नेवाःतय् मंकाः सहकारी मंकाः धुकू

नेवाः जातिया नां कायेबलय् वयागु न्हापांगु परिचय धइगु हे व्यापार वाणिज्यया ल्याखं वइ । नेपाःया मौलिक व्यापारी जाति धईपं हे वास्तवय् नेवाः खः । नेपाः दुने जक मखु नेपालं पिने ल्हासा थेंज्याःगु ख्वाउँगु व तापाःगु थासय् तकं नेवाःतय्सं येँनंनिसें वनाः बनेज्या याःगु दु । ल्हासा थेंज्याःगु थासय् तकं बनेज्या यानाः लबः कायेगु तत्कालिन नेवाः व्यापारीतय् सोच पक्का नं चाःचू मखु ।

नेपाःयात व्यापार व वाणिज्यया ख्यलय् थुभनं च्वन्ह्याकूपिं नेवाःत थौं आधुनिक नेपाःया चकाचौंधपूर्ण बजारय् धाःसा बहनी जक खने दइपिं पुलुपुलुगेरा थें पुलुपालु लुइपिं जातिइ परिणत जू वनेधुंकूगु खनेदु ।

कुहां कुहां वनाच्वंगु नेवाःतय् थ्व आर्थिक स्थितियात ध्यानय् तयाः नेवाः जाति व नेपालभाषा आन्दोलनय् ताः ई न्ह्यवंनिसें समर्पित छथ्वः नेवाः कार्यकर्तातय्सं थुगुसी छगू न्हूगु पलाः ल्ह्वंगु दु नेवाः सहकारी आरम्भ यानाः । उमिसं शुरु याःगु थ्व सहकारीया नां खः - मंकाः धुकू बचत तथा ऋण सहकारी संस्था लि. । न्ह्याबलें साहित्य व मनोरंजनया खँ ल्हाइपिं, न्ह्याबलें आन्दोलन व जुलुसया ग्वसाः दयेकीपिं थ्व नेवाः कार्यकर्तातय्सं थुगुसी आर्थिक गतिविधि नं याइगु न्हूगु संस्था चायेकाः छिउगु पलाः स्वयमय् हे छगू मेगु आन्दोलन खः ।

खतुं देशय् सहकारीतय् ल्याः आः तक २५०० ति दयेधुंकल जुइमाः । मंकाः धुकू वहे २५०० सहकारीया हुलमुलय् पिलू वःगु मेगु छगू सहकारी खः । सहकारी हे जक धायेगु खःसा मंकाः धुकू थ्व २५०० या हुलय् अवश्य गुमनाम जुइ । तर थ्वं ज्वना तःगु उद्देश्य, थुकिया आज्जु व थ्वं दयेकूगु ज्याझ्वः नं दुग्यंक स्वयेगु खःसा देशय् वयेधुंकूगु २५०० सहकारीइ थ्वहे छगू जक अज्याःगु सहकारी जुइ गुकिं नेपाःया पुलांगु ब्यापारिक जाति नेवाःयात हानं छक्वः आर्थिक गतिविधिइ इमामन्दः कायेकेगु ज्या याइ ।

खतुं झीथाय् नेवाःतय् हितय् ज्या याये धकाः वःगु सहकारी थ्वहे न्हापांगु धाःसा मखु । भिंतुना सहकारी, महागुथि सहकारी आदि छुं अज्याःगु नां खः गुकिं नेवाः आर्थिक गतिविधियात गति बियाः न्ह्याकेगु उद्देश्य तयातःगु दु । फरक थुलि जक खः कि मंकाः धुकू सहकारीइ अज्याःगु उद्देश्य ज्वनेगु जक मखु उकियात कार्यान्वयन यायेगु व्यावसायिक हैसियत दुपिं दुजःत नं संलग्न जुयाच्वंगु दु । आर्थिक गतिविधिया खँ ल्हायेबलय् उकी भावना जक दयां मगाः उकियात ल्वःगु कुशलता व व्यावसायिक क्षमता नं दयेमाःगु जुया बी ।

अथे धकाः आः मंकाः धुकू दयेधुंकूगुलिं नेवाःतय् आर्थिक उत्थानया ताः तयाः चायेकातःगु मेमेगु सहकारीया आवश्यकता मंत धायेत्यनागु मखु । झीत मंकाः धुकू छगू जक दयां मगाः । दुगु मेमेगु सहकारीइ नं व्यावसायिक क्षमता बढे यानाः नेवाःतय् आर्थिक गतिशिलतायात अझ च्वन्ह्याकेगु ज्या यायेमाः ।

मंकाः धुकू मेमेगु सहकारी स्वयां फरक जुयाः पिहां वइ व थ्वं मेमेपिंसं स्वयां बिस्कं कथं ज्या याइगु खँ थुकिया अध्यक्ष रमेशकाजी स्थापितं कनादीगु दु । भाजु स्थापित सन्ध्या टाइम्स नेपालभाषा न्हिपौ शुक्रवाः तँसापौया संयोजक व सन्ध्या टाइम्सया प्रकाशन संस्था अर्थ-पिथना प्रकाशन प्रा.लि.या कजि नं खः । मंकाः धुकू वय्कःया हे कुतलय् सन्ध्या टाइम्सया पहलं आरम्भ जूगु खः । थुकी नेपाःया नांजाःपिं होटल व्यवसायी, बैंकस्र, आर्थिक विश्लेषक, ट्राभल व्यवसायी आदिपिं संलग्न जुयाच्वंगु दु । वय्कःपिनिगु अनुभव, कुशलता व क्षमता हे थ्व सहकारीया ज्यान जुइगु खँय् शंका मदु ।

More Stories Like this