जेठ १८ या बन्दय् नेवाः चेतना

वंगु जेठ १८ गते नेवाः राज्य पलिस्था व काठमाण्डौ उपत्यका शहरीकरण विधेयक खारेजी माग यासें नेवाःतय्सं नेवाःतय्गु ख्वातुगु वस्ति दुगु १२ जिल्ला दुने लाःगु नेपालमण्डल बन्द यात । थुकिया ग्वसाः खलः कथं नेवाः देय् दबू नेवाः जागरण मंच नेवाः राष्ट्रिय मुक्ति मोर्चा नेवाः लोकतान्त्रिक संघ नेपाः राष्ट्रिय ल्याय्म्ह न्ह्यलुवा ज्यापु महागुथि नेवाः देय्गू नेवाः मंकाः दबू व ज्यापु समाज यल समेत गुंगू नेवाः खलः पुचः जानाः स्वंगु नेवाः राज्य मंकाः संघर्ष समिति खः । थ्व स्वयां छन्हु निन्हु न्ह्यः असं मैतिदेवी तक मसाल जुलुस पिथनसा यल ख्वप व मेमेगु थासय् नं प्रचार र् यालि मसाल जुलुस पिकयाः पर्चा पम्प्लेट ह्वलेगु ज्या जूगु खः ।

थ्वहे कथं जेठ १८ गते नेपालमण्डल बन्द ताःलाकेत थ्व च्वमिं नं सुथय् ६ ताःइलंनिसें ब्वति कया । थाय्मदइ मि च्याकाः शुरु जूगु आन्दोलनय् नेवाः जागरण मंचया पासापिं ध्वाँय् ज्वनाः गुम्हं वंघः गुम्हं असं जुयाः रत्नपार्कपाखे वन । थँहितिपाखें थाय्मदुइ बा १९ प १६०४ नम्बरया छगः मोटरसाइकल वयेवं बन्दकर्ता कार्यकर्तातय्सं वयात पनाः अन हे मि तया बिल । नेवाः राष्ट्रिय मुक्ति मोर्चाया पासापिनिगु जुलुस अनं तुं थँहितिपाखे न्ह्याःवन । अन च्वनाच्वंपिं छुं भलादमि धायेके न्ह्याःपिं नेवाःतय्सं च्यायेत सनाच्वंगु बाइकय् मि स्यायेगु ज्या यात अले व बाइक थाय्मदु बहालय् यंकातल । थ्व खनाः आन्दोलन समर्थक नेवाः दाजुकिजातय्सं नेवाःतय्गु थ्वहे कमजोरी बानी मजिउ धाधां वनाछ्वत । लिपा व बाइक बर्मू साहुयात लःल्हायेगु ज्या जुल । मेमेगु पार्टीतय्सं बन्द याइ- बलय् मखंछु याना जुईपं नेवाःत नेवाःतय्सं हे याइगु बन्दय् धाःसा च्वापुकाः जुया जूगु अजूचायापुगु खँ खः ।

बन्द आह्वान यासें पासापिं लिसे वंघः जुयाः न्हूसतक बसन्तपू चिकंमू कुलेश्वर अले बल्खु तक जुलुस थ्यन । अन सुथय् छथ्वः नेवाः विरोधीतय्सं फलफल बजारय् सःताः छपुचः नेवाः पासापिंत डण्डी पाइप व खुकुरीं घाःपाः याना हःगु जुयाच्वन । जुलुस अन थ्यंबलय् निगः पुलिस भ्यान दिका तःगु खने दत । पासापिंसं भ्यानय् मि तयेगु खँ न्ह्यथन । वयांलि प्रहरी दमन मुर्दावादया नारा थ्वयेकल अले पुलिस भ्यानय् आक्रमण यानाः उकिया खापा लिना छ्वत । पासापिं खुकुरीं पाःपिं गुण्डातय्गु छेँ मालेत वन । मधुसुदन धाःम्ह गुण्डां थ्व ज्या याकूगु सीदत । सकलें फलफुल बजाः वंबलय् अन न्हापा हे दंगा प्रहरी तैनाथ याना तयेधुंकल गुण्डातय्त बचे यायेत । जुलुसं प्रहरी दमन मुर्दावाद धकाः नारा लगे यानाः कुलेश्वर कालिमाटी जुयाः बसन्तपू थ्यन ।

