नेतातय्त छु धायेगु ?

डी. आर. खडगे

साधारण जनतां नं सिउगु खँ खः विदेशी राष्ट्रं झीगु देशय् वयाः विकास याइ मखु । विदेशी राष्ट्रं विकास ला याइ मखु विनाश चाहिं अवश्य याना वनी । विनाश यायेत निगू तरिका छ्यली । छगू प्रत्यक्षँरुपं सैनिक हस्तक्षेप यानाः ध्वस्त यायेगु गथे इराक व अफगानय् यात । मेगु खः दलालत तयार यानाः प्राकृतिक श्रोत ल्हातय् लाकाः देय् बर्बाद यायेगु । झीगु देशय् प्रत्यक्षँ सैनिक हस्तक्षेप विदेशं यानाच्वंगु खने मदु । अप्रत्यक्ष रुपं दलाल नेतात तयार यानाः सत्ताय् छ्वया स्यंकाच्वंगु धाःसा खनेदु । झीगु देशय् जनताया नामं धकाः स्वकः संघर्ष यानाः नेतातय्सं शासन यायेधुंकल । २००७ सालय् संघर्ष यानाः राणा शासन अन्त यात । संघर्ष यानाः वःपिं नेतात असक्षँम अदुरदर्शी व स्वार्थी जुयाच्वंगु कारणं देय्यात बिकास मखु स्यंका वन धायेमाः । व हे इलय् छुं भचा दँया फरकय् भारत व चीनय् नं संघर्ष यानाः सत्ताय् वःपिं नेतात सक्षँम दुरदर्शी व सकारात्मक सोच दुपिं जूगुलिं देय्या बिकास यानाः जनतायात सुख शान्ति व आनन्द बीत कडा परिश्रम याना वन ।

झीगु देशय् ००७ सालया संघर्षं राणातय् यकःति शासन ला पतन यात तर देय् धाःसा स्वतन्त्र जुइ मफुत । झन अर्ध उपनिवेशय् लात । ००७ सालया जनसंघर्ष भारतया आशिर्वादं सफल जूगुलिं भारतं थनया नेतातय्त थःगु इशाराय् प्याखं हुइका तल । यदि प्याखं हुलेत तयार मजुल धाःसा भारतं सरकार क्वःथलाः मेम्ह नेता तयार याइ । राणा शासन पतन जुइसातकि भारतं दबाव बियाः सन् १९५० या सन्धि याकल । ५० या सन्धिया छुं छुं बुँदात नेपाःया लागिं कालकुट विष थें जुयाच्वंगु दु । व छु धाःसां भारतया नागरिकयात नेपाःया ठेक्कापट्टा यायेत सुविधा व सहुलियत बीमाःगु प्रावधान । मेगु रक्षा थेंज्याःगु मामलाय् भारतनाप सल्लाह कयाः ज्या यायेमाःगु । यदि नेपाःयात रक्षा सामग्री माल धाःसा भारतयाके अनुमति कयाः जक झिके यायेमाःगु । मेगु बुँदा खः भारतया नागरिकं नेपाःया छेँबुँ न्याये-मी याये दइगु व्यवस्था । ५० या असमान सन्धिं यानाः देय् कमजोर जुजुं वनाच्वंगु जक मखु । राष्ट्रभक्त नेतात नं कमजोर जुजुं वनाच्वन । २००७ साल धुंकाः हानं २०४६ सालपाखे बहुदलवादी पार्टीतय्सं भारतया ग्वाहालि कयाः बहुदलीय व्यवस्था हल । तर थ्व व्यवस्थां नं देय्यात कल्याण यायेगु मस्वसे खालि भारतयात लय्तायेकेगु ल्याखं जलश्रोतया अधिकार धमाधम भारतयात लःल्हात । भारतयात जलश्रोतया अधिकार बी मजिउ धकाः कडा अडान कयाच्वंम्ह वाम नेता मदन भण्डारीयात स्वदेशी व विदेशी षडयन्त्रकारीतय्सं हत्या याना बिल । २०४६ साल धुंकाः स्वक्वःगु जनसंघर्ष २०६२/०६३ जूबलय् नं नेतात दिल्लीइ जुजुयात चीकेगु संघर्ष यायेगु प्रतिवद्धता प्वंकल । तर दिल्लीया आन्तरिक चाकः दुने च्वनाः भारतनाप छु छु सम्झौता याना वःगु खः नेतातय्सं अझं स्पष्ट मयाःनि । सम्झौता याना वःपिं नेतात मौन च्वनाच्वंगु दु गुगु तसकं खतरनाक जू । ०६२&/०६३ सालया सफल संघर्ष धुंकाः भारतया राजदूत व नेतात खुल्लारुपं नेपाः वयाः खेल म्हिताच्वंगु दु । ००७ साल व ०४६ सालपाखे भारतीय नेतात थपाय्च्वः खेल म्हितावंगु खने मदु । स्वक्वःगु आन्दोलन लिपा भारतं नेपाःया राजदूतयात राज्यपालया दर्जा बियाः ज्या याकातःगु दु । नेपाःया राजनीतिइ भचा जक गोलमाल जुल कि राजदूतयात नेतातय्थाय् छ्वयाः समस्या समाधान याके बी । विदेशी राष्ट्रया थज्याःगु राजनीतिक खेलं छु संकेत क्यनाच्वंगु दु धाःसा नेपाः अझ नं स्वतन्त्र राष्ट्र जुइ मफुनि । जुजुया शक्ति कमजोर जुइसातकि नेतातय्सं भारतं धाःथे स्वंगू ततःधंगु ज्या याना वल नागरिकता विधेयक पास यानाः भारतीय नागरिकयात नं नेपाःया नागरिकता बीकाः देय्यात फिजीकरणया लँय् यंकेगु खेल जुयाच्वंगु दु । मेगु पार्टीतय्सं भारतीय मूलबासीया राजनीतिक खेलाडीतय्त सभासद दयेकेमाःगु व्यवस्था यानातःगुलिं संसदय् निसः सभासद मधेशी थ्यनेधुंकल । मेगु खतरनाक खँ खः मधेशीवादीतय्सं तराईलय् हत्या, हिंसा, लुटपाट व विखण्डकारी ज्या याःसां नेपाःया सेना परिचालन याये मदइगु शर्त नेतातय्सं स्वीकार यानावल । थ्वहे कारणं तराईलय् नेपाःमित च्वने मफइगु अवस्था वयाच्वंगु खः । मधेशवादी विखण्डन यायेत स्वयाच्वंगु कारण नं थ्वहे खः । तराई छगू विखण्डन जुइसातकि मेमेगु जिल्लाय् शुरु जुइ ।

