ध्याचलय् न्या लायेगु प्रवृत्ति

कृष्ण प्रजापित

देशय् संविधानसभाया चुनाव जूगु झिंस्वला झिंप्यला दयेधुंकाः नं संविधान दयेकेगु स्वयां नं पार्टीतय् दथुइ न्हूगु सरकारय् थःपिं गुकथं दुथ्यायेगु दुथ्याये मफुगु पार्टीतय्सं गुकथं हैसियत कायम यायेगु व चीधंगु पार्टी हे खःसां नं अप्वः सभासद्तय्त गुकथं मन्त्री दयेकेगु धइगु राजनीतिक स्वार्थय् तक्यनाच्वंगु दु । मेमेगु राजनीतिक पार्टीं विरोध स्वरुप बन्द हडताल याइगु इलय् आः बन्द हडताल फुक्कं बन्द यायेमाल धकाः सः थ्वयेकीपिं हे सत्ताय् थ्यंगु इलय् नं बन्द हडतालयात निषेध यायेफुगु मदु । छगू इलय् ला नेकपा एमालें थःपिं सरकारय् वंसां पार्टी सरकारं पिने च्वंसां आः बन्द हडताल याये हे मखुत धाःगु खः । तर जब माओवादीया सरकार वल अबलय् बन्द हडतालयात हे थःपिनि मू ज्याझ्वः कथं पितहल । कांग्रेसं ला माओवादी शासनय् न्हापांगु बन्द हे थःपिंसं यानाः 'बन्द' यात हानं खुल्ला याःगु खः । आः स्वयम माओवादीं हे बन्द याना क्यंगुलिं एमालें उकिया मारफये मालाच्वंगु दु । विदेशय् बन्द हडतालया विकल्पय् मेमेगु नं ज्याझ्वःत पित हयेगु याः । तर नेपालय् दकलय् अःपुगु ज्याझ्वः हे बन्द हडताल जुयाच्वंगु दु ।

सरकारय् च्वंगु इलय् नं न्हूगु संविधान दयेकेगु स्वयां नं थीथी कथंया पार्टी स्वार्थया लागिं अप्वः ज्या यानाच्वंगु माओवादीं वर्तमान सरकार दयेके हे मलाकं नं बन्द हडताल नापं जनजीवनय् प्रत्यक्ष लिच्वः लाइकथंया ज्याझ्वः यानाः सर्वसाधारण जनताया रोजी-रोटीयात विस्थापित यायेगु ज्या यानाच्वंगु दु । सरकारय् च्वंगु इलय् माःगु थासय् माःकथं मनूत स्वथनेगु ज्या पूवंकेधुंकूगु कारणं पार्टीयात लेबी बीगु जुयाः पार्टी नेता कार्य- कर्तातय्त बन्द हडतालं उलि तच्वकं प्रभाव मलाइगु खइ । तर सर्वसाधारण मनूत न्हिया-न्हिथं राजधानीइ वया ज्या यायेमाःपिं व छभ्व छल्कु नयेत तकं श्रम याना जुइमाःपिनिगु निंतिं यातायात जाम सरकारी ज्याकू बन्द आदि तसकं हे मिछंगु ज्या खः । बरु सरकारी ज्या याकनं गथे याकेगु धइगु खँय् विरोधया सः तयेमाःगु खः । निःशुल्क व बैज्ञानिक शिक्षा प्रदान यायेत जिल्ला शिक्षा ज्याकू घेराउ लगायतया ज्याझ्वःत यायेमाःगु खः । अथे मयासे खालि पार्टीयात गतिशील यायेगु नामय् नेपाली जनतां जक दुःख सीमालीगु ज्याझ्वःत पित बियाः बुलुगु लखय् न्या लानाच्वंगु दु ।