जि चाहिं यलया बन्द छकवः स्वये धकाः उखेपाखे वना । बन्द धाथें तसकं ताःलाःगु खने दत । सिंह- दरवारंनिसें हे फुटपाथ पसः तकं मचाः । कोपुण्डोलय् छम्ह बाज्यः वंम्ह बन्दकर्ता पासां छगः हे गाडी वये वने याके मबिउ । साइकलया हावा फुस्के यायेगु ज्या मस्तय्सं मत्वःतू । अन 'जनदिशा' वाःपौया गाडी हयाच्वंगु खनेवं बन्दकर्ता छम्हेस्यां हमला यायेत स्वत तर थ्व च्वमिं प्रेसया गाडीइ हमला मयायेत इनाप यानाः पनाबिया । यलय् मंगल बजाः लगंख्यः आदि गल्लि गल्लि चाःहिला । गल्लि गल्लि तकं बन्द । थ्व खनाः यलया सकल नेवाःतय्त मनं-मनं सुभाय् बिया । यलया बन्द अवलोकन लिपा पासा बिनोद लिसे बसन्तपूया बृहत जुलुसय् वया ।

थुकथं नेपालमण्डलया नेवाःतय्गु बन्द अद्भूतरुपं ताःलात । बृहत जुलुस क्वचायेकाः बसन्तपुली नेवाः स्वायत्त राज्य मंकाः संघर्ष समितिइ आवद्ध थीथी खलः पचःया पदाधिकारीतय्सं संवोधन यानादिल । सकस्यां संवोधन उलि हे स्यल्लाः । वय्कःपिंसं न्हूगु दयेकूगु संविधानय् नेवाः स्वायत्त राज्यया ग्यारेन्टी जुइमाःगु स्वनिगःयात विकास यायेगु नामय् हयेत्यंगु केन्द्रिकृत शहरीकरण विधेयक लित कायेमाःगु खँय् राज्य व पार्टीतय्त खबरदारी यात ।

अन स्वतस्फुर्त रुपं कुहां वःपिं नेवाःतय्सं मेगु आन्दोलन याकनं घोषणा यायेत ग्वसाः खलःयात इनाप याःगु खः । थ्व आन्दोलनं छु क्यना बिल धाःसा नेवाःत माल धाःसा ज्यान बलिदान बीत नं तयार दु । अथे खःसां छता म्हाइपुगु खँ छु धाःसां नेवाःतय्सं अपाय्धंगु आन्दोलन यातं नं उकी ब्वति काःपिं मिस्तय् ल्याः धाःसा तसकं म्हो खने दत । थ्व धइगु अझ नं जनचेतना मगाःगुया चिं खः । उकिं मिस्तय्त सतकय् क्वकायेत अझ नं चेतना थने माःगु दु । आः उपिं भुतुली जक च्वनाः जा थुयाः वसः हिया जक च्वनेगु मखु थःग हक-अधिकारया निंतिं सतकय् नं पिहां वये माःगु ई न्ह्यःने वयाच्वंगु दु । मिसा नेतृ हिसिला यमि व उर्मिला डंगोलं नं थ्वहे सन्देश बिसें सकल नेवाः मिस्तय्त राजनैतिक चेतना थने माःगु व आन्दोलनय् ब्वति कायेत उत्प्रेरित यायेमाःगु बिचाः प्वंकादिल । थ्व आन्दोलनं झीत छु स्यना बिल धाःसा नेवाःत आः भ्वय् जक नया च्वनेगु व म्वाःमदुगु चिचीधंगु खँय् थवंथवय् ल्वाये हाले मजिल । छप्पँ जुइ माल नेवाः एकता जिन्दाबाद धाये सयेके माल । एकताय् गुलि शक्ति दु धकाः क्यना बी माःगु दु । थ्व आन्दोलनं धाथें झीत स्यना बिउगु धइगु हे झी संगठनय् एकतावद्ध गोलवद्ध जइमाल धकाः खः ।

थौं छ जि जुयाः मखु

झी जुयाः न्ह्याये नु

थौं छंगु जिगु धकाः मखु

झीग धकाः धाये नु

नेवाः एकता जिन्दावाद

धइगु नारा थ्वयेके नु

झीगु अधिकार काये नु

नेवाः राज्य स्वने नु

धात्थें थ्व हे नारा आः सकल नेवाःतय्सं थ्वयेके माःगु दु । थ्व आन्दोलनय् सी दयेक व सी मदयेक ग्वाहालि यानादीपिं सकलें नेवाः गैर नेवाःतय्त सुभाय् बी हे माः ।

माधवरत्न ताम्राकार 'ख्वबि’

More Stories Like this