मोजा गबलय् थ्यनीगु ?

शुक्रबाः पितं पिदनीगु तँसापौ चाकःलि पांपां अले मस्तय्त दइगु अन्ताक्षँरी व नां लुइकेगु कासा अले तःधिकःपिनि लागिं क्वथा कासा नां लुइकेगु कासा म्हिताः जिगु छेँजःया मस्तय्सं लत्याया दुने प्यजु मोजा लाकेधुंकल । थःगु नामय् पुरस्कार लात धकाः गुलिं लय्लय् ताःगु खः तर लाःगु पुरस्कार धाःसा आःतक ल्हाती मलाःगुलिं मस्तय् ख्वाः हे खिउँसे च्वनेधुंकल । पत्रिका बिउझाइम्ह भाइनं न्ह्याबलें न्यंसां मवःनि धकाः लिसः बीगु थौंकन्हय् दक्व दक्व थिके जुयाच्वंबलय् झन पुरस्कार बीगु अप्वयेकेमाःथाय् लाःगु सिरपाः तक नं गय् जुयाः ढिला जूगु सीके दइला थे जिमित जक मखु मेमेपिं नं गुलिखे पासापिंसं सन्ध्या टाइम्सं सिरपाः लाःगु मोजा बिया महः धकाः धयाच्वंगु न्यनागु दु । सिरपाः लाःपिंत नापं छाय् अथे सिरपाः मबिसे च्वनाच्वंगु खः मसिल । छाय् अथे जूगु खः सीके दःसा जिउ ।

अले थौंकन्हय् 'सन्ध्या टाइम्स' न्हिपती गबलें आखःग्वः द्वनाच्वंगु गबलें मिति द्वनाच्वन धकाः नं खँ पिहां वयाच्वंगु दु । थज्याःगु खँयात कयाः वःगु पौ व थीथी न्ह्यसःयात कयाः नं लिसः बियादीत इनाप यानाच्वना ।

- कृष्णमान डंगोल, मखंगल्ली, तुन्छेबहाः ।

(थौंकन्हय् करेन्टया अनियमितताया कारणं मोजा उत्पादनया ज्याय् नापं लिच्वः लानाच्वंगु दु । थुकिं यानाः कारखानापाखें माक्व मोजा उत्पादन मजूगुलिं सिरपाः त्याकूपिंत नं इने मफयाच्वंगु जानकारी जिमित प्राप्त जूगु दु । मोजा थ्यनेवं उपलब्ध याकेगु हे जुइ । सुभाय् । - सं.)

More Stories Like this