८३ दँया ल्याय्म्ह भन्ते अश्वघोष

प्रेमलक्ष्मी तुलाधर

पूज्यनीय भिक्षु अश्वघोष महास्थविर भन्ते वि.सं. १९८४ साल जेठ ३१ गते सोमवाः कुन्हु यलया ओकुबहालय् बा चन्द्र ज्योति शाक्य व मां लक्ष्मीमाया शाक्यया कोखं चीधिकम्ह काय् जुयाः जन्म जूगु खः । वसपोल भन्ते सरल नरम तरिकां ध्वाथुइक उपदेश कनाबिज्याइम्ह न्ह्याबलें बुद्धं कनाबिज्याःगु धर्मयात मनन् यानाः थुइकाः थःगु जीवनय् बांलाक छ्यले सयेकाः आचरण स्वभाव भिंकेमाः धकाः उपदेश बियाबिज्याइम्ह भन्ते खः ।

उलि जक मखु जीवन व करपिनिगु जीवनयात सुख बीगु खःसा बानी ब्यहोरा बांलाकेमाः ज्या ढंग दयेकाः याये सयेकेमाः मन शुद्ध यायेमाः मनं खंकाः ज्या याये सयेकेमाः नैतिकता दयेकेमाः धकाः न्ह्याबलें उपदेश बियाबिज्याइ । थज्याःगु ज्ञानयात बांलाक मनं थुइकाः व्यवहारय् छ्यले सयेकेमाः स्यना भत्तु जुइ मजिउ । थम्ह थू थें करिपंत नं उपकार जुइगु ज्या यायेमाः धयाबिज्याइ । भन्तेयागु उपदेश न्यनेबलय् मन हे याउँसे च्वं । खतुं मन जक याउँसे च्वंकेगु मखु उपदेशयात व्यवहारय् छ्यलाः ज्या यात धाःसा जक धाथें भन्तें धाःगु न्यंपिं जुइ ।

भन्तें धयाबिज्याइ 'फुकेसित तं पिकाये मजिउ धकाः धाइम्ह जितः नं तं वये यः । झोके जुइगु बानी दु । जिगु बानी खनीबलय् जितः मछाःसे च्वं ।' थ्व भन्तेयागु विशेषता खः । भन्तेयागु मेगु विशेषता खः ईयात तसकं ख्याल यायेगु । धाःगु इलय् ठ्याक्क ज्याझ्वः न्ह्याःसा लय्तायाबिज्याइ नत्रसा धाथें झोके नं जुइ । छक्वः धर्मकीर्ति विहारय् छगू ज्याझ्वलय् भन्तेयात सःता हजि धाल । जिं भन्तेयात सःताः बिज्याका तर ज्याझ्वः शुरु जूगु धाःसा १ घण्टा लिबात । भन्तेयात उकुस मुकुस जुल थें । जितः स्वयाः 'थ्वं यानाः का ई मस्यूम्ह' धयाबिज्यात । जि ला मछालाः गुलि तक ला भन्तेया न्ह्यःने वने तकं मफु । उलि जक मखु भन्तें सरल व नाइसेच्वंगु भासं ब्वनीपिनिग नुगलय् ध्वाथुइक च्वसु व सफू च्वयाबिज्याइगु नं वसपोलया मेगु विशेषता खः ।

न्हापा जि मां लक्ष्मीनानी तुलाधरं नं धयादी भन्तेनं मधया थें च्वंक धाइगु मन्यंकू थें च्वंक न्यंकीगु मनय् दुने थ्यंक थुइक धर्मदेशना यानाबिज्याइगु गुलि जक बांलाः गुलि जक हिसि दु । आः वयाः जिगु न्ह्याय्पनं ताःगु बखतय् धाथें खः धयागु मनं ताल ।

न्ह्याबलें भगवान बुद्धया उपदेशयात व्यवहारिक जीवनय् छ्यले सयेकेमाःगु खँयात बाखंया रुपय् कनेगु भन्तेया विशेषता खः । भन्तेयागु उपदेश न्यनागु बखतय् झन हे ध्वाथुइक मनं थुल । अथे जूगुलिं ला भन्ते छम्ह अभिभावक गुरुया रुपय् सकस्यां यः ।

खुइन्यादँ ताःहाकःगु प्रवज्या जीवनय् भन्तेया त्याग तपस्या खनाः ह्दयया दुनेंनिसें मैत्री श्रद्धां जाःगु भावनां वसपोलयात सकस्यां सम्मान प्रकट याइ । थौं ८३ दँया ज्याथ वैंशय् नं वसपोलया उत्साह व जोशं वसपोलयात ज्याथ मयाःनि । थौं तक नं वसपोलया सकि्रयता बुद्ध शासन थातं लाकेत कायम हे जुयाच्वंगु दनि । वसपोलया थ्व उत्साह ल्याय्म्हिपं उपासक उपासिकापिनि लागिं नं उलि हे उत्प्रेरक जुयाच्वंगु दु ।

More Stories Like this