बांलाः मय्जु वइगु

जुजुमान महर्जन

नेपालभाषाय् छगू न्हूगु संकिपा बांलाः मय्जु वइगु जूगु दु । थौं सुथय् छगू ज्याभुवःया दथुइ दक्षिणकाली मुभिज प्रा। लि।या न्हापांगु नेपालभाषाया संकिपा 'बांलाः मय्जु'या शुभमुहुर्त जुल । इमेज च्यानलया प्रबन्धक रघुवीर भक्त मानन्धरजुं क्लाय्प बियादीगु उगु ज्याभुवलय् विजयरत्न असंबरेंजुं नैक्या तछ्याःगु खःसा नेवाः जागरण माचया नायः सुजीव वज्राचार्यं क्यामेरा अन यानादीगु खः ।

थुगु संकिपाया निर्माता रामकृष्ण धिनाया सभापतित्वय् जूगु उगु ज्याभुवलय् मूपांहा रघुवीर भक्त मानन्धरजुं थज्याःगु ज्यां नेपालभाषाया भाषा संस्कृति ल्यंकेगु ज्याय् तिबः बीगुलिं थुकियात हःपाः बीमाःगु खँ धयादील । ज्याझ्वलय् म्ये हालामि भृगुराम श्रेष्ठ, सभासद दीलिप महर्जन, कलाकार रवीन्द्र खड्का नापं सिलु संकिपाया निर्माता प्रेम बानियाया काय् पद्म बानियापिं पाहां कथं झायादीगु खःसा ज्याझ्वलय् संकिपास म्हितीपिं कलाकारतय्गु नं म्हसीका ब्यूगु खः ।

थुगु संकिपाय् जय श्रेष्ठ, मेलिना मानन्धर, भिन्तुना जोशी, सरस्वति मानन्धर, हृदय प्रसाद मिश्र, सविन शाक्य, गौतम रत्न तुलाधर, रुपेन श्रेष्ठ आदि कलाकारतय्गु अभिनय स्वय् दइगु जूगु दु । लय् चिनामि गोविन्द ह्यूमतं थुगु संकिपाय् लय् चिनादीगु दुसा पवन जोशी व शैलेश शाक्यया च्वसां पिज्वःगु म्येय् रीमा गुरुङ, प्रवेशमान शाक्य, राजेन्द्र महर्जन, संगीता शा,क्य आर.बी. संगम, सतिश महर्जन, रीता महर्जन आदि कलाकारतय्सं सः बियादीगु दु । संकिपाया निर्देशन पवन जोशी, छायांकन श्याम रायमाझी, समाः सनम कुमार श्रेष्ठं यानादीगु जूगु दु ।

More Stories Like this