झीगु देशय् भारत व अमेरिकां मिखा तयाच्वंगु कारणत यक्व दु । उकी मध्यय् छगू महत्वपूर्ण कारण खः सच्चा कम्युनिष्ट व देशभक्त नेताय्त माइनस यायेगु । सच्चा कम्युनिष्ट व देशभक्तत न्हना वन कि तिब्बतय् टेन्सन बीत अःपुइ । भारतं नेपाःया लः व रक्षा थःगु ल्हाती लाकेत थनया फुक्क नेतायात थःगु इशाराय् प्याखं हुइकाच्वंगु खः । लःया अधिकार धमाधम कब्जा यायां वनाच्वंगु दु । आः रक्षा व आन्तरिक मामिला कब्जा यायेगु रणनीति म्हिताच्वंगु दु । तराईया सिमानाय् न्यय्द्वः सीमा सुरक्षा बल तैनाथ याये हःगु थ्वहे प्रयोजनया निंतिं खः । नेपाःया सीमा मिचे यानाः ततःधंगु बाँध दयेकाः जनतायात दुःख बीगु व थन भारतीयत बसोबास याकेगु उमिगु ग्वसाः खः । यदि अथे मखुसा मित्र राष्ट्रया सिमानाय् छाय् उलिमछि सेना तैनाथ यायेमाल ?

भारतं थःगु सिमानाय् न्ह्याक्व हे सीमा सुरक्षु बल तैनाथ याना च्वंसां झीत मतलब मदु । तर थुकिं नेपाली जनतायात डर त्रासया वातावरण धाःसा सृजना याये मजिउ । खः भारतं थःगु स्वार्थ कथं थीथी गतिविधि न्ह्याका च्वनेफु । तर नेपाःया साधारण जनता सावधान जुइमाःगु दु नेपाःया हे नेतातपाखें । छाय्धाःसां भारतं न्ह्यागु हठकण्डा मचे याःसां तमाशे जक जुयाः स्वयाच्वनीपिं नेतात नेपाःयापिं हे खः । भारतं न्ह्यागु याःसां छुं मधासे च्वनीपिं नेपाःया नेतात नेपाःया अपमान याइम्ह भारत स्वयां नं अप्वः दोषी व खतरनाक जू ।

More Stories Like this