थुगुसीया साधारण सभा

झिंखुक्वःगु व झिंन्हय्क्वःगु ज्ञानमाला भजन स्वयम्भुया साधारण सभा वंगु जेठ ३० गते संघाराम विहार ढल्कोय् जुल । उगु ज्याझ्वः वइतं थ्वइतं ध्याचू न्यंकाः सुरुवात जुल । अले आजीवन जःतय्सं थःथःगु मनयागु खँ तयेगु मौका वल । जिं नं थःत लगे जूगु मनयागु खँ प्वंका । ज्ञानमाला भजनया सःसिउपिं छथासं मुनीगु ज्या दँय् छकः न्ह्याकादीसा वय्कःपिनिगु सहलहं ज्ञानमाला झःझः धाइ ला धइगु बिचाः तया । द्वःछिं मयाक आजीवन जः दयेधुंकूगु संस्थाय् बछि पासापिंसं बछि हे म्हमसिउ । थथे जूगुलिं म्वाःबलय् म्हमसिउसां दैव संयोगं सुं जः मंत धाःसा वय्कःया लुमन्तिइ समवेदना बीगु ज्या यात धाःसा उगु घडिइ यऽऽ थ्व ला ज्ञानमाला भजनया आजीवन जः खिनंसा धकाः म्ह सी धया । थुकिया लिसः बिसें नायः रत्नबहादुरजुं थुगु ज्या धायेबलय् अःपु याये थाकु धयादिल । थुकी जिगु छगू सल्लाह दु । वय्कःपिसं छगू सुचं पिकयाः भजन सतलय् आवंलि झी भजनया आजीवन जःपिं सुं मंत धाःसा वय्कःया छेँजःपिंसं जिमित सुचं बियाः ग्वाहालि यानादिसँ धकाः च्वयाः तयाबिल धाःसा धाये नं अःपु याये नं अःपुइ ला मेगु खँ भजन याइपिनिगु लागिं धकाः न्यादँ खुदँ न्ह्यवंनिसें बोरा का बोरा चिनी बियाः ग्वाहालि याना वया च्वनादीम्ह भाजु अमृतमान शाक्य टेकु यागु खँ लेखा विवरण किताबय् गनं हे उल्लेख मजूगुलिं मनय् भचा दुःख ताल ।

- कृष्णमान डंगोल
मखंगल्लि, तुन्छेबहाः येँ ।

More Stories Like this