ल्वहंलिसे पुस्तौं पुस्ता

स्वंगू पुस्ता न्ह्यवंनिसें निरन्तर ल्वहं ज्याय् लगे जुयाच्वंगु परिवारय् जन्म जुयाः थौं ७० दँया बैंशय् नं ल्वहंया ज्याय् हे निरन्तरता बिया वयाच्वंम्ह खः सुनकुमार शिलाकार । थौं स्वयां न्हय्प्यदँ न्ह्यः ख्वपया तेखाचो त्वालय् मां जगतमाया व अबु
रत्नबहादुरया काय कथं बूम्ह सुनकुमारं मचांनिसें हे सिँज्या व ल्वहंज्या याना वःगु खः । कूल हे उगु ज्याय् लगे जूगुलिं सुनकुमारयात नं ल्वहं कीत उलि थाकु मजुल । बाज्या व अबु नं उलि हे नामूद कालिगढ जूगुलिं थीथी थासय् ल्वहंया मूर्ति दयेकेगु ज्याय् मचानिसें हे सुनकुमारं याःगु खः । सुनकुमारया अबु रत्नबहादुरं धाःसा ल्वहंया ज्या जक यानादिल । सुनकुमारं नीन्यादँ तक सिँज्या नं यानादिल । उगु इलय् वय्कलं राणाकालीन दरवारत दयेकेगु ज्या यानादीगु खः । अबलय् वय्कलं सिंहदरवार नारायणहिति दरवारय् च्वंगु चिडियाखाना निर्माणय् नं लगे जुयादीगु खः ।

वय्कलं येँय् सोल्टी होटल दयेकूबलय् नं काय नाप जानाः आपालं सिँज्या यानादीगु खः । लिपा वय्कलं ल्वहंया मूर्ति दयेकेगु ज्या नं शुरु यानादिल ।

राणाकालय् पशुपतिया झिंन्हय्गू शिवालय दयेकेगु ज्याय् थः अबुयात ग्वाहालि यानागु खँ वय्कःयात लुमं । २००४-०५ सालपाखे थः माइलाम्ह दाजु गणेशकुमार शिलाकार नाप जानाः वय्कःया अबु रत्नबहादुर शिलाकारं अतिकं नांजाःगु भुइजःसि नारायणया द्यःया मूर्ति पशुपति दुने दयेकादीगु खः ।

२००७ सालय् ख्वीन्यादँया बैशय् वय्कःया अबु मंत । मां जगतमाया धाःसा वयां खुदँ न्ह्यः २००१ सालय् पीगुदँया बैंसय् हे मदुगु खः । काय मोहनकुमार शिलाकार नं चर्चित कलाकार जुयाः थौंकन्हय् नगरकोट वनेगु लँय् उकथंया हे ल्वहंया मूर्ति निर्माण यायेगु ज्याय् लगे जुयाच्वनादीगु दु ।

थःपिनि न्हूगु छेँय् सुनकुमार शिलाकारं बद्रीनाथ केदारनाथ रामेश्वर नापं चारधामया मूर्ति व अष्टमातृकाया मूर्ति तयार यानाः स्थापना यानादीगु दु । वय्कःया मूर्तित विदेशय् तकं थ्यं । थम्हं आः तक नं विदेशीतय्सं अर्डर याः वःसा छुं नं मूर्ति मदयेकागु बरु थःगु ज्यासलय् वयाः तयारी यानातःगु सामान न्याः वल धाःसा बिया छ्वयागु खँ नं वय्कलं कनादिल । नापं आः नकितिनि हे जक निम्ह तयारी किसि उकथं हे अमेरिकाय् यंकूगु नं वय्कलं लुमंकादिल ।

मां बैद्यज्या नं याइम्ह जुयाः वय्कः न्हापांनिसें हे ख्वाः चकं स्वये जिउ । ७३ दँ दये धुंकूसां नँया मुगः ज्वनाः ल्वहँतय् बुट्टा कीगु ज्याय् ल्याय्म्हतय्सं थें हे वय्कलं ज्या यायेफु नि । ल्वहं कायेगु समस्या ब्वलंगु व नगरकोट लागां ल्वहं हयेगु इलय् ब्यारेकया सेनां पनीगु दुःख प्वंकुसें आः थज्याःपिं सीप दुपिं मनूतय्त माःगु बन्दोबस्त यायेमाःगु माग यानादिल । वय्कःया जहान मोहनप्यारीं नं बैशं जिथि जुइधुंकूसां वय्कःयात उलि हे ग्वाहालि यानाच्वनी । आः ला कायिपं जक मखु छय्पिं तकं थ्वहे ज्याय् लगे जुइधुंकूगु दु । तर मनू कलाकारिता दुम्ह कालिगढ खयां नं व थम्हं दयेकूगु मूर्ति आपालं महत्वपूर्ण थासय् तयातःगु दःसां वय्कः स्वयम्यात धाःसा च्वनेगु लागिं अझ नं थाय्या समस्या जुयाच्वंगु दनि । पुलांगु छेँय् मुद्दा जुयाच्वंगुलिं वय्कःया निंतिं आः ज्यासः हे च्वनेगु छेँ जुयाच्वंगु दु । सिँकःमिया स्वाहाने भ्वाथः धाःगु थ्वहे मखा जुइ !

कृष्ण

More Stories Like this