लठालिंग देशय् भताभुंग चाला धइथें थौं लः बिजुली स्वास्थ्य ब्यवस्थांनिसें कयाः ब्वनेगु थेंज्याःगु आधारभूत विषयय् हे तःधंगु अस्तब्यस्तता शुरु जूगु दु । राजनीतिक ब्यवस्था क्वातु मजुल कि अथे जुइगु खः । ल्याय्म्हतय्त यौन मोजमस्ती गलत संस्कृति व फिल्मय् जक भुले यानाः देश व जनता प्रतिया थःपिनि भावना व समर्पण प्रति निराश यानाः विदेशं हस्तक्षेप याइगु ई नं थज्याःगु हे राजनीतिक अस्थिरता जुयाच्वनीगु इलय् खः । सीदयेक सीमदयेक भारतीय पक्षं नेपालय् हस्तक्षेप यानाच्वंगु खबर ला झीसं न्यना हे च्वना । थ्व इलय् राष्ट्रवादी भावनाय् चिउताः तईपं ल्याय्म्हतय्सं अराजक व न्ह्यःनेलाःथे ब्यवहार क्यनाः राष्ट्रियतायात क्वातुक ज्वनेगु मस्वत धाःसा नेपाली राष्ट्रियताय् हे लिच्वः लायेफुगु ई वयाच्वंगु दु । विदेशं आक्रमण याः वल धाःसा आः बन्दूक ज्वनाः ल्वाः वनेगु ई मखु । लोभ लालचय् पुँसे जुईपं ल्याय्म्हत तयार यानाः दुब्र्यसनी वा कुलतय् लगे यानाः थःगु कर्तब्यं भ्रष्ट यायेधुंकाः मोजमस्तीइ हे जक तक्यंकाः गलत संस्कृतिया विकास याये धुंकाःलि उपिं हे ल्याय्म्हतय्गु माग धकाः विदेशी हस्तक्षेप शुरु याइगु ई खः । सोभियत संघ विघटनया इतिहास पुइकेगु खःसां अन पश्चिमी संस्कृतिं गाक्कं थाय् कयाःलि हे तिनि उपिं मोजमस्तीइ फँसे जूवंगु कारणं नियमित रुपं नयेगु त्वनेगु बांलाःगु व्यवस्था दुगु देश तकं झिंन्यागू कुचा जूवंगु खः ।

धाइ न्या लाइपिसं न्हापां तप्यंक न्या लाये मफइगु कारणं न्हापां न्याया मिखा मखंकेगु निंतिं लःयात बुलुका बी । अथे धइगु लः ध्याचः याइ । वयां लिपा लखय् च्वंम्ह न्या लाना नइ । अथे हे झीगु देशय् नं जनयुद्ध जनयुद्धं वःगु सरकारया अस्थिरता व उमित यानाच्वंगु समर्थन लित कायेगु ज्या जःलाखःला देश भारतं याना हे च्वंगु खः । जनयुद्धया लागिं ल्वाभः दुत हयेत नं उगु देशं ग्वाहालि याःगु शंका दु । नापं थीथी स्वंगूगु राष्ट्रं नं थन ल्वाभः दुहां मवःगु मखु । झीगु देशय् अस्थिरता कायम यायेगु निंतिं देशी विदेशी तत्वतय्सं न्हापांनिसें हे भूमिका म्हिताच्वंगु खः । थौं हाकनं एमालेया वरिष्ठ नेता केपी ओली भारत भ्रमण यानाः अनं छु मन्त्र ज्वना वइगु खः धइगु सकसियां चिउताःया विषय जुयाच्वंगु दु । केपी ओली न्हापांनिसें हे भाद्रं माओवादी सरकारय् वइ धयाच्वंम्ह खः । अथे धइगु माओवादीयात एमालें हाकनं सत्ता त्वःता बीगु ई वइन धइगु शंका यायेछिं ।

समानता न्याय व लोकतन्त्रया सः थ्वयेकीपिं माओवादी पार्टीपाखें सत्ताय् च्वनाः नं अराजक गतिविधि यानाच्वंगु व आः नं सदन तकं सुचारु याके मबिसे सार्वभौमसत्ता सम्पन्न संविधानसभाया ईयात अथें सितिकं छ्वयाच्वंगु कारणं आः नं देशय् राजनीतिं स्थिरता काये मफयाच्वंगु खः । थःपिंसं हे याःगु निर्णय माने यायेमाः मखुसा सदन चले याके बी मखु धइगु माओवादी अडानं यानाः एमालेया सरकारं माःगु ज्या याये फयाच्वंगु मदु । थथे ताः ई तक अथें हे सदनया ज्याखँय् पंगः थनाच्वन धाःसा आर्थिक वर्ष २०६६/६७ या बजेट वयेत हे अन्यौल जुया बी । थथे देशय् न्हूगु बजेट हयाः न्हूगु जोश जाँगर सहित ज्या यायेमाःगु इलय् हे न्ह्यागु नं लागाय् पंगः थनाः ज्या मिछंकेगु हे जक स्वयाच्वन धाःसा थौं मखुसा कन्हय् नेपाली जनतां गतिरोध ब्वलंकाच्वंगु न्ह्यागु नं तत्वया विरोधय् सः थ्वयेकेत बाध्य जुइ । अःपुक नेपाल बन्द अःपुक हे हडताल यायेगु विरोधया ज्याझ्वःयात निरुत्साहित यानाः बरु श्रृजनशील ढंगया विरोध ज्याझ्वः पित बीगु स्वयेमाः ।

More Stories Like this