झी लिउने मलाःनि, धुक्क जुइ

नर्मदश्वर प्रधान

'थन आर्थिक मन्दी तच्वयाच्वन । मन्दीं मतिनामितय्त नं बांमलाक लिच्वः लाकाच्वन । यक्व प्रेमि प्रेमिकातय् मतिनाया गथः मन्दीं छ्वासुका हल । चफुना बिल । मतिना मन्दीया कारणं शिथिल खने दइ ।' अमेरिकाय् ब्वं वनाच्वंम्ह भाजुं खबर छ्वया हइ । अमेरिका खुल्ला प्रेमया भूमि । मिजं मिसा दथुइ अन प्रेम क्रियाय् बन्देज दइ मखु । स्वच्छन्द पे्रम सहज जुइ । मतिइ लुइ प्रेम यायेत नं ध्यबा माः । प्रेम निःशुल्क जुइफु । तर नयेमाः । त्वनेमाः । खाली खल्तीं फुस्लुगु प्वाथं प्रेम जुइ मखु । अमेरिकाय् ल्यासेल्याय्म्हत मां बौया भरय् च्वने मदु । जीवन थःगु कमाई न्ह्याकी । ज्या मयासे जीवन न्ह्याके फइ मखु । मन्दीया कारणं ज्याया अवसर म्हेँ जुइ । ज्या याये दइ मखु । ल्याय्म्ह ल्यासेतय् ज्याय् मन्दीं प्रतिकूल लिच्वः लाकी । ध्यबा म्हति जुइ । प्रेम न्ह्याके फइ मखु । प्रेम यायेत नं खर्चबर्च ला माः । आर्थिक संकटया कारणं ल्याय्म्ह ल्यासेतसें मतिनाया स्वापू थामे याये थाकुइ । पे्रमया स्वापू विघटन जुजुं वनी । अमेरिकाय् थौंकन्हय् प्रेम याये ? धौधौ जूगु खँ न्यने । अजू चाइ ।

थन थःगु जःखः स्वये । अमेरिकाय् थें मन्दीं ल्याय्म्ह ल्यासेतय्त प्रभाव मयाःगु अनुभव जुइ । न्हिया-न्हिथं प्रेम प्रदर्शन थन चर्के जुया वयाच्वनी । उखुन्हु छम्हेस्यां धाइ 'आः प्रान्स, अमेरिकाय् वने म्वाःल । मरुइ देगःदेगलय् प्रान्स, अमेरिका जीवन्त जुयाः जुयाच्वंगु खने दइ…॥ नव युवा युवतीत उन्मुक्त प्रेम मुद्राय् लीन जुयाच्वंगु ………दृश्यत । मन्दीं लिना हःगु खुल्ला प्रेम । युरोपं काठमाडौंलय् वयाच्वंगु अनुभव जुइ । मठ मन्दिर बाहा बही गल्लि दुवाः थन अन मदय्क थौंकन्हय् ल्याय्म्ह ल्यासेत प्रेम योगय् तनाच्वंगु खने दइ । त्वानाःसिँया कामुक दृश्यत सुलाः सुलाः स्वये माःगु आवश्यकता दइ मखु । स्वये मयःसां मिखा ध्वदुक्क कामदेव वात्स्यायनया चेलात थौंकन्हय् छ्यापछ्याप्ति खने दइ । छम्ह रेष्टुरेन्ट थुवालं धाःगु लुमनी 'छु याये …सिबें स्वईपंत लाज ।' बिचाः वइ । मन्दी अमेरिकाय् जक वःगु जुइमाः । नेपालय् मन्दी वःगु संकेत मदु । अमेरिकाय् प्रेमि पे्रमिकातय्त मन्दीं फाना बी…। शिथिल याना बी । झीथाय् झं झं चर्के जुया वइ । थन प्रेमि प्रेमिकाय्त मन्दीं मथिउ । छाय् थी तर्क याये । अमेरिकाय् ल्यासेल्याय्म्हतय् थःगु लागिं थम्हं हे कमे यायेमाः । थन अथे मखु । मांबौपाखें स्वहायेकाः ल्याय्म्ह ल्यासेतसें मोज मज्जा याये दु । मन्दीं मांबौपिंत दुःख बी फु । मचाखाचां उकिया चिउताः तयाच्वनेम्वाः । धन्य । जिं धाये । अमेरिकाय् च्वंपिं ल्यायम्हल्यासेत स्वयाः थन च्वंपिं तसकं भाग्यमानी ।

