सालीकय् रंग छाय् ?

नेपाः एकीकरण याःम्ह धाःम्ह जुजु पृथ्वी नारायण शाहया सिंहदरवारया पिने च्वंगु सालीकयात रंगरोगन यानाः बांलाकाच्वंगु फोटो पत्रपत्रिकाय् पिहां वयाच्वंगु दु । थौंकन्हय् ला जुजुपिनिगु सालीकय् तोडफोड याः वइ धकाः प्रहरी हे पाः तयाः सुरक्षा यानाच्वंगु दु । सरकारं हे खटे यानातःपिं सुरक्षुकर्मीत खः थुपिं । थ्व प्रहरीतय्सं अज्याःगु सालीकय् सुयातं थीके तकं बी मखु । थज्याःगु सालीकय् थौं न्ह्याम्हं वनाः रंगरोगन हे याये दु धायेबलय् थ्व ला अचम्म हे जुल । पृथ्वीनारायण शाहया सालीक तोडफोड याः वंसा तुरुन्त हे ज्वनीगु खः । तर वहे सालीकय् रंग पानाः रंगीचंगी याःगुलिं धाःसा सुनां नं छुं मधाः । खुरुक्क याःयाः थे याका तल । याने कि पृथ्वीनारायण शाहया सालीकय् रंगरोगन याः वंगु चाहिं थ्व सरकारयात नं तसकं यःगु हे जुयाच्वन जुइ । मखुसा सालीकय् थिउ वनीपिंत ज्वनेगु अले वहे सालीकय् रंगरोगन याःवंपिंत मज्वनेगु गज्याःगु नीति खः ? हानं मेगु छता खँ धायेबलय् सालीक धइगु थथे ह्याउँक वाउँक रंग पानाः तया तइगु नं मखु । पिनें वईपं मनूतय्सं स्वयेबलय् थ्व ला सरकारं हे पाका तःगु धकाः च्वनी । उमिसं ला नेपाःया सरकार क्या बेवकुल खिनं सालीकय् ला रंग पाका तईपं धकाः थुइका वनेफु । सरकारया सम्बन्धित निकाय वनाः तुरुन्त हे अज्याःगु रंग हुया छ्वयेगु व मफुसा सालीक लिकया छ्वयेगु ज्या यायेमाःगु दु ।

- विश्वभू शाक्य
ओमबाहाः, येँ २३ वडा ।

More Stories Like this