जातः छाय् च्याके माःगु ?

झीगु समाजय् सीम्ह नापं तयाः जातः नं उनाछ्वइगु चलन दु । थ्व चलन जितः ठीक मताः । अथे हे सीगु छेँय् द्यःपिंगु मूर्ति तस्वीर स्वयेगु न्हाय्कं तक नं त्वपुइ । चिबाहाः चैत्य नं कापतं त्वपुइ । सिथं यंकीगु लँय् ध्वदुइगु देगः चिबाहाः चैत्य अःखतं चाःहीकाः यंकी । न्हापा सीम्ह कुबियाः तां यंके मजिउ धइगु तक नं मान्यता दु । खुसिबाः वयाच्वंसा खुसिबाः कम मजूतले खुसि सिथय् पीमाः धाइ । आः थ्व मान्यता त्वाःथलाः ताँ द्यःनें सिथं यंकेगु जुइधुंकल । मगाः-मचाः माछि-ताछिंयात ई ल्वय्क हिलेगु सुधार खः ।

वंगु वालय् लुति धल्को संघाराम विहारया संस्थापक दातामां अनगारिका धर्मरक्षिँता गुरुमां मंत । वसपोलया दाहसंस्कार प्रवर्जित दीपय् मजुसे कर्णदीपय् जुल । वसपोलया स्याःन्याःपिं थःथितिपिं नापं बिहारया उपासक उपासिका भन्ते अनगारिकापिं नं आपालं बिज्याःगु खना । वसपोलया सीम्ह पुष्पक विमानय् तयाः सिथं यंकूगु खः कुताः दयेकाः मखु । पुष्पक विमान विहार विहारय् दयेकाः तया तइगु खः । जिमि मां मदुबलय् नं पुष्पक विमानय् तयाः सीबाजं मथाकुसे सिथं यंकागुली मनूतय्सं 'मगः सी' थें यानाः सिथं यंकल धाःगु टिप्पणी न्यना । थुकी जितः छफुति नं अफसोच मदु ।

थन जिं ध्यानाकर्षण यायेत्यनागु खँ छु धाःसा सीम्ह ब्यक्तिनाप स्वानाच्वनीगु अन्यक तिसा वसः सम्पत्ति छेँ बुँ किपा सिरपाः सौगात क्वसः काय म्ह्याय् कलाः भाःत मां अबु ब्यापार आदि यक्व यक्व चीज वस्तुत दयाच्वनी । उपिं गथे खः अथे हे ल्यंका तये जिउ । तर सीम्हेसिगु जातः सीम्हय् तयाः उना छ्वइ । थथे छाय् यायेमाःगु जातः मउसे छेँय् तुं मदुम्हेसिया लुमन्ति तस्वीर सालिक थें तयातयेगुली छाय् आपत्ति ? जिं थुकिया कारण छु खः धकाः मसिउ । अनुग्रह तयाः सुनानं थुइका बी ला थें ?

जिं च्वय् न्ह्यथना संघाराम विहारया दातामां धर्मरक्षिँता गुरुमांया गुणानुस्मरणया नापं वसपोलं त्वःता थकाबिज्याःगु स्मरणीय वस्तुतः उपहार कोशेली दसिपौ सुभाय्पौ हनापौ आदि आदि मुनाः वसपोलया जन्मपत्री जातः कुण्डलीयात नं यथावत ब्वये दःसा गुलि जी । तर थ्व सम्भव मंत । भगवान बुद्धया जातः नं सायद अथे हे उनाछव्गु ला खइ मखु ला ? तर वसपोलया जातः झीगु न्ह्यःने मदुगु हुनिं अनेक ताक्सिं अडकलबाजी याईपंसं थुगुसी स्वांयाःपुन्हि जःखः 'गोरखापत्र'य् भगवान बुद्धया जन्म बोधिज्ञान प्रँप्त व निर्वाण जुयाबिज्याःगु साल मिति तिथि बार बारे भ्रामक च्वसु च्वयाहःगु खनेदत । तर थनया तथाकथित राष्ट्रिय बौद्ध संघ धाइगु छगू नं संस्थां उकिया प्रतिकार धाःसा मयाः । छाय्कि उकियात पुष्टि याये फइगु भगवान बुद्धया जातः झीके मदु ।

- शान्तराज शाक्य, लगं, येँ ।

More Stories Like this