थुवाःयात हे निनाः मियागुया मज्जा

लुमंति

ह्दयप्रसाद मिश्र

खँ नीन्यादँ न्ह्यःया सिलाचःह्रे कुन्हुया खः । जि अथे हे च्यादँ झिदँति दुगु ई । उबलय् आः थें ख्यानाः स्वैच्छिक चन्दा कायेगु धइगु नं मदु ग्यानाःगिनाः चन्दा बीमाः धइगु नं मदु । छुं नं फ्वंवनेगु काःवनेगुया नं निर्दिष्ट ई दु सांस्कृतिक महत्व दु । निरंकुश वा एकदलिय राजतन्त्र धाःसां उगु इलय् आः थें यःयःगु इलय् व यःयःगु थासय् बन्द जाम हडताल जुलुस तोडफोड अपहरण आतंकया नापं म्येय् दुगुचा उइगु दीपय् मनू उइगु बाहेक टायर सायर च्याकाः पंगः थनेगु धइगु नं सुनांनं स हे मसःगु ज्या खः। त्वालय् ल्वापुलिपु जुयाः सुं हालाच्वंगु इलय् छम्हनिम्ह पुलिस वयाः 'के भएको' धकाः न्यनकि हे ल्वापु अथें हे साम्य जुयावनीगु पुलिस केश धालकि तसकं तःधंगु अपराध व बाज्या बराजुया इज्जत धुलय् ल्वाकज्याइगु तयेकीगु ई । धाथें धायेगु हे खःसा सकसिकें अदप दु । आः थें लापरवाहीया धरःग्वारा धस्वाकेगु व राजनैतिक पार्टीया दुहाई बीगु चलन नं मदु ।

न्ह्यागु न्ह्याथे हे जूसां जिपिं मस्त धाःसा मेबलय् ग्याःसां यःमरी पुन्हि कुन्हु यःमरी फ्वंनेत येँयाः पुन्हि कुन्हु हाकाहाकि समयबजि फ्वंनेत व सिलाचःह्रे कुन्हु सिँ फ्वंवनेत धाःसा पुलिस जक ला छु पुलिसया अबु जक ला छु पुलिसया अबुया मांया भाःत खनाः नं मग्याः । अय्नं आः थें सुथंनिसें हे लँय् लँय् पलाः पतिकं हे खिपतं चिनाः लँय् वइपिंत पनाः पनाः धाःसा फ्वंनेगु मयाना । न्हिनय् बाह्र बजे जुइवं सकलें पासापिं मुनाः बागमती वना । टेकु पुलाः पचलीपाखे वनेगु लँया जवय् खवय् सिमाया सिमा जक दु । आः छेँ बुया वयाच्वंगु फुक्कं थासय् न्हापा तरकारी अले वा छ्व कःनि सइगु थाय् खः । भोटेबहाः गणबहाः व त्रिपुरेश्वरया जवय् खवय् नं न्हापा ग्वाः ग्वाः गगनचुम्बि छेँ बुया मवःनिगुलिं जिपिं वनाः बुँई पियाच्वंम्ह ज्यापुदाजुयात 'हंचा माःद्यःयात मि पंकेत सिँया नापनापं तरकारी भचा बिऊ' धकाः नाइक माग यायेगु । थुकथं इनाप स्टायलं माग यायेबलय् गुम्हेस्यां लैँ गुम्हेस्यां लाभा गुम्हेस्यां काउलीया नापनापं छ्वयेकेत सिँ व कःनिमुस्या नापं बियाहइ थ्व फुक्कं हयाः चुकय्सं मुंकातयेगु । अले सन्ध्याई जुलकि थःगु त्वाःया छेँखापतिकं वनाः 'पांचःरे, सिलाचःरे, जाकि मदु बजि मदु पांचःरे' माःद्यःया चिकुल गनेद्यःया इकुल सिलाचा पनेत सिँ निका हिँ' धकाः लयात्मक ढंगं फ्वंनेगु ।

प्यक्वः न्याक्वः फ्वंनां नं मनू कुहां मवल धाःसा छेँथुवालं तायेमा धयाकथं ततःसलं 'काका बिउ मवल थ्व हे खापा लिनायंकेगु का का याकनं ल्यु ल्यु धकाः थःथवय् खँ ल्हायेगु तर खापा लीगु धाःसा मखु । जिमिसं खापा लीगु खवः यंकेगु व धलिं ब्वाकेगु खँ ल्हातकि छेँ थुवाःत कुहां मवइ हे मखु । अले कुहां वयाःलि प्रत्येक छेँ थुवाःतय्सं थःथःगु छुं नोक्सान याः मयाः धकाः शंकाया दृष्टिं छक्वः मिखा ब्वइ अले थःपिनिगु छुं नोक्सान याःगु मदु धइगु थुइवं थःपिंथाय् छु छु दुगु खः व हे कथं बियाहइ छुं हे मदुसा जक ध्यबा बियाहइ ध्यबा नं छसुका छम्वः जक । छतका बियाहलकि ला सकलें लय् लय्तायाः 'का छिमि यक्व ध्यबा दयेमा, धकाः सुवाः नापं बियावयेगु । उबलय् छतका दामं प्यमना कःनि मज्जां वः । न्ह्यागु छेँय् नं फ्वंवनेबलय् खालि ल्हातं लिहां वयेम्वाः । तर गोरे दाइ छम्हेस्यां धाःसा गुब्सं हे छुं हे मबिउ । अःखतं बरु बहनी वयाः कःनिमुस्या लाभाः काउली व हलुवा माकुक नयाः नं लाभाय् चि मगाः काउली तसकं पाल्लुक दयेकल हलुवाय् चिनि 'कम' लः अप्वल कःनिमुस्या हाकुक क्वल धकाः कुंखिनावनीगु जक मखु मेपिंसं स्वयाः छगू भाग अप्वः नापं यंकीगु । वयागु थ्व बानि जिपिं सकसितं असह्य । सकस्यां कुनुकुनु तं पिहां वःसां न्ववायेगु आँट धाःसा सुनानं हे यायेमफु ।

