ह जनतायात ध्वंलायेगुली होनहारम्ह नेतां भाषण याये थें पररर न्ववाःगु न्यनाः च्वमिला पलख ज्यः हे जुल । म्हगसय् म्हनाः झसंग न्ह्यलं चाःम्ह थें व छथुं हालाहल, 'खः खः, छ धाःगु सकतां पाय्छि । उकिं दकलय् न्हापां ला उमित न्हंका छ्वयेगु निं बाखं च्वयेमाली मजिउला ?' 'ज्यू ज्यू, जिं नं थ्व हे इनाप याः वयागुखः छितः । आः तक भ्रष्टाचारी, अत्याचारी न्हंकेगु बाखं सखे च्वःगु नं मदुनि जुइमाः, उकिं छिं च्वयादिसँ, छितः भिंतुना !'' थथे धाधां उम्ह मनू सिंहसार्थबाहुयात मतजलय् करुणामय लोकेश्वरं दर्शन बियाः मन्त्रदान बियावंथें बुलगु जलय् तनावन ।

उम्ह जनताया खँ न्यनेवं च्वमिया छाति तफा जुयावःथें क्वंनिसें थहां वयाः तलय् थ्यंथें महसुस जुल । छकः ताःहाकयेक झसुकाः तयेलल वया । तर थ्वया पलख लिपा हे दबुली सुं प्याखंम्व प्रवेश जुइ थें छम्ह भ्वरि खानाः ग्वारामारा चिंम्ह, स्वयेबलय् हे खलपात्र थें च्वंम्ह, म्हुतुइ छुं नयातःगु थें खने दुसां फिसिफिसि न्हिलाच्वंम्ह, तसक सालीन पहः वयेक अभिनयपूर्वक च्वमिया न्ह्यःने दवल ।

'हानं सु वल थ्व ?' च्वमि ताजुब चायाच्वन ' ज्वजलपा च्वमिजु ! छि बाखं च्वइम्ह धाःगु न्यनागु खःला थें ?' वयाखतं च्वमिया म्हुतुप्वाः चायेके मलाःनि वं हे छथं न्ह्यसः तयाबिल । न्ह्यसः न्यनाः च्वमिला इतःमितः हे कन, 'ककक, गथे सीकादिया छिं जिं बाखं च्वं धकाः ?' 'क् नकतिनि जक छितः जिगु बाखं च्व धकाः सुझाव बियाथकूगु मखुला ?' 'खः खः, वला खः, अथेसा छ हे कमिशन खोर व भ्रष्टाचारीतय् नाइकेलाक छु ?' च्वमिया न्ह्यसः न्यनेवं स्वाकातयातःगु म्हुतुसि फायाः हिसिमदयेक फिसिफिसि न्हिलाः हँय्चां थें छ्यं ल्हुकुल्हुकु संकाः वं न्ववात 'छं पाय्छि कथं म्हसीकल, जि अजाःम्ह हे मनू खः ।' 'अथे सा छ थन वयागुया उद्देश्य स्पष्ट हे जू, छं दः छंगु बाखंया पात्र दयेकेगु ताः तल । जिं उकियात पनेत थन वयाच्वना ।' छं दः पने फइमखु । जितः पनीम्ह छ सु ? जि बाखं च्वइम्ह खः । जि छंत बाखं च्वयाः जिगु बाखनय् छथेजाःपिंत नरिसंहं हिरण्य कश्यपया लाखः पिकु थें पी मानि ।' च्वमिया ब्लडप्रेशर छथुं च्वय् थहां वल । 'अरे, मूर्ख च्वमि ! छं जिगु गुकथं लाखः पी जबकि छं थ्व बाखं च्व हे मच्वःनि, छं थ्व बाखं च्व हे मच्वःनिसा जितः छं छुं हे याये फइमखु । हाद्रहाद्र हाद्र हाद्र…………।'
प्याखें लकसय् थ्व हे न्हिला जक थ्वयाच्वन । थ्वयाच्वन ।

More Stories Like this