होसियार नेता भाजुपिं

अनाम

नेपाःया पार्टीतय् सहमति दुने लिकुनाच्वंगु असहमति थौं वयाः छ्यातां जुया बिउगु दु । सकल पार्टीया नेताय्सं झिंनिगू बुँदाया सहमति ज्वनाः देशय् वःगु लोकतान्त्रिक गणतन्त्रया न्हापांम्ह सरकार माओवादी जुइ साथ नेपाली कांग्रेसं सहमति दुनेया असहमति क्यन । नेपाली कांग्रेयात सहमतिया सरकारय् दुकायेत याःगु कुतः ताःमलात । श्रीमान गिरिजा बाबु प्रतिपक्षी वा प्रमुख विरोधी जुयाः च्वनेगु निर्णय यात । शायद सहमति दुने लिकुनाच्वंगु असहमति पिज्वःगु थ्वहे न्हापांगु घटना जुइ ।

प्रचण्ड सरकारं नं सहमति सहमति धाधां आखिरय् असहमतिया कारणं क्वःदल । छम्ह सैनिक कमाण्डरया खँय् सहमति जुइ मफुत । माओवादी त्वःताः ल्यंपिं नीस्वंगू पार्टीतय् सहमति कथं माधवकुमारय् नेपालया सरकार नीस्वन तर ताःलाःगु मखुनि । छाय् थ्व न्ह्यसःया लिसः सकसिनं सिउ । वयां लिपा फोरम कुचा दल । गच्छदार व हे स्वार्थया लागिं पार्टी व पार्टीया निर्णय विपरित सरकारय् दुहां वन । हानं प्रधानमन्त्री जुम्ह माधव नेपाल छखे व छथ्वःया जक खँ न्यन पार्टी थौं वयाः स्वयं माधव नेपालयात फोरम कुचा थःगु आरोप वल ।

अनंलि प्रजातान्त्रिक धाःगु नेपाली कांग्रेस दुने झन हे असन्तुष्टि ब्वलन । अय्सां झुलय् पिने न्ह्याक्व असंतुष्टिया म्ये हाःसां दुने वनाः गिरिजाया न्ह्यःने हालेगु आँट सुयां मदु । म्हुतु छप्वाः पारापारा गिरिजाया ज्या खुरुखुरु । थौंया ज्यामिछंगु इलय् सरकार दयेकेगु गिरिजा छखे च्वनाबिल । भिंसा जस काइम्ह मिभंसा एमालेया छ्यनय् दिकीम्ह । एमालें छु सरकार दयेके दत धायेवं लिपाया बिचाः मयासे सरकारय् च्वं वनेगु ला हानं न्हापां गथे माओवादीया सरकारय् नेपाली कांग्रेस प्रतिपक्षय् च्वन थौं एमाले सरकारय् माओवादी विरोधी जुयाः पिहां वल । सतक सदन निथासं संघर्ष यानाः क्यन । स्वये ल्यं दनि थ्व सघर्षय् माओवादी ताःलाइकि माधव कुमार नेपाल ।

नेपाली जनतां यक्व संघर्ष यायेधुंकल । राणाकाल निसें ज्ञानेन्दं काल तकया दुने सलंसः शहिद जुइ धुंलःसा द्वलंद्वः बलिदान बीधुंकल । थौं देशय् गणतान्त्रिक लोकतन्त्रं वयां नं जनताया ल्हातय् शुन्य । मात्र नेतातय् जक प्वाः जाः अझ नं स्वार्थया लागिं नेपाली जनतायात क्रान्तिया आह्वान यानाच्वन तिनि । आः थन छाय् हानं क्रान्ति नेपाली जनतां क्रान्ति यानाः ज्यान पानाः गणतन्त्र हया बिसेंलि ला बांलाक ज्या यानाः संविधान दयेकेमाःगु खः नि । न्ह्याबलें न्ह्याग्गु ज्याय् नं छम्ह कि छम्ह बिकः जुयाः पिहां वये मजिल ।

न्ह्याबलें सरकार नीस्वने त्यलकि वयात गृह वयात अर्थ वयात जलस्रोत धकाः कचवं पिकायेधुंकी छाय् मन्त्रालय न्ह्याग्गु जूसां बांलाक ज्या यानाः क्यनेगु खः । न्ह्याग्गु मन्त्रालयय् न्ह्याग्गु ज्या याःसा मन्त्रिमण्डल पाखें यायेगु खः । अले दः फलाना मन्त्रालय हे माः धायेगु छाय् सकसिनं सिउ नये दइगु त्वने दइगु थः व थःथितिया ग्वाय्पी दइगु मन्त्रालय दःसा खुशी । न्ह्याम्हेसिनं न्ह्याग्गु मन्त्रालय काःसां ज्या ला मन्त्रिमण्डलया खः । बार्गेनिङ छाय् वहे नये त्वनेया लागिं मखु ला ? मखु धइगु खःसा सहमति व सहकार्य कथं सहलह यानाः ल्वापुख्यापु मयासे सरकार न्ह्याकीम्ह सरकारया जिम्मा काइम्ह प्रधानमन्त्री वा वइगु पार्टीपाखें बीगु मन्त्रालय स्वीकार यायेमाः । हानं प्रधानमन्त्री नं थः जक प्वः मचिउसे सहचारी पार्टीतय्त नं उत्ति खनेमाः । थज्याःगु व्यवहार खःसा धकाः सहमति सहकार्य धाइ । अन्यथा सरकारय् जिगु तःधंगु रोल दु जिमिसं त्वःतल कि सरकार क्वःदली धइगु धम्की बियाः जिमित थ्व हे मन्त्रालय माः धकाः धायेगु खःसा व ला सहमति मखुत नि । व ला बार्गेनिङ हे जुल ।

नेतातय्गु थ्व लोभि पापी बानीं यानाः जनताया तसकं तं पिहां वयेधुंकल । आः नेतातय्सं बांलाक होस या । सावधान जु । मखु धइगु खःसा आःया क्रान्ति गुगुं पार्टीया सर्वोच्चताया लागिं जुइ मखु । थज्याःपिं लोभि पापी नेतातय् सफायाया लागि व नेतातपाखें जोगे यायेगु लागिं जुइ । धात्थें धायेमाल धाःसा नेपाःया सैनिक तसकं ज्ञानी । नेतातय् थज्याःगु पहः व खिचातानी मेथाय् देशय् जूगु जूसा अन सैनिकं तुरुन्त शासन कब्जा यायेधुंकल जुइ । अज्याःगु उदाहरण पाकिस्तानय् इलय् ब्यलय् जुयाच्वंगु दु । हानं सकल नेतातय्सं सिउ जब सैनिकं सत्तँया सवाः काइ याउँक त्वःती मखु । नेपाली जनताया सह यायेगु सीमा पुलावन धाःसा जनतां नेतातय् सफाया यायेगु पलाः न्ह्याके माली ।

नेपालय् आः सुनां नं क्रान्तिया आह्वान यात धाःसा थ्व हे छगू ज्याया लागिं जूसा जक नेपाली जनता दनी । नेपाःया भविष्यया क्रान्ति थ्वहे जुइमाः । थुज्वःगु हे क्रान्ति लिपा वःपिं न्हूपिं नेतातय्सं दयेकी न्हूगु नेपाल ।

More Stories Like this