'विकास बैंक खारेज मजूनि'
स्वंगू विकल्प बारे राष्ट्र बैंकय् सहलह
येँ / (सन्ध्या टाइम्स) नेपाल विकास बैंक खारेज जुल धकाः पिने चर्चा जूसां आः तक थुकियात खारेज हे यायेगु धकाः निर्णय मजूनिगु खँ राष्ट्र बैंकया गभर्नर दिपेन्द्रबहादुर क्षेत्रीं कनादीगु दु ।
थौं साचार माध्यमलिसे खँ ल्हासें वय्कलं उगु खँ धयादीगु खः । उगु बैकया बारे स्वंगू विकल्पय् सहलह जुयाच्वंगु जानकारी बियादिसें छु याःसा जी धकाः राष्ट्र बैंकं याकनं हे निर्णय याइगु खँ नं वय्कलं कनादिल ।
वय्कलं कनादी कथं राष्ट्र बैंकं आः बिकास बैंकयात कयाः थ्व बैंक खारेज हे यायेगु अथवा बैंकया साचालक समितिं सुधारया निंतिं फ्वंगु असोज तकया म्याद बीगु वा थीथी पुचः जानाः बिकास बैंक हानं साचालन यायेगु धइगु स्वंगू विकल्प बारे बिचाः जुयाच्वंगु दु । ताथ जूगु विकास बैंक थःपिंसं साचालन यायेगु धकाः थीथी वित्तीय संस्थातय्सं राष्ट्र बैंकय् प्रस्ताव तयातःगु दुसा बैंकं उगु प्रस्तावयात नं अध्ययन यानाच्वंगु दु ।
म्हिगः बहनी लिबाक तक च्वंगु नेपाल राष्ट्र बैक साचालक समितिया बैठकं नेपाल बिकास बैंकयात खारेजीया प्रक्रियाय् यंकेगु धकाः निर्णय याःगु खँ सार्वजनिक जूगु खःसां गर्भनर क्षेत्रीं धाःसा उकिया खण्डन यासें खारेजीया खँ वःगु खःसां निर्णय धाःसा मजूनिगु जानकारी बियादीगु खः ।
आर्थिक स्थिति स्यँस्यं वनाच्वंगु इलय् हे बिकास बैंकयात राष्ट्र बैंकं सुधारया लागिं थीथी कथंया निर्देशन बियाहःगु खःसां उकियात पालना मयाःगु कारणं राष्ट्र बैंकं कारवाहीया प्रकि्रया न्ह्याकूगु खः ।
बिकास बैंकय् २० हजार सर्वसाधारणया शेयर लगानी जुयाच्वंगु दुसा ३५०० सर्वसाधारण मनूतय् खाता चायेकाः दां मुंकाः तःगु दु । यदि बैंक खारेज जुल धाःसा अन मुंकातःगु ध्यबा मध्यय् बचत खाताय् मुंकातःगु निक्षेपकर्तातय् दां निं दकलय् न्हापां लित बीगु व वयां लिपा तिनि मेमेगु खाताया दां लित बीगु प्रकि्रया बारे खँ जुयाच्वंगु दु ।
ध्यबा लित कायेत कोष व सेनाया दावी
नेपाल राष्ट्र बैंकं खारेज यायेत्यंगु नेपाल विकास बैंकय् निक्षेप जुयाच्वंगु ध्यबा दकलय् न्हापां सुयात बीगु धइगु खँय् ब्यापक रुपं चिउताः ब्वलंगु दु । प्रचलित कानून कथं खारेजया प्रक्रियाय् दुगु थज्याःगु बैंकय् निक्षेप जुयाच्वंगु ध्यबा दकलय् न्हापां बचतकर्तातय्त बीमाः । थ्वयां लिपा मुद्दती व अनं लिपा तिनि मेमेगु खाताय् ध्यबा निक्षेप यानातःपिंत लित बीमाःगु प्रावधान दु ।
ध्यबा लित बीगु खँय् नं राष्ट्र बैंकं थ्वहे नीतियात अख्तियारी यायेत्यंगु दु । तर दकलय् अप्वः ध्यबा निक्षेप यानातःगु संचय कोष व नेपाली सेनाया कल्याणकारी कोषं थःपिंसं न्हापां ध्यबा लित कायेदयेमाःगु दावी यानाच्वंगु दु । थुकिया निंतिं संचय कोषं राष्ट्र बैंकया पौ नं छ्वयेधुंकूगु दु ।
संचय कोषं छ्वःगु उगु पती कोषया ऐन कथं थःपिंसं न्हापां ध्यबा कायेदयेमाःगु खँ न्ह्यथंगु दु । ध्यबा लित बीगु निंतिं कोषं तःक्वः मिछंराष्ट्र बैंकय् पत्राचार यानागु खँ धाःगु दु ।
नेपाल विकास बैंकय् कर्मचारी संचय कोषया जक ३३ करोड दां मुद्दती खाताय् जम्मा जुयाच्वंगु दुसा सुत्रं बिउगु जानकारी कथं उगु ध्यबा लिकायेगु म्याद तकं क्वचायेधुंकूगु दु ।
उखे विकास बैंकय् मेगु तःधंगु मात्राय् निक्षेप यानातःगु नेपाली सेनां राष्ट्र बैंकया खँयात कयाः असन्तुष्टि प्वंकूगु दु । नेपाली सेनाया कल्याणकारी कोषं विकास बैंकय् १८ करोड तका दां निक्षेप यानातःगु दु ।
सेनाया छम्ह उच्च अधिकृतं ध्यबा लित बीगु इलय् राष्ट्र बैंकं व्यक्तिगत व संस्थागत निक्षेपकर्तातय्त समान व्यवहार यायेमाःगु व न्ह्याम्हेसिया न्ह्याक्व वचत याःसां व्यवहार समान यायेमाःगु खँ धाःगु दु ।
सेनाया कोषया उगु ध्यबा नं लित कायेगु भाखा नं स्वदँ न्ह्यः हे क्वचायेधुकूंगु दु । सेनाया उगु ध्यबा भाखा पुलेधुंकूगुलिं लित बीमिछंगु धासें ७ प्रतिशत व्याजय् गुगुं नं इलय् बीफइगु कथं 'कल डिपाजिट' तयागु खँ राष्ट्र बैंकया प्रतिवेदनय् न्ह्यथनातःगु दु ।
