नायःतय्गु असक्षमता

दकलय् जेठाम्ह स्वयम्भूया ज्ञानमाला भजन खलकय् अप्वया वनाच्वंगु बेथिति निम्ह दाजुकिजाया मनपरि बारे आपालं खँ ब्वनाच्वना । तर लिसः बीमाःम्ह मनूयाके आँट मदयाः खः ला थौं तक छगू हे न्ह्यसःया प्रस्ट लिसः ब्वने मदुनि । थुज्वःगु हे बेथिति व मनपरि जुयाच्वंगु मेगु भजन खलःया नां अन्नपूर्ण ज्ञानमाला नं खः । थुकिया विधिपूर्वक सदस्य गुलि दयेकल खलःया नियम वा ल्यज्या यायेगु विधान छु दु धइगु खँ स्वयं थुकिया पदाधिकारी थःपिंसं हे मसिउ ।

थुज्वःगु हे मनपरितन्त्रया शिकार जूगु मेगु संस्थाया नां खः उदाय् समाज । छम्ह सह्दयीम्ह दातां भिंगु ज्या याःम्हेसित दँय्दसं निइन्याद्वः साइदां व हनापौ बीगु इच्छा जाहेर यानाः स्वंगू लाख दां उदाय् समाजया खाताय् जम्मा याना बिउगु स्वदँ दयेधुंकल । तर आःयाम्ह नायः नं थुगु मुद्दति खाताया ब्याज आर्जन यायेगु सिबे दँमुज्या यानाः ल्वःम्ह व्यक्तियात सिरपाः बीकेगु पाखे भ्याः हे मन मबिउ । आखिर बाधा छु व खँ समाजया दुजःतसें नं मसिउ ।

- उपासक उदास, येँ ।

More Stories Like this