कटवालयात कायम याःगुलिं तःधंगु संघर्षया तयारी
येँ / (सन्ध्या टाइम्स) प्रधानसेनापति रुक्मांगद कटवालयात चीकेगु धकाः माओवादी नेतृत्वया सरकारं यानातःगु निर्णययात आः एमालेया नेतृत्वय् गठन जूगु सर-कारं बदर यासें राष्ट्रपतिया पलाःयात अनुमोदन याःगुलिं माओवादीं विरोध प्वंकूगु दु । थौं च्वंगु माओवादी पोलिटब्यूरो बैठकं मन्त्रिपरिषदं आः याःगु थ्व निर्णय नागरिक सर्वोच्चताया विरुद्ध खः धासें उकिया विरोध याःगु खः ।
वर्तमान सरकारं याःगु थ्व निर्णयया विरुद्ध माओवादीं अझ कडा आन्दोलनया ज्याझ्वः घोषणा याये फइगु खँ माओवादी प्रवक्ता दिनानाथ शर्मां कनादीगु दु । सरकारं याःगु थ्व निर्णय बारे थौं 'सन्ध्या टाइम्स' लिसे खँ ल्हासें वय्कलं धयादिल 'पार्टीया पोलिटब्यूरो बैठक जुयाच्वंगु दु थ्वहे बैठकं न्हूगु चरणया आन्दोलनया घोषणा याइ ।'
पार्टी प्रवक्ता शर्मां वर्तमान सरकार नागरिक सर्वोच्चता विरुद्ध सैनिक सर्वोच्चता कायम यायेत न्ह्यचिलाच्वंगु द्वपं बिसें आःया निर्णय नं वहे दिशपाखे न्ह्याः वनाच्वंगु खँ नं कनादिल ।
'सरकारं याःगु थ्व निर्णय धइगु शान्ति प्रक्रियायात निष्कर्षय् थ्यंकेगु मखुसें शान्ति प्रक्रियायात दथुइ हे त्वाःल्हानाः गृहयुद्ध यायेगु ज्याया हे तयारी खः' वय्कलं धयादिल ।
सेनाया बन्दुक क्यनाः देशय् अधिनायकवाद क्वचिनेत स्वयाच्वंगु दु धासें वय्कलं राष्ट्रियता व सार्वभौमसत्ताय् कांग्रेस व एमालें खेलवाद यानाच्वंगु द्वपं नं बियादिल ।
उखे एमालेया थौं च्वंगु संसदीय दलया बैठकय् नं प्रधानसेनापति प्रकरणय् सरकारं याःगु निर्णययात सभासद्तय्सं विरोध याःगु दु । सभासद्तय्सं राष्ट्रपतिया गलत पलाःयात साथ बियाः एमालें उकियात संस्थागत याःगु द्वपं बिउगु दु ।
म्हीग च्वंगु एमाले संसदीय दलया बैठकय् नं सभासद्तय्सं राष्ट्रपतिया पलाः व उकी पार्टीं ज्वंगु नीतिया कडा आलोचना याःगु खः । तर सभासदतय् विरोध दुसां पार्टीया सरकारं धाःसा निर्णय यायेधुंकूगु दु ।
एमाले संसदीय दलया बैठकय् सभासद्तय्सं न्यंगु न्ह्यसःया लिसः प्रधानमन्त्री माधव नेपाल व पार्टी अध्यक्ष झलनाथ खनालं बियादीगु ज्याझ्वः दु ।