व देय् जिं लुमंका । अन खुल्ला पे्रम । गं पं मदु । पूर्ण स्वतन्त्रता । खुल्ला प्रेम पराकाष्ठाय् थ्यनी । लिच्वः । अन कुमार कुमारी धईपं दइ मखु । निर्बन्ध यौन । मिजंतसें कुमारीत्वया निंतिं मचातय्त हे बाँकी तइ मखु । बाल यौनशोषण सामान्य जुइ । यौन ख्यलय् पू मजूपिं चूलाके थाकुइ । कुमारीत्व थामे याये सफल जूम्ह छम्ह मय्जुं थःगू कुमारीत्वया मू लाखौं लाख डलर क्वःछी । छम्ह कुमारं थःगु कुमारत्वयात पचिपचि याना तइ । जुइम्ह मय्जुयात अनमोल उपहार बीगु उद्देश्यं । व देशय् कुमार कुमारी धईपं अनमोल कोहिनूर हिरा थें जुइ । लुइकां लुइके थाकुगु । खुल्ला प्रेम गन निर्वाध जुइ परिणति थथे हे जुइ ।

छम्ह क्याफे थुवाःयात हायेके 'ब्यापार ला मालामाल जुइ… छिगु………। ल्याय्म्हल्यासे ग्राहकतय् थज्याःगु भिड ।' लिसः वइ 'च्या छगू कप त्वनी…॥ घण्टौं च्वनी………। मिसा मस्त नं चुरोट त्वनीपिं जुइ- धुंकल……खँ ल्हानां मब्याः…… गुलिसित ला ख्याना छ्वये……।'

छम्ह प्रवुद्ध शिक्षकं धाःगु लुमनी 'मांबौपिंसं मचाखाचायात कमताल । यत्थे संकल । थुकिया हे लिच्व खः यौन स्वच्छन्दता……… ।' मती मती जिं थ्व खँय् असहमति प्वंके । ककाया काय छम्ह दु । 'जिमि दाजुयात जिमि तताःजुं बुइकूगु ।' वं न्ह्याबलें धाइ । छु धाःगु ? गजब चाये । दाजुयात गय् तताःजुं बुइकी । बिचाः याये । न्ह्यपु नायेके । बल्ल खँ थुइके । दाजुया निरिहतायात संकेत यासें वं थथे धाइगु । ध्याचू नकीगु । थौं । मांबौ निरीह प्राणी । मचाखाचाया न्ह्यःने । माबौनं मचाखाचायात बुइकीगु मखु । मचाखाचां मांबौयात बुइकी… थौं थन…… मांबौनं मचाखाचायात कःघायेगु खँ जुइ मखु …। मचाखाचां मांबौयात कःघाइ । बसय् तइ । प्रबुद्ध शिक्षकजुयात मन मनं लिसः बी ।

सकस्यां धाइ देश स्यन । विकास मजू । आर्थिक अवस्था बांमलाः । तर दः अथे धाये मास्ते मवः । अमेरिका युरोपय् वःगु मन्दीं थन लिच्वः लाके मफु । अमेरिका यूरोपय् आर्थिक मन्दी जुइ । पे्रमि प्रेमिकातसें मतिनायात तिलााजली बीत बाध्य जुइ । थन खुल्ला प्रेम न्हियान्हिथं ह्वया वइ । उर्बर जुइ । थन आर्थिक मन्दी मवःनि । झी आर्थिक अवस्था मस्यनि । झी लिउने मलाःनि । धुक्क जुइ ।

More Stories Like this