देय्न्यंकं सरकारी ज्याकू ठप्प
प्रहरी हस्तक्षेपय् आपालं कार्यकर्ता घाःपाः
येँ / (सन्ध्या टाइम्स) माओवादी नेतृत्वया सरकारं प्रधानसेनापति रुक्मांगद कटवालयात चीकेगु धकाः याःगु निर्णययात वर्तमान सरकारं हीकूगु विरोधय् थौं माओवादीं देय्न्यंकंया सरकारी ज्याकुथी सुथय् १० निसें १२ बजे तक धर्ना बियाः सम्पूर्ण ज्या प्रभावित यात ।
थौं सुथय् सिंहदरवारया प्यखेरं घेरे यानाः सिंहदरवार दुने सरकारी कर्मचारीतय्त दुत मछ्वःगु खः । सिंहदरवार घेरे यायेगु झ्वलय् माओवादी सभासद् व पुलांम्ह मन्त्री हिसिला यमिया नेतृत्वय् वंगु छगू जुलुसं सिंहदरवारया निषेधित क्षेत्र तोडे याःगु खः । थ्व झ्वलय् जूगु ल्वापुइ लानाः सभासद् सहित कार्यकर्ता व स्वम्ह फोटो पत्रकार घाःपाः जूगु दु । निषेधित क्षेत्रय् दुहां वःपिं माओवादी कार्यकर्तायात पनेगु झ्वलय् प्रहरीं बल छ्यलेवं अन निथ्वःसिया दथुइ छझाः अप्पां कयेकाः ल्वापु जूगु खः ।
उगु ल्वापुइ लानाः सभासद् डबलबहादुर शाह घाःपाः जूगु दु । शाहयात छ्यनय् घाः लाःगु दुसा स्वम्ह फोटो पत्रकारत निरज, सापकोटा विजय राई व बालकृष्ण थापा नं घाःपाः जूगु दु ।
अथे हे काभ्रे, मोरङ, बैतडी व रामेछापय् नं माओवादी कार्यकर्ता व प्रहरी दथुइ ल्वापु जुयाः छुं कार्यकर्ता घाःपाः जूगु दु । काभ्रे जूगु ल्वापुइ लानाः माओवादी कार्यकर्ता राजकुमार राई सहित प्यम्ह घाःपाः जूगु दुसा मोरङय् जूगु ल्वापुइ सदम यादव लगायत खुम्ह घाःपाः जूगु दु । अथे हे रामेछापय् नं जिल्ला प्रशासन कार्यालय घेरे यायेगु झ्वलय् जूगु ल्वापुइ लानाः छम्ह कार्यकर्ता घाःपाः जूगु दु ।
माओवादीं थौं सुथय् १० बजे निसें सिंहदरवार लागाय् अवरोध यायेवं उगु लागा जुयाः चले जुइगु यातायात पूर्ण रुपं प्रभावित जूगु दुसा गुलिखे ज्याकुथी वनेमाःपिं कर्मचारीत न्यासि वनाः हे थःगु गन्तव्यय् थ्यंकः वंगु दु ।
माओवादी कार्यकर्तातय्सं थौं धनकुटा रामेछाप आदि जिल्लाया सीडीयो ज्याकुथी तालं समेत ग्वयाः ज्या दिका बिउगु खः ।
सिंहदरवार घेरे यानाः सुयातं दुत मछ्वःगुलिं थौं सुथय् भारतीय विदेश सचिव शिवशंकर मेननं नेपाःया मन्त्रीत नापलायेगु ज्या तकं प्रभावित जू वन ।
सरकारय् दुमथ्याःपिं मधेशवादी पार्टीतय्सं थौं सरकारय् वनीपिं मन्त्रीतय् नां बिल धाःसा प्रधानमन्त्रीं थौं हे उमित सपथ ग्रहण याकेगु धकाः ग्वसाः दयेकातःगु खः । तर थौं माओवादीया धर्नां यानाः थ्व ज्या नं प्रभावित जूवंगु दु ।