थौं गोरे दाइया वां चःति वयेकसां ध्यबा मकासें त्वःते हे मखु धइगु मितं सकलें पासापिंसं जुक्ति माला । घण्टौं छलफल सहलह यानाः नं पितंचा तप्यंकाः घ्य मवइगु हे खनेदत अर्थात वय्कःयापाखें ध्यबा कायेगु उपाय लुइके हे मफुत अन्त्यय् सर्वसम्मितं छगू 'आइडिया' वसेंलि थौं वय्कःयापाखें गाक्क ध्यबा वइगु खँय् जिपिं मख्ख व धुक्क जुया ।

सदां थें तुं तलेजुइ आरति सिधयेकाः गोरे दाइ छेँय् लिहां झाल । जिपिं चुकय् मि च्याकाः कःनिमुस्या सिसिउँ मादलचा थानाः प्याखं हुलाच्वनागु वय्कःया छेँ जिमिगु चुकं नं निगू चुक दुने लाः । वय्कः दुहां वये सातकि हे छगः १ फुटति ब्या व १२ फुट ताःहाकःगु निनाः खनेवं जिके न्यन 'अय् मस्त का स्व थुलि बांलाःगु अग्राखया निनाः गन कयाहयागु ?' थ्व नं च्याकेगु ला छिमिसं छु यायेगु थ्व निनाः छिमिसं निनालय् थिथिउँ हाकनं धाल 'हिं माब्वय्च्वरं मस्त न्यायेमाःसा थ्व निनाःया गुलि तू सिउला छिमिसं ? जिमिसं थवंथवय् ख्वाः स्वयाः छप्वाः म्हुतुं धया, 'मसिउ गोरे दाइ । छिमिसं मसिउसा छाय् कयाहयागु ले ? न्यायेमाःसा न्यासः खुसलं नं बीमखु का गन कयाहयागु का धा थ्व सिँ ला थिके आः छु यायेगु का धा मस्त धकाः लोभीमिखां निनाःयात स्वस्वं गोरे दाइनं न्ह्यसः तल । जिपिं सकस्यां स्येल्लाःम्ह न्या बल्सिइ क्यनी थेंच्वंगु आभाष जूसां छुं मसिउगु पहलं लिसः बिया 'छु यायेगु धायेगु गोरे दाइ । सिँ च्याकेत फ्वंवनाः गुलि 'पांचःरे, सिलाचःरे' धकाः हालां नं छुं हे मबिउ सुनानं स्वःनं मवः अले जिमिसं थ्व हे सिँ ल्ह्वनाहया का । न्ह्याक्व काःसां छु मतलब आः मज्जां थिकेगु सिँ च्याकाः पनेगु का' थिकेगु सिँया मिं अप्वः लुमुइ जुइ नि मखुला गोरे दाइ ?' जिमिगु खँ न्यनाः छक्वलं लाखे थें तिंक न्हुयाः गोरे दाइनं धाल 'अय् बुद्धि ध्वांपिं व मिखा दुसां कांपिं मस्त । थपाय्जिगु सिँ च्याके जिउ मजिउ धइगु नं मसिउ ला छिमिसं ? का म्वाःल थ्व सिँ जितः बिउ, गुलि कायेगु का धा च्याकेगु स्वयाः बरु जिं हे न्यानाकाये । का न्यय्तका दां बी जिउ ला ?' जिमिसं न्यासः खुसः वंगु सिँ न्यय्तकां बीमखु धया । अय्सा का म्वाःल न्हय्न्यातका दां बी का, छिमिसं हे सिँ छ्यली तयाबिऊ' धाल । जिमिसं ध्यबा कयाः सिँ यंकाः वय्कःया छेँया पेटिइ तयाबिया । 'का, जि जा नयाः पिहां वये न्हां' धाधां वय्कः दंग जुयाः थहां झाल । जिपिं चुकय्सं लिहां वया । बाघौति लिपा गोरे दाइ पिहां झाल तर मि पनेत मदु, वय्कः हे तमं मि जुयाः झाल । वये सातकि हे 'माम्पाखा मस्त जिगु हे निनाः खुया हयाः जित तुं मियागु का मखुला छिपिं ला छिपिं ल.. ठग का ठग' धाधां चुक छगुलिं थ्वक्क तिंतिंन्हुल । वय्कः स्वयां अप्वः तिंतिंन्हुन्हुं हिबाय्चबाय् यायां जिपिं सकसिनं छप्वाः म्हुतुं धाये थें धया 'ठग ला छि का जिपिं छुकिया ठग, न्यासः खुसः वंगु सिँ न्हय्न्यातकां न्याइम्ह 'गोरे दाइ ठग, ठग गोरे दाइ हाय् हाय्' धकाः गिल्ला यायां ना 'थ्व हलुवा भपियादिसँ' धकाः छम्हेस्यां हलुवा छग्वाराचा बिल । विचरा गोरे दाइया म्हुतु स्टार्ट मजूगु गाडी थें टक्क जुल मेपिं सकलें मख्ख जुल ।

More Stories Like this